ཉེ་ཆར། ཀྲུང་འབྲུའི་དུས་བཅད་ཚོང་ཟོག་ཚད་ཡོད་སྤྱི་གཉེར་ཁང་དང་ཀྲུང་དབྱིན་སྲོག་རྟེན་འགན་བཅོལ་ལས་དོན་ཚོ་ཆུང་དཀར་མཛེས་རྫོང་དུ་བརྟག་ཞིབ་བྱེད་པར་ཡོང་ནས་ཡུལ་སྡེ་དར་རྒྱས་ལ་རོགས་སྐྱོར་བྱས་པ་དང་འབྲེལ་ཏང་འཛུགས་སྐྱོང་ལ་སྣེ་ཁྲིད་མཐའ་འཁྱོངས་ཀྱིས་ཡུལ་སྡེ་དར་རྒྱས་ལ་བསྐུལ་དགོས་ཞེས་པས་གཙོ་དོན་བྱས་པའི་ཏང་འཛུགས་སྐྱོང་གི་བྱེད་སྒོ་རབ་དང་རིམ་པ་སྤེལ་ཡོད།
ལས་དོན་ཚོ་ཆུང་དང་བཅས་པ་སྔ་རྗེས་སུ་འདན་མ་གྲོང་རྡལ་གྱི་ལྟེ་བའི་སློབ་ཆུང་དང་།ནོར་བུ་གླིང་ཆ་ཚང་སློབ་ཆུང་བཞི་པ།ནོར་བུ་གླིང་སློབ་འབྲིང་གཉིས་པ་བཅས་སུ་བརྟག་ཞིབ་ཏུ་བསྐྱོད་ནས་ཡུལ་དངོས་སུ་བཅར་འདྲི་དང་ངོ་ཐུག་གདོང་འཕྲད་ངང་སྤེལ་རེས་དང་བཞུགས་མོལ་སོགས་ཀྱི་བྱ་ཐབས་བརྒྱུད་དེ་སློབ་གྲྭ་ཁག་གི་སློབ་ཁྲིད་སློབ་གཉེར་དང་། སློབ་མའི་སེམས་ཁམས་བདེ་ཐང་། ལས་རིགས་འཆར་འགོད་སོགས་ཀྱི་ཐད་རྒྱུས་ལོན་ཞིབ་ཕྲ་བྱས་པར་མ་ཟད་སློབ་གྲྭར་ཁེ་ལས་སྟེགས་བུའི་ཐོན་ཁུངས་ངོ་སྤྲོད་བྱས་པ་དང་ལྷག་པར་དུ་དཀའ་ངལ་དང་ཁ་ཚ་དགོས་གཏུགས་ཀྱི་དགོས་མཁོ་སོགས་ཀྱི་ཐད་གྲོས་བསྡུར་དང་སྤེལ་རེས་ཤུགས་ཆེན་བྱས་ཏེ་དངོས་སྒྲུབ་ཀྱི་སྤྱོད་ཚུལ་ཐོག་ནས་ཕྱིན་ཆད་རོགས་སྐྱོར་ལས་དོན་ཁག་ལ་རྨང་གཞི་བརྟན་པོ་བཏིང་ཡོད། དུས་མཉམ་དུ་ལས་དོན་ཚོ་ཆུང་གིས་ས་གནས་དེ་གར་ཀྲུང་འབྲུའི་དུས་བཅད་ཚོང་ཟོག་གིས་དཀར་མཛེས་རྫོང་གི་ཡུལ་སྡེ་དར་རྒྱས་ལས་དོན་ལ་སྐུལ་བའི་ཆེད་ལས་ཤེས་བྱའི་གསོ་སྦྱོང་ཚོགས་འདུ་འཚོགས་ནས་དངུལ་རྩའི་རྨང་གཞིའི་ཤེས་བྱའི་ཐད་རྫོང་ཡོངས་ཀྱི་ཡུལ་ཤོག（གྲོང་རྡལ）ཁག་གི་ཧྲུའུ་ཅི་དང་པོ་དང་། གྲོང་སྡེའི་བཅའ་སྡོད་ལས་བྱེད་པ། ཚན་ཁག་གི་ཡུལ་སྡེ་དར་རྒྱས་ཀྱི་འགན་འཁུར་ལས་དོན་པ་བཅས་ཁྱོན་མི300ལྷག་ལ་གསོ་སྦྱོང་བྱས་ནས་དངུལ་རྩས་ས་གནས་ཀྱི་དཔལ་འབྱོར་ལ་ཞབས་འདེགས་ཞུ་བ་དང་ཡུལ་སྡེ་དར་རྒྱས་ལ་སྐུལ་བའི་ཐད་ཤེས་རྟོགས་སྔར་བས་ཟབ་མོ་བྱུང་ཡོད།
འདན་མ་གྲོང་སྡེའི་ཏང་ཀྲི་པུའི་བྱེད་སྒོ་སྤེལ་ཁང་དུ་ཀྲུང་འབྲུའི་དུས་བཅད་ཚོང་ཟོག་ཚད་ཡོད་སྤྱི་གཉེར་ཁང་གིས་འདན་མ་གྲོང་རྡལ་མི་དམངས་སྲིད་གཞུང་དང་འདན་མ་གྲོང་སྡེའི་ཏང་ཀྲི་པུའུ་དང“ཡུལ་སྡེ་དར་རྒྱས་འཐབ་ཇུས་མཉམ་ལས་ཀྱི་གྲོས་མཐུན”དང“ཡུལ་སྡེ་དར་རྒྱས་ཀྱི་ཆ་སྒྲིག་ཏང་འཛུགས་སྐྱོང་མཉམ་སྐྲུན་གྱི་གྲོས་མཐུན”སོ་སོར་བཞག་པ་དང་འབྲེལ་འདན་མ་གྲོང་རྡལ་མི་དམངས་སྲིད་གཞུང་ལ་རོགས་སྐྱོར་མ་དངུལ་སྒོར་ཁྲི5ཞལ་འདེབས་བརྒྱབ་ནས་འདན་མ་གྲོང་རྡལ་གྱི་ཡུལ་སྡེ་དར་རྒྱས་ལས་དོན་ལ་རམ་འདེགས་བྱས། དཀར་མཛེས་རྫོང་ཨུ་དང་རྫོང་མི་དམངས་སྲིད་གཞུང་གིས་ཀྲུང་འབྲུའི་དུས་བཅད་ཚོང་ཟོག་ཚད་ཡོད་སྤྱི་གཉེར་ཁང་ལ་གཟེངས་དར་དང་གཟི་བརྗིད་མཚན་སྙན་གྱི་ལག་ཁྱེར་སྤྲད་དེ་ཀྲུང་འབྲུའི་ཚོགས་པས་ལོ་མང་རིང་དཀར་མཛེས་ཀྱི་བྱ་གཞག་ཁག་འཕེལ་རྒྱས་ལ་ཐུགས་ཁུར་དང་རྒྱབ་སྐྱོར་གནང་བར་སྙིང་དབུས་ནས་ཐུགས་རྗེ་ཆེ་ཞུས་པ་དང་ཀྲུང་འབྲུའི་ཚོགས་པའི་གནས་སྦྱར་ལས་བྱེད་པས་དཀའ་སྤྱད་འབད་བརྩོན་བྱས་པར་ཚད་མཐོའི་ཁས་ལེན་དང་ཐུགས་རྗེ་ཆེ་ཞུས་ཡོད། ཕྱོགས་གཉིས་པོས་ཀྲུང་འབྲུའི་དུས་བཅད་ཚོང་ཟོག་དང་འདན་མ་གྲོང་རྡལ་ཆ་སྒྲིག་མཉམ་སྐྲུན་ནི་ས་གནས་དང་ཁེ་ལས་ལག་གདང་སྦྲེལ་ནས་མཉམ་དུ་མདུན་སྐྱོད་དང་ལྷག་བསམ་རྣམ་དག་ངང་མཉམ་ལས་བྱེད་པའི་བསྡུས་རིས་ཤིག་ཡིན་ལ་ས་གནས་དང་ཁེ་ལས་ཁྱིམ་ཚང་གཅིག་ལྟར་བརྩེ་བས་འབྱུང་འགྱུར་ཕྱོགས་སུ་འབད་འབུངས་ལྷོད་མེད་བྱེད་པའི་གསོན་ཉམས་དོད་པའི་མཚོན་ཚུལ་ཞིག་ཀྱང་ཡིན་ཞིང་། ད་ཐེངས་ཀྱི་བརྟག་ཞིབ་དང་ཏང་འཛུགས་སྐྱོང་གི་བྱེད་སྒོ་དེས་ས་གནས་དང་ཁེ་ལས་མཉམ་འདྲེས་འཕེལ་རྒྱས་སྔར་བས་ཤུགས་ཆེན་བཏང་སྟེ་དངུལ་རྩའི་ཞབས་ཞུ་དང་།བྱིས་པ་འཚར་ལོངས་ཡོང་བ།བདེ་ཐང་སློབ་གསོ།ལས་རིགས་འཆར་འགོད།རིག་གནས་ཡུལ་སྐོར་དྲིལ་བསྒྲགས།ལས་ཞུགས་ལས་མི་སོགས་ཀྱི་ཐད་འབྲེལ་གཏུག་སྤེལ་རེས་ལ་ཤུགས་རྒྱག་པ་དང་།གཉིས་ཁེ་མཉམ་ལས་གཏིང་ཟབ་ཏུ་གཏོང་བ།ཐུན་མོང་ཐོག“མཉམ་གྲོས་མཉམ་སྐྲུན་མཉམ་སྤྱོད”ཀྱི་ས་གནས་དང་ཁེ་ལས་བར་གྱི་འབྲེལ་བ་བཙུགས་ནས་རྫོང་ཁོངས་དཔལ་འབྱོར་འཕེལ་རྒྱས་སྤུས་ཚད་མཐོན་པོར་ཡོང་བར་བྱས་རྗེས་གསར་པ་ཕུལ་ཡོད་པ་རེད།།
( ཀུན་དགས་བསྒྱུར།)