དཔྱིད་དཔལ་མཛེས་པའི་བརྗིད་ཉམས་མིག་ལ་ལྷུང་། །
སྔ་ཕྱིའི་མཚམས་སྤྲིན་རི་ཀླུང་ལང་ལོང་འཁྲིགས། །
ཕྱིར་དྲན་མིག་གི་རྒྱང་མིག་མ་ཆད་བར། །
སེམས་པའི་སྟེང་འོག་འཁོར་ནས་སེམས་མཐའ་ངུ། །
འབུ་སྦྲང་སྣང་སྐྱིད་དབྱངས་རྟ་མཛོད་ཀྱིས་ཕྱུག །
ཉི་འོད་འཇམ་པོ་དེ་ཡི་དཔུང་རོགས་ཡིན། །
སྐྱོ་ཚིག་ཐར་ཐོར་ངག་ནས་གྱེར་མཁན་ལ། །
ལས་ཀྱི་དཔུང་རོགས་ཡུལ་ཕྱོགས་གང་དུ་ཆས། །
གྱེས་པའི་མཐའ་ལ་སྒུག་རུང་ཕྲད་པར་ཅི། །
སྐྱོ་བའི་ཚིག་ལ་ངག་གིས་གྱེར་རུང་ཅི། །
གྱེས་བྲལ་སྒུག་པའི་ཕྲད་པ་སེམས་ཤུགས་དེ། །
མ་ཤི་གསོན་རུང་སྙིང་པོའི་དགོས་དོན་གང་། །
ཁྱེད་ནི་ཁྲུང་ཁྲུང་ལྷོ་ལ་འཕུར་བའི་ཚུལ། །
ང་ཡི་འཇིག་རྟེན་སྟོང་བའི་ངང་ཚུལ་བཟུང་། །
སླར་ཡང་དཔྱིད་ཀྱི་ནམ་ཟླ་མ་སླེབས་པར། །
ཁྱེད་ཉིད་མཐོང་བའི་སྣང་ཚུལ་གང་ནས་བྱུང་། །
མིག་གིས་མ་མཐོང་ཁ་ཕྱོགས་གང་སར་འཁོར། །
སེམས་ཀྱིས་མ་བོར་རང་སེམས་སྨྱོས་པའི་ཚུལ། །
ལུས་ཀྱི་བ་སྤུ་ཙམ་ཡང་མཐོང་ཕྲད་ན། །
སྙིང་ལ་བཞག་ནས་འདས་པའི་གཏམ་རྒྱུད་གླེང་། །
སྐྱིད་སྡུག་གཅིག་པའི་ཉིན་ཞག་མ་བརྗེད་ལ། །
འདས་པའི་རྫོགས་ཚིག་སླར་ཡང་དྲན་དང་གཉིས། །
གཏམ་སྒྲུང་བརྗོད་བྱའི་མི་སྣ་ཉིད་བསམས་ན། །
ཐེངས་གཅིག་མ་ངུས་སེམས་ཀྱིས་མ་བཟོད་ཐལ། །
སློབ་པའི་མཐའ་ལ་ཕྱིན་པ་མ་ཡིན་ནམ། །
ལོ་གྲངས་རྫོགས་པའི་མཐའ་ལ་ཕྱིན་པར་བསམ། །
གྱེས་བྲལ་མཐའ་མ་རྫོགས་ཉིན་དུས་ཁྲོད་ལ། །
རེ་ཞིག་བསམ་བློ་ཡང་ཡང་འཁོར་སའི་གཞི། །
ཕྱི་ཡུལ་མཛེས་དཔལ་ཚངས་སྲས་ལང་ཚོ་བཞིན། །
ཆུ་ཡི་དབྱངས་རྟ་རྒྱུད་མངས་དཀྲོལ་བའི་ཚུལ། །
མཛེས་སྙན་མིག་རྣ་མཐུན་པའི་ནང་རོལ་ནས། །
རང་སེམས་མཐུན་པའི་སྙིང་གི་སློབ་ཚོགས་དྲན། །
བསིལ་རླུང་འཇམ་པོས་སྡོང་ལོ་ལྡེམ་ལྡེམ་གཡོ། །
ལོ་མ་ཐར་ཐོར་མཁའ་ནས་འབབ་པ་བཞིན། །
ཁེར་རྐྱང་ལུས་པའི་སྡོང་འོག་མི་ལྡོམ་ལ། །
དྲན་པའི་སྐྱོ་ཚིག་ཐར་ཐོར་གསོ་བའི་ངང་། །
ཁ་བ་ལྷབ་ལྷབ་མཁའ་ནས་ས་ལ་ཆགས། །
དགའ་བའི་བརྩེ་འདུན་གྱེས་བྲལ་དེ་ཡིས་བསད། །
རང་སེམས་མ་སད་བྲལ་སྡུག་སྨྱོས་ཆང་ཚུལ། །
བཟི་བའི་སྤྱད་བྱ་གླེན་རྒོད་ངང་ནས་རྫོགས། །