གློ་རྡེག་ནམ་ཟླ་སྟོན་གྱི་མཇུག་ཏུ་བསླེབས།།
ཕྲ་ཚོམ་མེ་ཏོག་དག་གི་མཛེས་སྡུག་ཉམས།།
འཇའ་གུར་འོད་ཀྱི་སྡུ་གུ་རྒྱང་དུ་ཡལ།།
ཚུལ་འདིས་མི་རྟག་དུས་ཀྱི་རྒུད་པ་མཐོང་།།
དོ་ཞག་གནམ་ས་བར་གྱི་རླུང་བུ་ངུ་།།
གངས་ཆར་འདྲེས་མའི་ངར་ཁ་ཤིན་ཏུ་བཙན།།
རི་ཚོགས་གདོང་ལ་སེར་ཁ་རེ་ཡང་ལྷུང་།།
སྨུག་སྤྲིན་ཡོལ་བ་རྒྱང་ནས་རྒྱང་དུ་འཐེན།།
ལམ་གྱི་གཡས་གཡོན་སྲང་གི་བཞི་མདོ་ནས།།
ཡར་མར་རྒྱུ་བའི་མི་ཚོགས་གྲང་འདར་རྒྱག།
དེ་ལྟ་ན་ཡང་འཚོ་བའི་རྒྱགས་ཕྱེའི་ཆེད།།
ཉིན་མཚན་བསྟུད་མར་ལས་ལ་བྲེལ་གྱིན་ཡོད།།
ད་སྐབས་ས་སྲོད་ཆར་པའི་རེག་བྱ་རྩུབ།།
གདོང་གི་མཐིལ་དུ་འབབ་པ་སྙིང་དུ་གཟན།།
གཙང་འགྲམ་ལྕང་མའི་འགོ་བོ་མར་མར་དུད།།
ལོ་འདབ་རེ་རེ་མི་འདོད་ས་རུ་ཟགས།།
དགོང་ཞོགས་བར་དུ་རེས་གསལ་རེས་མོག་གི།
ཉི་འོད་འཛུམ་ཙམ་སྨྲེང་ཙམ་འཕྲོ་བར་བྱེད།།
ཕ་གའི་ཆུ་བོ་ཆབ་རོམ་དར་གྱིས་གཡོགས།།
ནང་གི་སྙིང་ཤ་འཁྱག་སོབ་སོབ་ཏུ་ལོག།
འཆར་ཡན་རྟ་ཁྱུའི་རྨིག་སྒྲ་ལྷགས་པས་བཟུང་།།
ལན་ཆགས་སྒྱུ་མའི་ཕུང་པོ་གྲོང་དུ་ལུས།།
གང་ལ་བལྟས་ཀྱང་ཉམས་སྣང་དབེན་པ་ཡི།།
ནམ་ཟླ་འདི་ནས་ཡང་སྙིང་ཅི་ཞིག་འཚོལ།།
༼ འཇོ་མདའ་པདྨ། ༽