རྔ་བ་ཁུལ་འབར་ཁམས་གྲོང་ཁྱེར་དང་སྤྱི་ལེ་བདུན་ཙམ་རྒྱང་བའི་སོ་མང་ཆུ་དང་སའི་སོ་ཆུ་གཉིས་ཀྱི་བར་ལ་གནས་པའི་ཅོག་ཙེ་རྒྱལ་པོའི་མཁར་རྫོང་ངམ་རྒྱལ་ས་དང་སའི་སོ་གྲོང་པ་ཡོད།
ཅོག་ཙེ་རྒྱལ་པོ་ཞེས་པ་ནི་རྒྱལ་རོང་རྒྱལ་ཁག་བཅོ་བརྒྱད་ནང་གི་གཅིག་རེད་ལ། རྒྱལ་ས་ཆགས་ས་ནི་ཅོག་ཙེ་དང་འདྲ་བས་མིང་དེ་འདྲ་ཐོགས་པ་དང་། ལ་ལ་ཡིས་རྒྱལ་སའམ་ཡང་ན་རྒྱལ་ཁག་དེ་མཆོག་ཏུ་གྱུར་པའམ་ཡང་རྩེར་གནས་པས་མཆོག་རྩེ་ཞེས་ཀྱང་འབྲི། སྤྱི་ཡི་ཆ་ནས་བོད་རྒྱ་མི་རིགས་གཉིས་ཀྱི་འཛུགས་སྐྲུན་ལྷན་དུ་འབྲེལ་བ་ཞིག་རེད་ལ། དམར་དམག་རྒྱང་སྐྱོད་དུས་སུ། མའོ་ཙེ་ཏུང་དང་ཀྲོའུ་ཨེན་ལའེ། ཀྲང་ཝུན་ཐེན་བཅས་མགོ་ཁྲིད་རྣམས་བཞུགས་མྱོང་བའི་ས་ཆ་ཞིག་ཡིན་ལ། རྩོམ་པ་པོ་གྲགས་ཅན་ཨ་ལེགས་ཀྱི་བརྩམས་སྒྲུང༼ རྡུལ་འཚུབ་དྭངས་སོང༽ ཞེས་པ་གློག་བརྙན་དུ་ཕབ་སའང་རེད། གནས་འདི་ན་རྒྱལ་རོང་རྒྱལ་ཁག་བཅོ་བརྒྱད་ཀྱི་ལོ་རྒྱུས་མདོར་བསྡུས་ཙམ་དང་སྐབས་དེ་དུས་ཀྱི་ལོ་རྒྱུས་རིག་གནས་དང་འཚོ་བ་དཔལ་འབྱོར་སོགས་ལ་རྒྱུས་ལོན་བྱེད་ས་ཡག་པོ་ཞིག་རེད།
མཁར་རྫོང་གི་ཁ་གཏད་དུ་སའི་སོ་གྲོང་པ་ཆགས་ཡོད་ལ། སའི་སོ་ཞེས་པ་ནི་སྐབས་དེ་དུས་རྒྱལ་པོའི་མངའ་ཁོངས་ནང་སོ་ལྟ་བྱེད་མཁན་ཡིན་པས་མིང་དེ་ལྟར་ཐོགས་པ་རེད་འདུག། གོང་རིམ་གྱི་ཐུགས་ཁུར་དང་རྒྱབ་སྐྱོར་ལ་བརྟེན་ནས་སའི་སོ་གྲོང་པ་ནི་དེང་སང་ཡུལ་སྐོར་གྲོང་པ་ཞིག་ལ་ཆགས་ཏེ། རྒྱལ་རོང་གི་ཐགས་བཏགས་དང་འཚེམ་དྲུབ་སོགས་གཟུགས་མེད་རིག་གནས་ཤུལ་བཞག་བརྒྱུད་འཛིན་དང་། ཞིང་པའི་ཁྱད་ཆོས་ལྡན་པའི་གླིང་ག་སོགས་ཡུལ་སྐོར་ལས་རིགས་དར་སྤེལ་བཏང་བར་བརྟེན། མང་ཚོགས་ཀྱི་འཚོ་བ་ཉིན་རེ་ལས་ཉིན་རེར་ཡར་རྒྱས་འགྲོ་བཞིན་འདུག། གྲོང་པ་འདི་ནི་རྒྱལ་རོང་གི་ཁང་པའི་ཁྱད་ཆོས་དང་ཡུལ་སྲོལ་གོམས་གཤིས་སོགས་ལ་རྒྱུས་ལོན་བྱེད་ས་མ་ནོར་བ་ཞིག་རེད།།
（ བཀྲ་ཤིས་དང་མཁས་གྲུབ་ཀྱིས་བྲིས་ཤིང་པར་བླངས།）