གཅིག།

མི་གང་ཞིག་ལ་མཚོན་ན་གཉེན་ཉེ་ནང་མིའི་ཚེ་སྲོག་ཤོར་བ་ནི་འཇིག་རྟེན་འདིའི་ཐོག་སྡུག་བསྔལ་ཆེས་ཤོས་དེ་ཡིན་ཞིང་། གནོད་ཐེབས་ཡུལ་མི་ལི་ཁྲེང་ཡུས་ཀྱིས་བརྩེ་བ་མེད་པའི་རང་བྱུང་གི་གནོད་འཚེའི་མདུན་དུ་མགོ་བོ་མི་སྒུར་པར་གནོད་སེལ་ལས་ལ་བརྩོན་པ་དང་ཡུལ་དངོས་བརྟན་སྲུང་བྱས། མོའི་གཉེན་ཉེ་ནང་མི་རྐྱེན་ལམ་དུ་ཐར་མ་ཐུབ་པས་སེམས་པ་སྡུག་གིས་ཁེངས་ཀྱང་ལག་པས་མིག་ཆུ་འཕྱིས་ནས་བྱ་སྤྱོད་དངོས་ཀྱི་ཐོག་ནས་མྱུར་སྐྱོབ་གནོད་སེལ་ལས་ཀར་ཤུགས་བརྒྱབ་པ་ནི་མོའི་སྙིང་སྟོབས་རང་གཤིས་ངོ་མ་དེ་ཡིན་ནོ།།

དར་མདོ་གྲོང་ཁྱེར་གུར་དྲག་གྲོང་རྡལ་རི་བརྒལ་གྲོང་སྡེར། 1972ལོའི་སྤྱི་ཟླ2པར་སྐྱེས་པའི་ལི་ཁྲེང་ཡུས་ཀྱིས་བློ་བརྟན་འགྱུར་མེད་དང་འགན་འཁྲི་འཁུར་སེམས་ཀྱི་ཐོག་ནས་སྤྱིར་བཏང་མིན་པའི་ལེའུ་བརྩམས་ཡོད། མོ་ནི་གུར་དྲག་གྲོང་རྡལ་རི་བརྒལ་གྲོང་སྡེའི་གྲོང་སྡེ་ཨུ་ལྷན་གྱི་ཨུ་ཡོན་དང་འཆར་ལྡན་བུ་བཙའི་ཆེད་ལས་པ་གཅིག་ལྕོགས་ཡིན་པ་དང་། ཁོང་གིས་སྤྱིར་བཏང་གི་ལས་གནས་ཐོག་འབད་འབུངས་ལྷོད་མེད་བྱས་ནས་གྲོང་སྡེ་འཕེལ་རྒྱས་ཀྱི་ཆེད་དུ་རང་ཉིད་ཀྱི་སྟོབས་ཤུགས་ལེགས་སྐྱེས་སུ་འབུལ་བཞིན་ཡོད།

2024ལོའི་སྤྱི་ཟླ8པའི་ཚེས3ཉིན་གྱི་མཚན་མོར་རི་བརྒལ་གྲོང་སྡེར་གློ་བུར་དུ་ཆུ་ལོག་ཚབས་ཆེན་བྱུང་ནས་གཡག་རྔ་ནས་དར་མདོ་བར་གྱི་མྱུར་བགྲོད་གཞུང་ལམ་ལས་ཕུག་ལམ་བར་གྱི་ཟམ་པ་རྡིབ་པ་དང་། ཁང་པ་དང་འཁོར་རིགས་སོགས་ལ་གནོད་སྐྱོན་ཚབས་ཆེན་བཟོས་ཡོད། རིམ་ཁག་སྲིད་གཞུང་གིས་གནས་ཚུལ་ཤེས་འཕྲལ་མཐོང་ཆེན་པོ་བྱས་ནས་ཤུགས་ཡོད་རྒུས་ཉེན་སེལ་རྒུད་སྐྱོབ་ཀྱི་ཐོན་སྐྱེད་སླར་གསོའི་ལས་དོན་ལ་ཞུགས་ཡོད། ལི་ཁྲེང་ཡུས་ནི་དུས་རྒྱུན་དཀའ་སྤྱད་ལས་ལ་གཞོལ་མཁན་གྱི་གྲོང་སྡེའི་ལས་བྱེད་པ་ཞིག་ཡིན་པ་དང་། ད་ཐེངས་ཀྱི་རང་བྱུང་གནོད་འཚེའི་ཁྲོད་དུའང་དཔའ་ངར་ཆེར་སྐྱེད་ཀྱིས་མདུན་མཆོང་བྱེད་པའི་ཡུལ་མི་ཚོའི་སྲོག་ཤིང་དུ་གྱུར་ཡོད།

ལི་ཁྲེང་ཡུས་ཀྱི་ཁྱིམ་ནི་གནོད་འཚེ་ཚབས་ཆེན་ཕོག་པའི་ལྟེ་བའི་ཁུལ་དུ་གནས་ཡོད། མཚན་མོ་དེར། ཚང་མ་གཉིད་སྐྱིད་པོ་ཁུག་ནས་ཉལ་ཡོད་པའི་སྐབས་དེར་གློ་བུར་དུ་ཁང་པ་འདར་སིག་བརྒྱབ་པས་ཚང་མ་གཉིད་ལས་སད་ཅིང་། ལི་ཁྲེང་ཡུས་མགྱོགས་མྱུར་ཡར་ལངས་ནས་ལྟ་དུས་འདམ་རྡོའི་ཆུ་རུད་ཡིན་པ་ཤེས་རྗེས་གློ་བུར་དུ་འཇིགས་སྣང་གི་ཀློང་དུ་ཚུད་ཡོད། བཟའ་ཟླ་དང་མཉམ་དུ་སྲོག་ཉེན་ལས་ཐར་བའི་བརྒྱུད་རིམ་ནང་དངངས་སྐྲག་གིས་ཁེངས་པ་དང་བཟའ་ཟླར་རྨས་སྐྱོན་ཕོག་ནས་དྲན་པ་ཐོར་བ་སོགས་ཀྱི་གནས་ཚུལ་དང་འཕྲད་ནའང་མོས་གནོད་འཚེ་ལ་མ་འཛེམ་པར་ཤུགས་ཡོད་དགུས་ཁྱོ་ག་ཁྲིད་ནས་ཁྱིམ་མཚེས་ལ་བཅོལ་རྗེས། མྱུར་དུ་ཨ་མ་འཚོལ་དུ་སོང་ཡང་ཆུ་ལོག་གིས་བཀག་ནས་ཨ་མ་རྙེད་མ་ཐུབ།

ལི་ཁྲེང་ཡུས་ཀྱིས་ཕྱིར་དྲན་བྱས་ཏེ་བཤད་རྒྱུར། ང་དང་ཁྱོ་གས་གློག་འཁྱུག་པའི་འོད་ལ་བརྟེན་ནས་ཁང་ཀླད་དུ་སོང་བ་ན། འདམ་རྡོའི་ཆུ་རུད་ཁང་པ་ལས་མཐོ་བ་མཐོང་སྐབས། ངེད་གཉིས་སུམ་ཐོག་ནས་ཐབ་ཁང་དུ་མཆོང་བ་ཡིན། སྐབས་དེར་ངའི་ཁྱོ་ག་ས་ལ་འགྱེལ་སོང་། ཇི་ལྟར་བོས་ཀྱང་ཨ་ལན་སྟེར་མ་བྱུང་། ངས་མགྱོགས་མྱུར་འགྲམ་དུ་སོང་ནས་མཐེ་བོང་གིས་ཁོའི་ཡར་མཆུའི་ཐོག་ཤུགས་ཀྱིས་མནན་དུས་ཁོ་རང་བརྒྱལ་ལས་སངས་བྱུང་། དེ་ནས་ངས་ཁྱོ་ག་སྐྱོར་ནས་ཁང་པའི་རྒྱབ་ཏུ་ཕྱིན་པ་ཡིན། ཁྱིམ་མཚེས་དུད་ཚང་ཁ་ཤས་དང་འཕྲད་སྐབས་ངས་ཁྱོ་ག་ཁོ་ཚོར་བཅོལ་ནས་ཕྱིར་ཨ་མ་འཚོལ་དུ་སོང་བ་ཡིན། མཐར་ཁང་བའི་རྒྱབ་ཕྱོགས་ཀྱི་ཆུ་ལོག་ཆེ་དྲགས་པས་ཨ་མ་འཚོལ་ས་གཏན་ནས་འགྲོ་མི་ཐུབ་པས། ཁ་ཕྱིར་འཁོར་ནས་ཁོ་ཚོར་མྱུར་དུ་རི་འགོ་ལ་རྒྱུག་ཅེས་བཤད་པ་ཡིན་ཞེས་བཤད།

གློག་འཁྱུག་པ་དང་དྲག་ཆར་བབས་པ་སོགས་སྐབས་དེའི་རི་བརྒལ་གྲོང་སྡེའི་གང་ས་གང་དུ་འདམ་རུས་ཀྱི་རླབས་སྒྲས་ཁེངས་ཡོད། ཤི་གསོན་གྱི་འགག་རྩར་ལི་ཁྲེང་ཡུས་ཀྱིས་ཡུལ་མི་རྣམས་བསྡུས་ཏེ་ཉེན་མེད་ཁུལ་དུ་གནས་སྤོ་བྱས། བདེ་བླག་ངང་ཉེན་མེད་ས་ཆར་འབྱོར་རྗེས། མོས་ཚང་མར་ཆར་རླུང་འགོག་བྱེད་ཀྱི་དངོས་པོ་ཞིག་བཙལ་ནས་ཁྱེར་ཡོང་ཡོད། མོ་ལ་མཚོན་ན་གཅིག་ནས་ཁྱོ་གར་རྨས་སྐྱོན་ཕོག་པ་དང་། གཉིས་སུ་ཨ་མ་དང་འབྲེལ་བ་བྱ་མི་ཐུབ་པས་རོགས་སྐྱོབ་བརྒྱུད་རིམ་ཁྲོད་སེམས་པ་སྡུག་གིས་ཁེངས་ནའང་མོས་གྲོང་སྡེའི་ལས་བྱེད་པ་ཞིག་གི་འགན་འཁྲི་གསལ་པོར་རྟོགས་ནས་ལས་གནས་བརྟན་སྲུང་བྱ་རྒྱུའི་གདམ་ག་བྱས།

ལི་ཁྲེང་ཡུས་ཀྱིས་གནོང་འགྱོད་ཆེན་པོའི་ངང་ཨ་མས་མི་ཚེ་ཧྲིལ་པོར་ངལ་རྩོལ་ལ་བརྟེན་ནས་

གཉིས།

ཁྱིམ་ཚང་འཚོ་སྐྱོང་བྱེད་པ་དང་། དཀའ་ངལ་ཁྱད་བསད་ཀྱིས་བུ་དང་བུ་མོ་གསོ་སྐྱོང་བྱེད་པ། ལས་ལ་བརྩོན་ཞིང་སེམས་པ་བཟང་བ། གྲོང་པ་ཁྱིམ་མཚེས་ལ་ཕན་འདོགས་པ་བཅས་བྱེད་ཀྱི་ཡོད། རྟག་ཏུ་ང་ཚོར་རང་ཉིད་ལ་བླང་བྱ་ནན་པོ་འདོན་པ་དང་ལས་ཀ་ཧུར་ཐག་བསྒྲུབ་དགོས་པའི་སློབ་གསོ་རྒྱག་གི་ཡོད་ཅེས་མིག་ཆུ་གཏོང་བཞིན་དུ་བཤད།

རོགས་སྐྱོབ་རུ་ཁག་དེ་གར་སླེབས་རྗེས་ཡུལ་མི་རྣམས་གུར་དྲག་གྲོང་རྡལ་ལམ་མགོ་གྲོང་སྡེ་གནས་སྤོ་བཀོད་སྒྲིག་བྱས་ཡོད། ལི་ཁྲེང་ཡུས་ཀྱིས་ངལ་གསོ་ཕྲན་ཙམ་ཡང་མ་བརྒྱབ་པར་འཕྲལ་དུ་ལས་ཀ་གསར་པའི་ནང་ཞུགས། དངོས་ཟོག་དབོར་རྒྱུ་དང་། གུར་ཕུབ་རྒྱུ། འཚོ་བའི་མཁོ་ཆས་སྤྲད་རྒྱུ། རྒྱབ་ཕྱོགས་མཁོ་སྒྲུབ་འགན་ལེན་བྱ་རྒྱུ་བཅས་ཀྱི་ལས་ལ་བྲེལ་བཞིན་ཡོད།

ཆུ་ལོག་བྱུང་རྗེས་གྲོང་སྡེར་ལྟ་མི་ཕོད་པའི་ཆག་སྒོ་བྱུང་ཡོད། ལི་ཁྲེང་ཡུས་ཀྱིས་ཁྱིམ་གཞིས་བསྐྱར་སྐྲུན་གྱི་ལས་འགན་ལྕི་པོ་དེ་གསལ་པོར་གོ་ཞིང་། དུད་ཚང་རེ་རེ་བཞིན་དུ་གནོད་འཚེ་ཕོག་ཚུལ་བསྡོམས་རྩིས་དང་། ས་རྡོ་སྤུངས་དངོས་གཙང་སེལ་སོགས་ཉིན་མཚན་བལྟོས་མེད་ཀྱིས་འབད་འཐབ་བྱས་ཡོད།

སྤྱི་ཟླ8པའི་ཚེས16ཉིན་ལ་ཉིན་མང་པོར་བཙལ་བའི་ཨ་མའི་སྐུ་ཕུང་གཙང་འཕྱག་བྱ་ཡུལ་ནས་རྙེད་ཅིང་། གནས་ཚུལ་དེ་ཐོས་སྐབས་ལི་ཁྲེང་ཡུས་དར་ཅིག་དྲན་མེད་དུ་བརྒྱལ་བ་དང་། སངས་དུས་སྡུག་གི་མིག་ཆུ་ཆད་མེད་དུ་ཤོར།

ལི་ཁྲེང་ཡུས་ཨ་མ་དང་འབྲེལ་བ་ཆད་པའི་དུས་ཡུན་ནང་། རིམ་པ་ཁག་གི་མགོ་ཁྲིད་དང་ཁྱིམ་མཚེས་ཚང་མས་མོར་སྐུལ་མ་དང་རྒྱབ་སྐྱོར་ཆེན་པོ་བྱས་པ་དང་། ཨ་མའི་སྐུ་ཕུང་བཙལ་ནས་རྙེད་རྗེས། གྲོང་ཨུའི་འབྲེལ་ཡོད་མགོ་ཁྲིད་དང་ཁྱིམ་མཚེས་ཚང་མས་ཁོང་ལ་འཚམས་འདྲི་བྱས་པར་མ་ཟད་ཨ་མའི་འདས་དོན་ཡང་བཀོད་སྒྲིག་བྱས་ཡོད།

དཀའ་ཚེགས་ཆེ་བའི་དུས་སྐབས་དེའི་ནང་ལི་ཁྲེང་ཡུས་ཀྱིས་ཐོག་མཐའ་བར་གསུམ་དུ་ཡུལ་མི་ཚོའི་ཁེ་ཕན་ཨང་དང་པོར་བཞག་ནས་ཚང་མའི་ཆེད་དུ་སེམས་ནུས་ཡོད་རྒུས་གནོད་འགོག་གནོད་སེལ་ལས་དོན་ནང་ཞུགས་ཏེ་ཡུལ་མི་ཚོའི་ཚེ་སྲོག་དང་རྒྱུ་ནོར་ཉེན་མེད་སྲུང་སྐྱོང་དང་གནོད་འཚེ་ཕོག་པའི་མང་ཚོགས་ལ་རོགས་རམ་བྱས་པས་ཚང་མའི་བསྔགས་བརྗོད་ཆེན་པོ་ཐོབ་ཡོད།

རི་བརྒལ་གྲོང་སྡེའི་ཡུལ་མི་ཝང་ཀྲུང་ཁྲེང་གིས་མྱོང་ཚོར་ཟབ་མོའི་ངང་ཆུ་ལོག་ཐོན་སྐབས་ལི་ཁྲེང་ཡུས་ཡར་རྒྱུག་མར་རྒྱུག་བྱས་ནས་ཡུལ་མི་ཚོར་ཕྱིར་འཐེན་བྱ་དགོས་པའི་བརྡ་ཐོ་བཏང་བ་དང་།གང་དུ་དཀའ་ངལ་ཡོད་ན་དེ་གར་ཁོང་གི་གཟུགས་བརྙན་མཐོང་རྒྱུ་ཡོད། ཁོང་ནི་ལས་བྱེད་པ་བཟང་པོ་ཞིག་ཡིན་པས་ང་ཚོ་ཚང་མར་སེམས་འགུལ་ཆེན་པོ་ཐེབས་བྱུང་། ཐུགས་རྗེ་ཆེ་ཞུ་རྒྱུ་ཡིན་ཞེས་བཤད།

རི་བརྒལ་གྲོང་སྡེ་ཨུ་ལྷན་གྱི་ཀྲུའུ་རེན་གཞོན་པ་ལེང་ཀྲི་ལན་གྱིས་ཆུ་ལོག་གི་གནོད་འཚེའི་ཁྲོད་ལི་ཁྲེང་ཡུས་ཀྱི་ཨ་མའི་ཚེ་སྲོག་ཤོར་སོང་། འོན་ཀྱང་ཁོང་གིས་རང་ཉིད་ཀྱི་གཉེན་ཉེར་ལྟ་རྟོག་མ་བྱས་པར་ང་ཚོ་དང་མཉམ་དུ་ཡུལ་དངོས་དང་། བཀོད་སྒྲིག་བྱ་ཡུལ། ཞིང་དུད་བཅས་སུ་ཉེན་སེལ་རྒུད་སྐྱོབ་བྱེད་པར་བསྐྱོད་པ་དེ་ནི་ང་ཚོས་སློབ་སྦྱོང་བྱེད་འོས་པའི་མིག་དཔེ་བཟང་པོ་ཞིག་རེད་ཅེས་བསྔགས་བརྗོད་བྱས།

ལི་ཁྲེང་ཡུས་ཀྱིས་བྱ་སྤྱོད་དངོས་ཀྱི་ཐོག་ནས་གང་ཞིག་ནི་འགན་འཁྲི་ཡིན་པ་དང་གང་ཞིག་ནི་སྒེར་སེམས་མེད་པའི་ཐ་སྙད་དག་ལ་འགྲེལ་བཤད་གསལ་བོ་ཞིག་བརྒྱབ་ཡོད། གནོད་འཚེའི་མདུན་དུ་ཁོང་ནི་རི་བརྒལ་གྲོང་སྡེའི་རེ་བའི་འོད་ཟེར་ལྟ་བུ་ཡིན་ཞིང་། ཁོང་གིས་ཡུལ་མི་ཚང་མའི་སྣེ་ཁྲིད་དེ་བསྐྱར་སྐྲུན་དང་གསར་སྐྱེས་ཀྱི་ལམ་བུར་བསྐྱོད་པ་རེད།།

( ཀུན་དགའ་བསམ་གཏན་གྱིས་བསྒྱུར།)