གང་གི་གྱ་གྱུས་བརྩེ་བ་འདོར་བའི་རིག་པའི་བང་མཛོད་བསིལ་ལྡན་དཔའ་བོ་ངུར་སྨྲིག་འཛིན་པའི་རྒྱལ་མཚན་པ། །
ཟབ་མོའི་འབྲུ་གཅིག་རྣ་བར་བདུད་རྩི་དགའ་ལྡན་ལྷ་ཡི་གོང་མའི་གསོལ་ཆང་མི་རྣམས་གནང་བའི་རྟོགས་ལྡན་པ། །
མཁྱེན་བརྩེ་ནུས་གསུམ་རྒྱན་དྲུག་མཆོག་གཉིས་དགོངས་དོན་རབ་གསལ་ཉ་གང་ཟླ་བ་རྒྱ་མཚོ་ནང་རོལ་འཆར་བ་བཞིན། །
གང་གི་སྨག་རུམ་རབ་ཏུ་སེལ་མཁས་རྟ་བདུན་དབང་པོ་ཤེས་རབ་རྒྱ་མཚོ་འཇམ་མགོན་བླ་མའི་རྟེན་གསུམ་འདུད། །
ཆུ་སྐྱེས་སྣ་ཚོགས་མང་དུ་བཞད་པའི་དབྱར་གྱི་ལང་ཚོ་ཚངས་པའི་བུ་མོ་མཆོག་མངའ་མཛེས་པའི་དཔལ་ཡོན་རྒྱས། །
ཕུན་སུམ་ཚོགས་པའི་འཁོར་ཡུག་འཁོར་གླིང་ཞི་དལ་མཛེས་པའི་ཐུབ་བསྟན་འཛིན་པ་རྨད་བྱུང་དགེ་བའི་ཚོགས་རྣམས་རྨད། །
གང་གི་བརྩེ་ཆེན་བདག་ཉིད་ཆེན་པོ་ཟླ་བྲལ་རྒྱལ་སྲས་འགྲོ་བའི་མགོན་པོ་སྙིགས་དུས་འདྲེན་དཔོན་གདན་གྱི་གནས། །
གསུམ་འཛོམས་གསུམ་རྨད་དུས་ཀྱི་ཁྲོད་ན་ཁྱད་འཕགས་གླིང་གའི་དཔལ་ཡོན་རྒྱས་པའི་བརྗིད་ཉམས་བཞུགས་པའི་བར་གསེང་ན། །
ཆུ་འཛིན་ནག་པོ་རབ་ཏུ་འཁྲུག་པའི་གཡུ་འབྲུག་གྲགས་པའི་ལྡིར་སྒྲའི་གད་རྒྱངས་གླིང་ལ་ཁྱབ་པ་དེ་ཡི་སྐད། །
འཇིགས་འཇིགས་གཤེན་རྗེའི་ཕོ་ཉའི་ངང་ཚུལ་ཤན་པའི་གོམ་སྒྲ་རྣ་བར་ཐོས་པའི་འཇིགས་སྐྲག་འཇིགས་རུང་དེ་ཡི་སེམས། །
བཅུ་དྲུག་ལང་ཚོ་ཡར་ཚེས་ཟླ་བ་དཔྱིད་དཔལ་རྒྱས་པ་ལྟ་ན་སྡུག་པའི་མཛེས་སྡུག་ཟླ་བྲལ་དེ་ཡི་ཚུལ། །
ཕོ་ཉའི་བྱ་ཕོ་མ་བྲིས་འཕྲིན་ཡིག་མ་སྐུར་ཕོ་ཉ་རང་བྱུང་རྒྱང་སྒྲོག་འདབ་ཆགས་གསུང་སྐད་རང་སྒྲོག་ཡིན། །
ཐོས་མཐོང་སྐྱོན་འཆད་ཆུ་ཐིགས་བསགས་པའི་རྒྱ་མཚོའི་རླབ་སྒྲ་ཤུར་ཤུར་གྲགས་པའི་མ་ཉན་ཀ་མེད་མ་བྱུང་ངམ། །
དགོས་དོན་ཆེ་བའི་ལྷུན་པོ་དོན་རྫོགས་དེ་ཡང་སྣང་མེད་བྱེད་ཆུང་མཆོག་ཡ་རྡུལ་ཙམ་བྱེད་པར་མ་ནུས་ལ། །
རི་ཆུ་འདྲེས་བའི་ཚུལ་ལ་འཚོ་ཡང་ལོ་ཟླ་ཁྲི་ཕྲག་གནས་ཡང་གཏན་དུ་གཅིག་འབྲས་འབྲས་བུ་ཡོད་མ་ཡིན། །
བྱེད་ཆུང་ཆུ་ཐིགས་གདན་རློན་འཁྲུལ་བའི་སྣང་བའི་འདབ་ཆགས་མཁའ་ལ་འཕུར་ན་དོག་མོ་ས་དང་རིང་ཕན་ཅི། །