སྤྱི་ཟླ8པའི་ཚེས28ཉིན་ལ། དཔལ་ཡུལ་ཤེས་ལྡན་མི་སྣ་རྒྱ་ཁྱབ་ངང་བསྡུས་ནས་འོད་སྟོང་འཕྲོ་བའི་འབྱུང་འགྱུར་གཏོད་དགོས་ཞེས་དཔལ་ཡུལ་རྫོང་གི2024ལོའི་སློབ་ཆེན་སློབ་ཐོན་སློབ་མ་སོགས་གཞོན་ནུའི་ཆེད་དམིགས་གདན་ཞུའི་ཚོགས་འདུ་དང་ལས་གཏོད་ལས་གཞི་ཕུལ་བྱུང་འགྲེམས་སྟོན་བྱེད་སྒོ་སྤེལ། འགྲེམས་སྟོན་བྱ་ཡུལ་ཁག་གིས་ད་ཐེངས་ཀྱི་ལས་གནས་མང་ལ་ཁོར་ཡུག་བཟང་བ། དཔལ་ཡུལ་རྫོང་གིས་ང་ཚོར་བཏོན་པའི་ཞབས་ཞུའི་སྟེགས་བུ་ཡག་པོ་འདུག་ཅེས་བཤད། བྱེད་སྒོའི་ཐོག་ལས་ཀ་འཚོལ་མཁན800ལྷག་ལས་ཐོག་མའི་ཚོད་ལྟ་ལས་མི150ལྷག་བསྡུ་རྒྱུའི་གྲོས་མཐུན་བྱས།

ཤེས་རྟོགས་བྱུང་བར་གཞིགས་ན། ད་ཐེངས་ཀྱི་གདན་ཞུའི་བྱེད་སྒོ་དེ་དཔལ་ཡུལ་རྫོང་ཏང་ཨུ་དང་རྫོང་སྲིད་གཞུང་གིས་གཙོ་གཉེར་བྱས་ཤིང་། རྫོང་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཅུས། རྫོང་ལས་ཞུགས་ཞབས་ཞུ་ལྟེ་གནས་ཀྱིས་སྒྲུབ་འགན་འཁུར། གདན་ཞུའི་ཚོགས་འདུར་གཙོ་གཉེར་ཕྱོགས་ཀྱིས2024ལོ་འཁོར་གྱི་ཕ་ཡུལ་དུ་ལོག་ནས་ལས་གཏོད་བྱེད་པའི་ཞིང་པ་ལས་མིའི་འཐུས་མི་དང་།དབུལ་ཐར་མི་འབོར་གྱི་འཐུས་མི།སློབ་ཆེན་སློབ་མའི་འཐུས་མི་བཅས་མི3ལ་ལས་གཏོད་ཁ་གསབ་སྒོར་ཁྲི3སྤྲད་པ་དང་།2023ལོ་འཁོར་གྱི་དཔལ་ཡུལ་རྫོང་གི་ཕ་ཡུལ་དུ་ལོག་པའི་ལས་གཏོད་མི་སྣ་གྲགས་ཅན6དང་།རྫོང་རིམ་པའི་རྩལ་ནུས་སློབ་དཔོན་ལས་དོན་ཁང5དང་། ཁུལ་རིམ་པའི་རྩལ་ནུས་སློབ་དཔོན་ལས་དོན་ཁང1བཅས་ལ་གཟི་བརྗིད་ལག་ཁྱེར་དང་བྱང་བུ་སྤྲད་ཡོད།

གདན་ཞུའི་ཚོགས་འདུའི་ཡུལ་དངོས་སུ་ལས་འཚོལ་ལས་ཞུགས་ཞབས་ཞུའི་ཁུལ་དང་ཁེ་ལས་ཀྱི་གདན་ཞུའི་ཆེད་ལས་པས་ངང་རྒྱུད་རིང་པོས་ལས་འཚོལ་མཁན་ལ་ཁེ་ལས་ཀྱི་གནས་ཚུལ་དང་། ལས་གནས་ཀྱི་འགན་འཁྲི། གླ་ཕོགས་ཀྱི་ཐོབ་ཐང་། ལས་ཀའི་ཁོར་ཡུག་སོགས་ངོ་སྤྲོད་ཞིབ་ཕྲ་བྱས། དུས་མཉམ་དུ་སྲིད་ཇུས་ཀྱི“དོགས་འདྲི་སེལ་བའི”བློ་འདྲི་ས་ཚུགས་བཙུགས་ནས་ལས་ཀ་འཚོལ་མཁན་ལ་སྤྱི་ཚོགས་རོགས་སྐྱོབ་སྲིད་ཇུས་བློ་འདྲི་དང་ངལ་རྩོལ་ཁྲིམས་སྲོལ་བློ་འདྲི་མཁོ་འདོན་བྱས་ནས་དཀའ་ངལ་ཡོད་པའི་མང་ཚོགས་ལ་སྲིད་ཇུས་ཤེས་རྟོགས་དང་ལོངས་སུ་སྤྱོད་ཐུབ་པར་རོགས་བྱས་ནས་ལས་ཞུགས་གང་མགྱོགས་ཐུབ་པར་བྱེད་ཀྱི་ཡོད།

སི་ཁྲོན་ཝུན་ཤོན་ལས་རིགས་སློབ་གླིང་རྩིས་འཁོར་ཆེད་ལས་ནས་ཐོན་པའི་རིན་ཆེན་དཔལ་བཟང་གིས་མི་ཤུགས་དང་སྤྱི་ཚོགས་འགན་སྲུང་ཅུས་ཀྱིས་ལས་ཞུགས་སྟེགས་བུ་མཁོ་འདོན་བྱས་པར་ཐུགས་རྗེ་ཆེ་ཞུ་རྒྱུ་ཡིན།ད་ཐེངས་ཀྱི་གདན་ཞུའི་ཚོགས་འདུར་ལས་ཞུགས་ལས་གནས་མང་པོ་མཁོ་འདོན་བྱས་ཡོད་པས་ངས་ལས་གནས་ཀྱི་དགོས་མཁོར་རྒྱུས་ལོན་དང་གཟབ་ནན་ངང་གདམ་ག་བྱས་རྗེས་ཁེ་ལས་དང་ངོ་ཐུག་གདོང་འཕྲད་ཀྱིས་འབྲེལ་གཏུག་བྱས་པར་མ་ཟད་རང་ཉིད་ཀྱི་ལས་ཞུགས་འདོད་མོས་ཀྱང་བྲིས་ཡོད་ཅེས་བཤད།

ཤེས་རྟོགས་བྱུང་བར་གཞིགས་ན། ད་ཐེངས་ཀྱི་གདན་ཞུའི་བྱེད་སྒོའི་གཞི་ཁྱོན་ཧ་ཅང་ཆེ་བ་དང་ཁེ་ལས80ལྷག་གིས་ལས་ཞུགས་ལས་གནས1000ལྷག་བཀོད་ནས་ཤེས་ལྡན་མི་སྣ་འདེམས་སྒྲུག་ཏུ་ཡོང་བ་དང་ལས་གནས་ནང་བཟའ་བཏུང་དང་།མགྲོན་ཁང་།ཁྱིམ་ལས་ཞབས་ཞུ་སོགས་ལས་རིགས་མང་པོ་ཚུད་ཡོད་ཅིང་། དུས་མཉམ་དུ་གདན་ཞུའི་བྱེད་སྒོའི་ཁྱབ་ཁོངས་ཆེ་བས་ལས་ཞུགས་འདོད་པའི་གྲོང་སྡེའི་ངལ་རྩོལ་པ་ཚུད་ཡོད་པ་དང་ལྷག་པར་དུ་དབུལ་ཐར་མི་འབོར（དབུལ་པོ་ཕྱིར་ལོག་སྔོན་འགོག་ལྟ་ཞིབ་ཚད་ལེན་བྱ་ཡུལ་ཚུད་པ）དང་། སློབ་ཆེན་དང་འབྲིང་རིམ་ཆེད་ལས་སློབ་གྲྭའི་སློབ་ཐོན་སློབ་མ། དམག་ཁོངས་ནས་ཕྱིར་ལོག་པའི་དམག་མི། དབང་པོ་སྐྱོན་ཅན་། ཕ་ཡུལ་དུ་ལོག་པའི་ཞིང་པ་ལས་མི་དང་དེ་བཞིན་གནས་སྤོ་མང་ཚོགས་བཅས་དོ་ཁུར་བྱ་ཡུལ་དུ་བྱས་པ་དང་དུས་མཉམ་དུ་ལས་ཞུགས་འདོད་པའི་ངལ་རྩོལ་པ་གཞན་དག་ལའང་ཁ་ཕྱོགས་ཡོད། ལས་གཏོད་ལས་གཞི་འགྲེམས་སྟོན་ཐད་རྩལ་ནུས་མཁས་ཅན་ལས་དོན་ཁང་དང་། དཔལ་ཡུལ་རྫོང་སྲོལ་རྒྱུན་ཐང་གའི་རིག་གནས་འཕེལ་རྒྱས་ཚད་ཡོད་སྤྱི་གཉེར་ཁང་། མཁའ་གསར་བོད་སྨན་སོགས་ཕུལ་བྱུང་ལས་གཏོད་ཁེ་ལས10ཡོད།

རྫོང་མི་ཤུགས་དང་སྤྱི་ཚོགས་འགན་སྲུང་ཅུས་ཀྱི་ཅུས་ཀྲང་དབྱང་ཏེ་ཞིང་གིས་ད་ལོ་ནས་བཟུང་དཔལ་ཡུལ་རྫོང་མི་ཤུགས་དང་སྤྱི་ཚོགས་འགན་སྲུང་སྡེ་ཚན་གྱིས་ལས་ཞུགས་ལ་སྐུལ་བ་དང་།ལས་ཞུགས་བརྟན་པོ།ལས་ཞུགས་འགན་ལེན་བཅས་ཀྱི་སྲིད་ཇུས་ཁག་ཁྱོན་ཡོངས་ནས་དོན་ལ་འཁྱོལ་ཏེ་གཙོ་གནད་མི་ཚོགས་ལས་ཞུགས་ལས་དོན་ལ་བརྟན་པོའི་ངང་བསྐུལ་ཡོད། ཟླ་བ་དང་པོ་ནས་བརྒྱད་པའི་བར་རྫོང་ཡོངས་ཀྱིས་ཁུལ་གྱི་ལས་ཞུགས་བློ་འདྲིའི་ཞབས་ཞུའི་སྟེགས་བུ་བཙུགས་པ་དང་ཆེད་དོན་གདན་ཞུའི་ཚོགས་འདུའི་བྱེད་སྒོ་སྤེལ་བར་བརྒྱུད་གཙོ་གནད་མི་ཚོགས་ཀྱི་ལས་ཞུགས་བྱེད་མཁན་ཁྲི1.9ལ་རོགས་སྐྱོར་བྱས་པ་དེ་ན་ལོའི་དུས་མཉམ་ལས་བརྒྱ་ཆ5འཕར་བ་དང་ལས་ཞུགས་མེད་པའི་ཁྱིམ་ཚང་མེད་པ་རྒྱུན་འཁྱོངས་ཐུབ་ཡོད། “ས་གནས་དེ་གའི་ཐག་ཉེ་སར་ལས་ཞུགས་བྱེད་པའི”ལས་ཀའི་རྣམ་པ་གསར་དུ་བཏོད་ནས་ས་གནས་དེ་གའི་མང་ཚོགས519རྫོང་དེ་གའི་བཟོ་ལས་དང་འཛུགས་སྐྲུན་ནང་བསྡུས་པ་རེད།།

（ ཀུན་དགས་བསྒྱུར།）