བརྗོད་མེད་ཆོས་དབྱིངས་ནམ་མཁའ་ཡངས་པོ་རུ། །
གཉིས་སྣང་འཁྲུལ་པའི་སྨག་གིས་མ་བཟུང་ཞིང་། །
མ་ལུས་ཤེས་བྱའི་གནས་ཀྱི་ཆོས་སོ་ཅོག །
མཁྱེན་པའི་རང་རྩལ་རྫོགས་ཁྱོད་སྤྲོ་ཞིང་འདུད། །
སྲིད་དང་ཞི་བར་མི་གནས་ཡང་དག་སར། །
བདེ་སྟོང་སྒྱུ་འཕྲུལ་དྲྭ་བའི་རོལ་རྩེད་མངོན། །
གཉུག་མའི་བདེ་བའི་ལང་ཚོ་རྩལ་རྫོགས་པ། །
ཕན་བདེའི་བང་མཛོད་དཔལ་མོ་ཁྱོད་ལ་འདུད། །
ཆགས་སྡང་ཚོན་རྩིའི་འཇའ་འོད་དྲ་བ་ནས། །
ཕལ་ཆེར་སྣང་བ་འདུས་བྱས་ཆོས་ཀྱིས་རྫོགས། །
འཕོ་མེད་བདེ་ཆེན་གཏེར་གྱུར་དབྱངས་ཅན་མ། །
ལན་གཅིག་དྲན་པའི་བསོད་ནམས་འཛད་པ་མེད། །
གཟུང་འཛིན་ཀུན་རྟོག་གཡོ་བའི་འདིར་སྣང་ནས། །
ནམ་ཞིག་དབུགས་ཀྱི་དབྱིན་རྔུབ་ཆད་པའི་རྗེས། །
དེ་ཚེ་རང་རིག་གདོད་མའི་དབྱངས་ཅན་མའི། །
དགྱེས་འཛུམ་ཟླ་བ་སླར་མཇལ་མི་ཤེས་པས། །
དད་འདུན་སྤྲིན་པ་ཕང་ཕུང་གཡོ་དུས་འདིར། །
བདག་ཡིད་པདྨའི་དགའ་ཚལ་ཕེབས་ནས་སུ། །
རྣམ་རྟོག་སྣང་བའི་དུད་ཀ་ཡོངས་བཅད་དེ། །
བདག་དང་ཁྱོད་ཉིད་འདུ་འབྲལ་མེད་ཐོབ་ཤོག །
༼ ཚོར་སྦྲང་། ༽