དབྱར་གཞུང་འཇའ་ཡི་མཚོན་རིས། །
ག་ལེར་མཐོངས་ནས་ཡལ་དུས། །
དབེན་པའི་སྒོམ་ཆེན་དེ་ལ། །
མི་རྟག་བརྡ་རུ་ཤར་སོང་། །
སྣ་ཚོགས་མེ་ཏོག་འདབ་མ། །
སད་དང་སེར་བས་ཁྱེར་དུས། །
སེམས་ཆུང་བུང་བ་གཞོན་ནུའི། །
འཚོ་སའི་གནས་མལ་བོར་འདུག །
ཚང་ཚིང་ལྗོན་པའི་ལོ་མ། །
རིམ་བཞིན་ས་ལ་ལྷུང་དུས། །
གསུང་སྙན་ཁུ་བྱུག་སྔོན་མོའི། །
མི་ཟུང་རྒྱང་དུ་གཏད་སོང་། །
གཡུ་མདོག་སྤང་གི་ཁྱོན་ནས། །
ལྗོན་འདབ་རླུང་གིས་ཁྱེར་དུས། །
བས་མཐའི་ཨ་ཇོ་ངར་ཡང་། །
ངེས་འབྱུང་ཞིག་གིས་བསྐུལ་སོང་། །
ལྗང་མདོག་རི་ལུང་ཐང་གསུམ། །
སྟོན་ཁའི་སད་ཀྱིས་གཞོམ་དུས། །
དགུན་ཟླ་རིང་མོའི་གྲང་རླུང་། །
སེམས་ཀྱི་དབུས་ནས་ལྡང་བྱུང་། །
འབྲོག་པའི་གཡང་གི་ནོར་ལུག །
ལྷས་ཀྱི་རྡང་དུ་མི་འཁོད། །
རི་རྫི་མོ་གཞོན་དག་གི །
ངལ་བ་སུས་ཀྱང་མི་ཚོར། །
རོང་པའི་ཞིང་གི་མཐའ་ནས། །
འཕྲུལ་དང་ཕོ་གཞོན་དག་གིས། །
རྔུལ་ཆུ་ཐོད་ལ་བཀོད་ཀྱང་། །
ལོ་ལེགས་རྫོགས་ས་མི་འདུག །
གཡག་རྒོད་རྭ་རྩལ་འགྲན་ཏེ། །
ནོར་ལུག་ཤ་ཤེད་རྒྱས་ནས། །
སྟོན་ས་ཕྱུགས་ཀྱིས་གང་བའི། །
ཚུལ་དེ་རྨད་དུ་བྱུང་བ། །
༼ དབྱངས་ཀྱི་རྒྱན། ༽