ཁ་བའི་མེ་ཏོག་རི་ཡི་ཐོད་དུ་བཞད། །
སྨུག་སྤྲིན་བན་བུན་ལ་ཁའི་མགུལ་དུ་དཀྲིས། །
གངས་ཆར་ཟེགས་མ་ས་ཆེན་པང་དུ་འཁྲུངས། །
འཛིན་མའི་ཞལ་རས་དམར་སེར་ཚོན་གྱིས་མཛེས། །
རྒྱང་རིང་མོན་གྱི་སྙན་པའི་འཇོ་སྒེག་མཁན། །
ཚངས་དབྱངས་གསུང་གི་ཡིད་འཕྲོག་མ་
བཞུགས་ཀྱང་། །
ཆར་ཆུ་ཟེགས་མས་ས་གཞི་བརླན་དང་ལྷན། །
གཡུ་འབྲུག་ངར་སྐད་རྣ་བའི་བུ་གར་སིམ། །
དམར་སེར་འདབ་ཀྱང་རླུང་གིས་ཕྱོགས་བཞིར་གཡོ། །
འཛིན་མའི་རང་མདངས་གསེར་གྱི་ལོ་མས་ཁེབས། །
ས་ཆེན་ཡངས་མོར་དལ་གྱིས་ཁ་བས་མཛེས། །
དབྱར་གསུམ་སྟོན་མོ་རེ་བའི་ཀློང་དུ་ཡིབ། །
སྣ་ཚོགས་སྟོན་མོའི་ལྷ་ཡུལ་འགྲན་ཡང་ཆོག །
ཡིད་འོང་བསྡུས་གཟུགས་དབྱར་གྱི་དགའ་ཚལ་དེ། །
མི་འདུག་མགྲོན་བཞིན་དུས་ཀྱི་རྗེས་བསྙེགས་ཀྱང་། །
ད་དུང་མ་སྐྱོ་སྟོན་མཇུག་ཡིད་གར་འོང་། །
༼ རང་མདངས། ༽