ཁང་པ་གཏའ་མར་བཞག་སྟེ་གྲོང་སྡེའི་ཐུན་མོང་ལས་གཞིའི་འགོ་བཙུགས།
ཉེ་བའི་ལོ་ཤས་རིང་ཡུལ་སྡེ་དར་རྒྱས་གཏོང་བའི་འཐབ་ཇུས་ལག་ལེན་བསྟར་བ་དང་བསྟུན་ནས་ཡུལ་སྡེ་མང་པོ་ཞིག་གིས་ས་གནས་རང་གི་སྐྱེ་ཁམས་ཐོན་ཁུངས་དང་ཞིང་ལས་ཐོན་ཁུངས་སོགས་ཀྱི་ལེགས་ཆ་སྔོག་འདོན་དང་བེད་སྤྱོད་གང་ལེགས་བྱས་ཏེ། ཡུལ་སྡེའི་ཁྱད་ལྡན་ཐོན་ལས་སྐྱེད་སྲིང་དང་ལེགས་པར་གཉེར་ནས་ཞིང་པའི་ཡོང་འབབ་འཕར་བར་སྐུལ་ཁྲིད་བྱས་ཤིང་ཡུལ་སྡེ་དར་རྒྱས་ཡོང་བར་སྒུལ་ཤུགས་གསར་པ་བསྣན་ཡོད། བློ་བཟང་དོན་འགྲུབ་ནི་གུང་ཁྲན་ཏང་མི་ཞིག་དང་གཞི་རིམ་ཏང་རྩ་འཛུགས་ཀྱི་སྣེ་ཁྲིད་པ་ཞིག་ཡིན་པའི་ངོས་ནས་ཁོང་གིས་རང་ཉིད་ཀྱི་ཕྲག་ཏུ་ཡུལ་མི་འབྱོར་ཕྱུག་ལྡན་པའི་ཕྱོགས་སུ་སྣེ་ཁྲིད་པའི་ལས་འགན་ལྕི་པོ་ཞིག་ཁུར་ཡོད་པ་གསལ་པོར་ཤེས་ཀྱི་ཡོད། ཁོང་གིས་རྟག་ཏུ་བོགས་དངུལ་ཁོ་ནར་བརྟེན་ནས་ཡུལ་མིའི་ཐུན་མོང་དཔལ་འབྱོར་ཡོང་འབབ་རྒྱུན་སྲིང་པའི་ཐབས་ལམ་རྐྱང་པ་ནི་གུ་དོག་དྲགས་པས་ཡོང་འབབ་ཧ་ཅང་ཉུང་ངུ་ལས་མི་ཐོབ་པ་དང་། གནས་ནང་སྡེ་བར་ཡོང་འབབ་སྣོན་པའི་ཐབས་ལམ་གང་མང་རྒྱ་ཆེར་བཏང་ནས་ཡུལ་མིའི་ཡོང་འབབ་མང་དུ་གཏང་དགོས་པའི་བསམ་གཞིག་བྱེད་ཀྱི་ཡོད།
2023ལོར་ཡུན་ནན་གྱི་ཁེ་ལས་ག་གེ་མོ་ཞིག་གིས་གནས་ནང་ཡུལ་སྡེའི་ས་ཞིང་མུའུ12བོགས་གཡར་བྱས་ནས་བཟའ་བྱའི་ཤ་མོ་འདེབས་འཛུགས་བྱས་པར་བརྟེན། ཐོན་འབྲས་མང་པོ་ཐོབ་པར་བློ་བཟང་དོན་འགྲུབ་ཀྱིས་དོ་སྣང་ཆེན་པོ་བྱེད་ཀྱི་ཡོད། ཁོང་གིས་བཟའ་བྱའི་ཤ་མོའི་ཐོན་ལས་ལ་མ་འཇོག་ཉུང་བ་དང་ཕན་འབྲས་ཐོན་མགྱོགས་པ། ཉེན་ཁ་ཆུང་བ་སོགས་ཀྱི་ཁྱད་ཆོས་ལྡན་པས་གནས་ནང་ཡུལ་སྡེའི་ཐོན་ལས་འཕེལ་རྒྱས་དང་ཧ་ཅང་འཚམ་པོ་ཡོད་པ་ཤེས་རྟོགས་བྱུང་། བརྟག་ཞིབ་མཐར་ཕྱིན་དང་ཡུལ་མིའི་བསམ་འཆར་རྒྱ་ཁྱབ་ངང་བསྡུ་ལེན་བྱས་པའི་རྨང་གཞིའི་ཐོག་གནས་ནང་ཡུལ་སྡེས་བཟའ་བྱའི་ཤ་མོ་འདེབས་འཛུགས་བྱ་རྒྱུ་གཏན་ལ་ཕབ། འོན་ཀྱང་མ་དངུལ་མི་འདང་བའི་དབང་གིས་ལས་གཞི་ལག་ལེན་བསྟར་འགོ་ཚུགས་པར་དཀའ་ངལ་མང་པོ་དང་འཕྲད་པ་རེད།
ད་ལོའི་ལོ་སྟོད་དུ་ཡུལ་སྡེའི་ཐུན་མོང་གི་དཔལ་འབྱོར་འཕེལ་རྒྱས་ལ་སྐུལ་འདེད་བཏང་ནས་ཡུལ་མི་སྔར་བས་འབྱོར་ཕྱུག་ལྡན་པའི་འཚོ་བ་རོལ་ཐུབ་པའི་ཆེད། བློ་བཟང་དོན་འགྲུབ་ཀྱིས་མི་རྣམས་ཀྱིས་གུས་བཀུར་བྱེད་འོས་པ་ཞིག་པའི་དོན་ཆེན་ཞིག་ཐག་བཅད་པ་སྟེ། རང་ཉིད་སྒེར་གྱི་ཁང་ཁོངས་གཏའ་མར་བཞག་ནས་དངུལ་བུན་སྒོར་ཁྲི30གཡར་ཏེ་ཡུལ་སྡེའི་ཐུན་མོང་གི་བཟའ་བྱའི་ཤ་མོའི་ལས་གཞི་ལ་མ་དངུལ་བཏང་བ་རེད།
ཡུལ་སྡེའི་ཐུན་མོང་གི་དོན་དག་གི་ཆེད་དུ་རང་ཉིད་ཀྱི་ཁང་པ་གཏའ་མར་བཞག་སྐབས། གཉེན་ཉེ་དང་གྲོགས་པོ་ཚང་མས་བློ་བཟང་དོན་འགྲུབ་སྨྱོས་འདུག་ཟེར་ཞིང་། བློ་བཟང་དོན་འགྲུབ་ཀྱི་བཟའ་ཟླས་སེམས་སྡུག་ཅིང་བློ་ཕམ་སྟེ་མིག་ནས་མཆི་མ་ཡང་ཡང་བཏང་བས་མ་ཚད་ཐ་ན་བཟའ་ཚང་ཁ་འཐོར་དགོས་ཞེས་འཇིགས་སྐུལ་བྱས་ཀྱང་བློ་བཟང་དོན་འགྲུབ་ཀྱིས་ཐབས་བརྒྱ་ཇུས་སྟོང་གིས་རང་གི་ཆུང་མར་འདི་འདྲ་བྱས་པའི་ཕན་ཡོན་བརྒྱ་དང་འདི་འདྲ་མ་བྱས་ན་ཉེས་པ་སྟོང་ཡོད་རབས་སོགས་སེམས་གསོ་དང་གོ་བརྡ་མང་པོ་སྤྲད་དེ་ཁང་པ་གཏའ་མར་བཞག་ནས་དངུལ་བུན་བླང་རྒྱུའི་སེམས་པར་གཡོ་འགུལ་རྩ་བ་ནས་ཐེབས་མ་ཐུབ་པས་ཆུང་མ་ལའང་ཅི་བྱ་གཏོལ་མེད་དུ་གྱུར་ནས་ཁོ་ལ་རྒྱབ་སྐྱོར་མི་བྱེད་ཀ་མེད་གྱུར། ཁོང་གིས་ཁྱིམ་མིར་སེམས་གསོ་ཞུ་བ་དང་ཡུལ་མིར་ངར་ཤུགས་བསླངས་ཤིང་སྐུལ་མ་བཏང་ནས་བཟའ་བྱའི་ཤ་མོའི་ལས་གཞི་ལ་མ་དངུལ་བཏང་བ་རེད།
བློ་བཟང་དོན་འགྲུབ་ཀྱི་སྣེ་ཁྲིད་འོག་གནས་ནང་གྲོང་ཚོའི་ཡུལ་མིས་གཅིག་རྗེས་གཉིས་མཐུད་ངང་དང་ལེན་བྱས་ཏེ་བཟའ་བྱའི་ཤ་མོའི་ལས་གཞི་འཛུགས་སྐྲུན་དང་གཉེར་སྐྱོང་ནང་ཧུར་ཐག་ཞུགས་པ་རེད། ཇུས་འགོད་ཞིབ་ཚགས་དང་སྒྲིག་
མང་ཚོགས་སེམས་སུ་བཟུང་ནས་དམངས་འཚོའི་བདེ་རྩ་དོན་དུ་གཉེར།
འཛུགས་ལག་ལེན་བསྟར་བར་བརྒྱུད། གནས་ནང་གྲོང་ཚོས་བཟའ་བྱའི་ཤ་མོ་འདེབས་འཛུགས་ལས་གཞི་སྤེལ་འགོ་ཚུགས་པ་དང་སྔོན་དཔག་བྱས་ན་ལོ་རེར་ཡོང་འབབ་སྒོར་ཁྲི10རག་རྒྱུར་མ་ཟད། གྲོང་ཚོའི་ནང་བེད་མེད་ངལ་རྩོལ་ནུས་ཤུགས་ཁག་གཅིག་ལས་ཞུགས་མི་ཐུབ་པའི་གནད་དོན་ཐག་གཅོད་ཐུབ་རྒྱུ་རེད། གཞན་ཡང་བཟའ་བྱའི་ཤ་མོའི་ལས་གཞིར་ད་དུང་མཐའ་འཁོར་ས་ཁུལ་གྱི་དོ་ཁུར་ཐོབ་ཅིང་།མ་དངུལ་ཡང་འཇོག་སར་འོངས་པས་གནས་ནང་གྲོང་ཚོར་འཕེལ་རྒྱས་ཀྱི་གོ་སྐབས་དེ་བས་མང་པོ་འཕྲད་ཡོད་པ་རེད།
བློ་བཟང་དོན་འགྲུབ་ཀྱི་བྱ་སྤྱོད་ལ་ཡུལ་མི་ཚོའི་བསྔགས་བརྗོད་དང་བརྩི་འཇོག་ཐོབ་པར་མ་ཟད། གོང་རིམ་མགོ་ཁྲིད་དང་སྤྱི་ཚོགས་ལས་རིགས་ཁག་གི་དོ་ཁུར་དང་ཁས་ལེན་ཡང་ཐོབ་ཡོད། ཁོང་གིས་རང་ཉིད་ཀྱི་བྱ་སྤྱོད་དངོས་ལ་བརྟེན་ནས་གུང་ཁྲན་ཏང་མིའི་ཐོག་མའི་བསམ་འདུན་དང་ལས་འགན་ལ་འགྲེལ་བཤད་བརྒྱབ་སྟེ་ཡུལ་སྡེ་དར་རྒྱས་གཏོང་ཆེད་རང་ཉིད་ཀྱི་སྟོབས་ཤུགས་ལེགས་སྐྱེས་སུ་ཕུལ་ཡོད།
དམངས་ལ་བརྩེ་བ་ཡོད་པ་དང་དམངས་ལ་ཁེ་ཕན་བསྒྲུབ་ཅེས་པ་ཁ་ནས་བཤད་ན་སྟབས་བདེ་མོ་ཞིག་ཡིན་ཡང་ཉིན་ནས་ཟླ་དང་ཟླ་ནས་ལོ་ལ་རྒྱུན་འཁྱོངས་བྱ་དགོས་ན་དེ་འདྲ་ལས་སླ་མོ་ཞིག་ག་ལ་ཡིན། ཐོག་མའི་བསམ་འདུན་མི་བརྗེད་པ་དང་། ལས་འགན་བློ་ལ་བརྟན་པོར་ངེས་ནས་དམངས་ཀྱི་དོན་དུ་ལྷག་བསམ་མཐའ་འཁྱོངས་ཏེ་དཔའ་ངར་ཆེན་པོས་མདུན་སྐྱོད་བྱེད་ཐུབ་མཁན་ནི་བློ་བཟང་དོན་འགྲུབ་ལགས་རེད།
ཨ་ཕྱི་བུམ་དང་སྐལ་བཟང་ཆོས་མཚོ་དུད་ཚང་གཉིས་ལོ་རྒྱུས་ཀྱི་རྒྱུ་རྐྱེན་དང་དེ་བཞིན་རང་ངོས་འཕེལ་རྒྱས་ཆ་རྐྱེན་གྱི་ཚོད་འཛིན་ཐེབས་པའི་དབང་གིས་དུས་ཡུན་རིང་པོར་དབུལ་ཕོངས་ཀྱི་གནས་སུ་ལྷུང་ནས་ཡོད། སྡོད་གནས་ཀྱི་ཆ་རྐྱེན་ཡང་ཧ་ཅང་ཐབས་ཆག་ཡིན་པས། བློ་བཟང་དོན་འགྲུབ་ཀྱིས་གནད་དོན་དེ་རིགས་ཐག་གཅད་མགྱོགས་ཙམ་ཐུབ་ནས་དམངས་ཀྱི་སེམས་ཁྲལ་དང་དཀའ་ངལ་བསལ་ཆེད། གྲོང་རྡལ་ཏང་ཨུ་དང་སྲིད་གཞུང་ལ་གནས་ཚུལ་དེ་སྙན་ཞུ་བྱས་པ་དང་། དེ་རྗེས་མི་སྒེར་གྱིས་ཀྱང་མ་དངུལ་བཏང་ནས་འདམ་དཀྲུག་འཕྲུལ་འཁོར་དང་སོ་ཕག་འཕྲུལ་ཆས་ཉོས་པར་མ་ཟད། ཨར་ལས་དཔུང་ཁག་བསྡུས་ཏེ་ཨ་ཕྱི་བུམ་དང་སྐལ་བཟང་ཆོས་མཚོ་ཚང་ལ་ཁང་པ་བརྟན་ཞིང་ཉེན་ཁ་མེད་པ་ཞིག་བསྐྲུན་པས་དུད་ཚང་གཉིས་ཀྱི་སྡོད་ཁང་གནད་དོན་ཐག་གཅོད་ཐུབ་པའི་ཁར་འཚོ་བའི་ཁོར་ཡུག་ཀྱང་ལེགས་སུ་ཕྱིན་པ་རེད།
ཡུལ་མི་གཡང་མཁྱེན་ཚང་ལ་གློ་བུར་དུ་འགྲིམ་འགྲུལ་དོན་རྐྱེན་ཞིག་བྱུང་ནས་དཔལ་འབྱོར་ཐད་དཀའ་ངལ་ཆེན་པོར་འཕྲད། གློ་བུར་དུ་ཐོན་པའི་གནས་ཚུལ་དེར་འཕྲད་སྐབས་ཡུལ་མིའི་རྟེན་སར་གྱུར་པའི་བློ་བཟང་དོན་འགྲུབ་ཀྱིས་དཀའ་བ་ཁྱད་དུ་སད་ངལ་བ་དང་དུ་བླངས་ནས་གཡང་མཁྱེན་ཚང་དཀའ་ངལ་ལས་སྒྲོལ་རོགས་བྱས་པ་རེད། ཁོང་གིས་འཕྲལ་དུ་གྲོང་ཚོའི་ཨུ་ལྷན་གཉིས་ཀྱི་ཁོངས་མི་བསྡུས་ནས་ཛ་དྲག་གི་ཚོགས་འདུ་འཚོགས་ཏེ་རོགས་སྐྱོར་བྱ་ཐབས་གྲོས་བསྡུར་བྱས། གྲོང་ཚོའི་ཨུ་ལྷན་གཉིས་ཀྱི་ཁོངས་མིས་འབོད་སྐུལ་དང་དུ་བླངས་ཏེ་རང་འགུལ་ངང་ཞལ་འདེབས་བརྒྱབ་ནས་གཡང་མཁྱེན་ཚང་ལ་དགེ་དངུལ་སྒོར3000སྤྲད་པ་རེད། དགེ་དངུལ་དེ་མང་པོ་དེ་འདྲ་མེད་ཀྱང་དཀའ་ངལ་གྱི་གནས་སུ་གྱར་བའི་གཡང་མཁྱེན་ཚང་ལ་མཚོན་ན་ལག་པ་ཚ་དུས་ཀྱི་སྐམ་པ་དང་རྐང་པ་ཚ་དུས་ཀྱི་རྡོག་པར་གྱུར།
བློ་བཟང་དོན་འགྲུབ་ནི་ཡུལ་སྡེ་དར་རྒྱས་གཏོང་བར་བློ་བརྟན་འགྱུར་མེད་ཀྱི་ལམ་འདིང་མཁན་དང་ཡུལ་སྡེའི་བྱ་གཞག་འཕེལ་རྒྱས་གཏོང་མཁན་གྱི་སྣེ་ཁྲིད་པ་བཟང་པོ་ཡིན་ལ། ཡུལ་སྡེ་མཛེས་སྡུག་ལྡན་པ་སྐྲུན་མཁན་གྱི་སྐར་མ་འོད་ཆེན་དེའང་ཡིན་ནོ།། （ མིག་དམར་དོན་གྲུབ་ཀྱིས་བསྒྱུར།）