ཉེ་ཆར། མཚོ་འཕགས3680ཡོད་པའི་ལི་ཐང་རྫོང་ཚོ་གསུམ་ཡུལ་ཤོག་གི་མུའུ3000ཅན་གྱི་རྩྭ་སོན་རྟེན་གཞིའི་ལས་མི་ཚོས་རྩྭ་བསྡུའི་དུས་ཚོད་དམ་འཛིན་བྱས་ནས་ལས་ལ་བྲེལ་བའི་རྣམ་པས་ཡོངས་སུ་ཁེངས་ཤིང་། གདོང་ལ་ལོ་ལེགས་ཀྱི་འཛུམ་མདངས་རབ་ཏུ་རྒྱས།

རྫོང་ནགས་ཚལ་རྩྭ་ཐང་ཅུས་ཀྱི་ཅུས་ཀྲང་གཞོན་པ་སུན་ཁྲེང་ཝུའེ་ཡིས་ངོ་སྤྲོད་བྱས་པར་གཞིགས་ན། སྔོན་མར་རྩྭ་ས་དེ་ནི་ཉམས་ཞན་ཅན་ཞིག་ཡིན་པས། 2019ལོར་ལི་ཐང་རྫོང་གིས་སི་ཁྲོན་ཞིང་ཆེན་ཙུང་ཡུས་སྐྱེ་ཁམས་སྲུང་སྐྱོང་ཚད་ཡོད་སྤྱི་གཉེར་ཁང་གིས་མུའུ200ལ་ཚོད་ལྟ་འདེབས་འཛུགས་བྱས་པའི་སྤུས་ལེགས་རྩྭ་སོན་ནང་འདྲེན་བྱས་ཏེ། རྩྭ་སའི་སྐྱེ་ཁམས་སླར་གསོའི་ལས་དོན་ཁྲོད་རྩྭ་སོན་མི་འདང་བའི་གནད་དོན་ཐག་བཅད་བྱས་པ་རེད།

2020ལོར་ཚོ་གསུམ་ཡུལ་ཤོག་ལ་ཕྱོགས་སྡུད་ཡུག་སྦྲེལ་གྱི་རྩྭ་ས་མུའུ3000གི་རྩྭ་སོན་རྟེན་གཞི་བསྐྲུན་ནས་ཐན་པ་དང་གྲང་ངར་འགོག་ནུས་ཤིང་། མཐོ་སྒང་དུ་སྐྱེ་ཐུབ་པའི་རྩྭ་སོན་འདེབས་འཛུགས་བྱས་ཏེ། སྤུས་ལེགས་ཅན་གྱི་རྩྭ་སོན་འདེབས་གསོ་དང་ཁྱབ་གདལ་བཏང་ནས་རྩྭ་ས་ཇེ་ལེགས་དང་འབྲོག་པའི་གཟན་རྩྭ་ཐོན་སྐྱེད་ཀྱི་ཕན་འབྲས་ཆེ་རུ་གཏང་རྒྱུ་རེད།

ད་སྔའི་བར་ཡུལ་སྡེའི་རྩྭ་སོན་རྟེན་གཞི་རྒྱ་ཁྱོན་མུའུ3000བསྐྲུན་ཡོད་དེ། 2023ལོར་ཉེ་འགྲམ་གྱི་ཉག་ཆུ་རྫོང་ལ་གཟན་རྩྭ་ཏུན200ལྷག་བཙོངས་ཡོད། རྟེན་གཞི་བསྐྲུན་རྗེས་ས་གནས་དེ་གའི་ཞིང་འབྲོག་མང་ཚོགས་ཀྱི་ལས་ཞུགས་གོ་སྐབས་དང་ཡོང་འབབ་བཅས་ཀྱི་ཐད་ལ་ཕན་པ་ཆེན་པོ་ཐོབ་ཡོད།།

（ཡེ་ཤེས་ཀྱིས་བསྒྱུར།）