འཚོ་བའི་མེ་ལོང་ཕྱི་ནང་གསལ། །
ལས་ཀྱི་ཚོར་བྱུང་བརྩེ་བས་རུམ། །
དུས་ཆད་ནང་གི་ལན་ཆགས་རེ། །
སེམས་ཀྱི་དབུས་སུ་འཚང་ཁ་གཤིབ། །
ནམ་ཟླའི་གཞུང་དུ་རྨི་ལམ་ཉར། །
ལས་དང་མཐུན་པའི་འཚོ་བ་རོལ། །
སྟོན་ཁའི་མཛེས་པ་ཇི་བཞིན་དུ། །
རང་ཉིད་ཆེད་དུ་ན་ཚོད་སོན། །
སྨུག་པའི་མདངས་ལ་ཆར་སྤྲིན་འདྲེས། །
ལྗོན་ཤིང་རྣམས་ཀྱི་འཛུམ་པ་ཡག །
རང་བྱུང་ཉམས་འགྱུར་འདི་འདྲ་བ། །
ནམ་ཟླ་སྟོན་ཁ་རིང་ནས་མཐོང་། །
སྒྱུ་འཕྲུལ་ཚོགས་སུ་བཏབ་འདྲ་བ། །
མཚན་མོ་གཞུང་གི་འཆར་ཡན་སྙམ། །
བསམ་གྱིན་བསམ་པའི་མཛེས་པ་ལ། །
ཡིད་འོང་བརྒྱ་ཡིས་འགྲན་དུས་མེད། །
མ་བཅོས་ལྷོད་ཆགས་ངོམས་མེད་པ། །
རང་བྱུང་མཚར་སྡུག་རྒྱན་གྱིས་སྤུད། །
ཚོར་བྱུང་འདྲེན་པའི་དུས་ཚོད་ལས། །
སྟོན་ཁའི་མཛེས་ལྗོངས་ལྟ་ན་སྡུག །
ལྷགས་རླུང་ཞིག་གིས་དབུ་ཁྱུད་བགྱིད། །
སེར་མདོག་གོན་པ་མཛེས་པའི་ཡུལ། །
ནམ་ཟླའི་འགྱུར་བ་ཤིན་ཏུ་སྐྱེན། །
སྟོན་ཁ་སེམས་ཀྱི་འཁྲིས་སུ་གཅར། །
ཐོལ་བྱུང་སྤུད་པའི་ཚོར་སྣང་ཡོངས། །
ཡིད་འོང་བསམ་པ་ངང་གིས་འདྲེན། །
བཅོས་མིན་རང་བྱུང་མཛེས་སྡུག་ཆགས། །
དུས་ཀྱིས་གཏོང་བ་སེམས་ཀྱིས་བསུ། །
༼ ཁམས་འོད་གསལ། ༽