ཤི་གསོན་ལས་སྐོས་ཀྱི་མི་ཁ་རྒོད་པོ་ཡི་ཕྲེང་ལམ་ནས། །
རེ་དོགས་འདུན་མ་ཡི་སྐུད་ལམ་ཕྲན་ཙམ་དུ་མ་ཆད་པར། །
ལུས་ཀྱི་ཕུང་པོ་འདི་ཁྱོད་ཀྱི་གྲིབ་གཟུགས་སུ་མ་འགྱུར་རུང་། །
སེམས་ཀྱི་གསང་བ་འདི་ཡིད་མཐུན་ལྷ་མོ་ཁྱོད་ཕྱོགས་སུ་ཡོད། །
ང་ཡི་ནམ་མཁའ་འདི་སྔོ་མདངས་སྤྲིན་ནག་གིས་བསྒྲིབས་ན་ཡང་། །
ཡིད་ཀྱི་དྲན་ཤིང་གི་ཉི་མའི་འོད་ཟེར་དེ་འགོག་དཀའ་བས། །
ནམ་རྒྱུན་འཚོ་གནས་ཀྱི་དྲན་པས་གཡུ་ལོ་ཁྱོད་མ་བརྗེད་པར། །
གསལ་གསལ་ཟླ་དཀར་ལྟར་བདག་སེམས་མཚོ་མོ་ཡི་ནང་དུ་འཆར། །
ལས་དབང་ཁ་ནག་གིས་ཕྱི་ཚུལ་རྒྱང་རིང་དུ་བསྐལ་ཡང་ཆོག །
དམར་སེར་གོས་ཅན་གྱི་མཆོད་ཡུལ་སྐྱབས་གནས་སུ་བྱས་ཀྱང་རུང་། །
ཁྲ་ཆུང་མིག་མདུན་དུ་མཉམ་བཞག་སྟོན་སྐུ་དེ་བཤམས་ནས་ནི། །
སྒོམ་པས་འཇིག་རྟེན་དུ་མ་སྒོམ་སེམས་སོང་གི་ཞལ་རས་ཤར། །
མ་བརྟག་འཁོར་བ་ཡི་དགའ་སྐྱོའི་ཀྱོག་ལམ་དུ་ཉུལ་བ་ནས། །
མཛད་མེད་ཟད་མེད་དུ་མཛའ་མོའི་གཟུགས་རིས་ལ་ཆགས་པ་དེ། །
ཤོག་ངོས་སྟོང་ཕྲག་ལ་སྨྱུ་གུའི་རྩེ་མོ་ཡིས་བརྒལ་ནའང་རུང་། །
ཕ་རོལ་འཚོ་བ་ལ་གཞི་ནས་རྙེད་པ་དེ་མེད་དུ་སོང་། །
སེམས་སོང་ལྷ་མོ་ཁྱོད་བདག་ཡིད་པད་དཀར་དུ་སྙལ་བ་ནས། །
གངས་དཀར་རི་བོ་བཞིན་དམ་བཅའ་བརྟན་པོ་དེ་མ་འགྱུར་པར། །
བདག་ཡིད་ཁྱོད་རྗེས་སུ་གཟུགས་ཀྱི་གྲིབ་མའི་ཚུལ་འགྲོགས་ནས་ཡོད།།
མངར་སྐྱུར་འཁོར་བ་ནས་རྒྱལ་པོ་རཱ་མ་ལྟར་འགྲོགས་ན་འདོད།།