（ པར་ངོས་དང་པོར་མཐུད།） དཔུང་སྡེའི་འཕེལ་རྒྱས་ཀྱི་ལོ་རྒྱུས་ལམ་བུ་དང་དུས་རབས་གསར་པའི་ཕྱོགས་ཡོངས་འཛུགས་སྐྱོང་མངོན་པའི་འགྲེམས་པང་གི་མདུན་དུ་ཞི་ཅིན་ཕིང་གིས་དཔོན་དམག་ཚོས་ཏང་གི་གསར་གཏོད་རིགས་པའི་གཞུང་ལུགས་སློབ་སྦྱོང་དང་། དམག་སྦྱོང་དམག་གྲབས་ལ་དམ་འཛིན་ནན་པོ། སྲོལ་རྒྱུན་བཟང་པོ་དར་སྤེལ་གཏོང་བ་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་བ་རེད།
སྦྱོང་བརྡར་བྱ་ཡུལ་དུ། འཕུར་མདེལ་གྲལ་འགྲིག་པོར་བསྒྲིགས་ཡོད། འདི་ནི་ལུའེ་ཤོག་དེའི་གསར་དུ་བརྗེས་པའི་དམག་འཐབ་གཙོ་བོའི་གོ་མཚོན་སྒྲིག་ཆས་རེད། ཞི་ཅིན་ཕིང་འདི་གར་ཕེབས་ནས་གོ་མཚོན་སྒྲིག་ཆས་ཀྱི་ལག་རྩལ་དང་འཐབ་ནུས་ཀྱི་ངོ་སྤྲོད་གསན་པ་དང་འབྲེལ། དཔོན་དམག་གི་བཀོལ་སྤྱོད་སྦྱོང་བརྡར་གནས་ཚུལ་ལ་གཟིགས་ཞིབ་གནང་བ་རེད། དཔོན་དམག་གི་བཀོལ་སྤྱོད་བྱང་ཆུབ་པ་དང་། སྦྱོང་བརྡར་ཡག་པོ་ཐེབས་པ། ངར་ཤུགས་ཆེ་བ་བཅས་ཡོད་པ་གཟིགས་སྐབས་ཞི་ཅིན་ཕིང་དགྱེས་ཚོར་ཆེན་པོ་བྱུང་བ་རེད། ཁོང་གིས་དཔོན་དམག་དང་ལྷན་བཞུགས་དྲན་རྟེན་སྐུ་པར་བསྐྱོན་ནས་ཚང་མར་སྙིང་རུས་ཆེན་པོས་སྦྱོང་བརྡར་དང་། ཚན་རིག་དང་མཐུན་པའི་སྦྱོང་བརྡར། བདེ་འཇགས་ལྡན་པའི་སྦྱོང་བརྡར་བཅས་བྱས་ནས་ལག་ནང་གི་གོ་མཚོན་བཀོལ་སྤྱོད་བྱང་ཆུབ་པ་དང་ཡག་པོ་སྤྱད་དེ། ཏང་དང་མི་དམངས་ཀྱི་མངགས་བཅོལ་ཟབ་མོ་ཆུད་ཟོས་སུ་གཏོང་རྒྱུ་མེད་པའི་སྐུལ་ལྕག་གནང་བ་རེད།
དེ་རྗེས། ཞི་ཅིན་ཕིང་གིས་ལུའེ་ཤོག་དེའི་ལས་དོན་སྙན་སེང་གསན་པ་དང་འབྲེལ་གསུང་བཤད་གལ་ཆེན་ཡང་གནང་ཞིང་། ཁོང་གིས། ཀྲུང་དབྱང་དམག་ཨུའི་ཆབ་སྲིད་ལས་དོན་ཚོགས་འདུའི་དགོངས་དོན་དཔུང་སྡེར་དོན་འཁྱོལ་ཐུབ་པ་དང་ཕན་འབྲས་ཐོན་པར་སྐུལ་འདེད་བཏང་ནས། རིམ་པ་འདི་གའི་ཏང་ཨུ་དང་འགོ་ཁྲིད་ལས་བྱེད་པ་འབུར་དུ་ཐོན་པ་དང་། དཔུང་སྡེའི་དོན་དངོས་དང་ཟུང་འབྲེལ་དམ་ཟབ། ཆབ་སྲིད་སྦྱོང་སྒྲིག་རྒྱུན་མཐུད་གཏིང་ཟབ་ཏུ་གཏོང་བ་བཅས་བྱས་ཏེ་ཆབ་སྲིད་ལ་བརྟེན་ནས་དམག་དཔུང་འཛུགས་སྐྱོང་བྱེད་པའི་ལས་དོན་ཁག་ལ་དམ་འཛིན་ཏན་ཏིག་དང་ཡག་པོ་བྱེད་དགོས། ཏང་གིས་དམག་དཔུང་ལ་འགོ་ཁྲིད་གཙང་བཙན་བྱ་རྒྱུ་མཐའ་འཁྱོངས་དང་། ཏང་གི་གསར་གཏོད་རིགས་པའི་གཞུང་ལུགས་ཀྱིས་དྲག་ཆས་སྤྲོས་ཤུགས་ཆེ་རུ་གཏོང་བ། འཕེན་སྒྲོམ་འོག་ཏུ་བསམ་བློ་ཆབ་སྲིད་ཀྱི་ལས་དོན་ཡག་པོ་སྒྲུབ་པ་བཅས་བྱས་ནས། དམག་དཔུང་གིས་དུས་དང་གནས་ཚུལ་གང་རུང་འོག་ཏང་ཀྲུང་དབྱང་དང་ཀྲུང་དབྱང་དམག་ཨུའི་བཀོད་འདོམས་ལ་མཐའ་གཅིག་ཏུ་ཉན་པར་འགན་ལེན་བྱེད་དགོས། དམངས་གཙོ་གཅིག་སྡུད་ལམ་ལུགས་དོན་འཁྱོལ་ནན་པོ་བྱས་ནས་ཏང་ནང་ཁུལ་གྱི་ཆབ་སྲིད་འཚོ་བ་ནན་དུ་བཏང་སྟེ་ལུའེ་ཤོག་ཏང་ཨུའི་འགོ་ཁྲིད་ནུས་པ་དང་། སྒྲིག་འཛུགས་ནུས་པ། ལག་ལེན་བསྟར་ནུས་བཅས་ཆེ་རུ་གཏོང་དགོས། གཞི་རིམ་ཏང་རྩ་འཛུགས་འཛུགས་སྐྱོང་ལ་ཤུགས་བརྒྱབ་ནས་རྩ་འཛིན་གཞིར་བཟུང་འཛུགས་སྐྱོང་ལ་དམ་འཛིན་དང་དཔོན་དམག་གི་སྣེ་ཁྲིད་དེ་ལས་འགན་སྒྲུབ་ནུས་ཆེ་རུ་བཏང་སྟེ་དཔུང་སྡེ་འཛུགས་སྐྱོང་དང་འཐབ་ནུས་ཀྱི་རྨང་གཞི་བརྟན་དུ་གཏོང་དགོས། བསམ་བློའི་རྩ་བའི་གནད་དོན་ལ་དམ་འཛིན་གྱིས་གྲོས་བསྡུར་དཔྱད་ཞིབ་བྱེད་ཤུགས་ཆེ་རུ་བཏང་སྟེ་དཔོན་དམག་ཉེ་འགྲམ་གྱི་རུལ་སུངས་ཀྱི་གནད་དོན་དང་ཚུལ་མིན་སྤྱོད་ཚུལ་ལ་ཞིབ་བཤེར་ཐག་གཅོད་ནན་པོ་བྱེད་དགོས། རིམ་ཁག་ཏང་ཨུ་དང་ལས་ཁུངས་ཀྱིས་ལས་ཀར་མཛུབ་ཁྲིད་བྱེད་སྟངས་ལེགས་སུ་བཏང་ནས་སྤྱི་འདོམས་མཐུན་སྦྱོར་ཡག་པོ་བྱེད་པ་དང་། “མང་བ་ལྔའི”གནད་དོན་རྒྱུན་མཐུད་ཐག་གཅོད་ཀྱིས་གཞི་རིམ་གྱི་ཁུར་པོ་ཡང་དུ་གཏོང་བ། ལྷག་བསམ་རྣམ་དག་གིས་དཔོན་དམག་གི་སེམས་ཁྲལ་དང་དཀའ་ངལ་སེལ་བ་བཅས་བྱས་ཏེ། ལས་སྒྲུབ་ལས་གཏོད་ཀྱི་སྒུལ་ཤུགས་དང་གསོན་ཤུགས་འཕེལ་བར་བྱེད་དགོས་པའི་ནན་གསུང་གནང་བ་རེད།
ཞི་ཅིན་ཕིང་གིས་ནན་གསུང་གནང་དོན། སེམས་ཁྲལ་གྱི་འདུ་ཤེས་དང་། ཉེན་ཁའི་འདུ་ཤེས། དམག་རྒྱག་གི་འདུ་ཤེས་བཅས་ཟབ་ཏུ་བཏང་ནས་དམག་སྦྱོང་དམག་གྲབས་ལ་ཕྱོགས་ཡོངས་ནས་ཤུགས་རྒྱག་པ་དང་། དམག་དཔུང་གི་དམག་འཐབ་ནུས་པ་ཆེ་རུ་ཏན་ཏིག་བཏང་སྟེ་རྒྱལ་ཁབ་ཀྱི་འཐབ་ཇུས་བདེ་འཇགས་དང་ལྟེ་བའི་ཁེ་ཕན་ལ་སྲུང་སྐྱོང་ནུས་ལྡན་བྱེད་དགོས། དེང་རབས་དམག་འཁྲུག་གི་རྣམ་པ་དང་དམག་རྒྱག་སྟངས་ཀྱི་འགྱུར་ལྡོག་དང་འཚམ་པར་བྱས་ནས་དམག་འཐབ་ལས་འགན་དང་། དམག་འཐབ་འགྲན་ཡ། དམག་འཐབ་ཁོར་ཡུག་བཅས་དང་དམ་པོར་བསྟུན་པ་དང་། དམིགས་སའི་རང་བཞིན་ལྡན་པའི་ངང་སྒྲིག་ཆས་གསར་པ་དང་། རྩལ་ནུས་གསར་པ། དམག་རྒྱག་སྟངས་གསར་པ་བཅས་ཀྱི་སྦྱོང་བརྡར་ལ་ཤུགས་བརྒྱབ་སྟེ་དཔེ་མཚོན་བྱ་སྤྱོད་ལ་ཆེད་སྦྱོང་ཞིབ་སྦྱོང་བྱེད་ཤུགས་ཆེ་རུ་གཏོང་དགོས། ལེ་ལག་ཚང་བའི་འཛུགས་སྐྱོང་ལ་ཤུགས་བརྒྱབ་ནས་མ་ལག་གྲུབ་པ་དང་དངོས་འཐབ་ནུས་པ་ཆགས་པར་བྱེད་དགོས། དོན་དངོས་ལ་གཞི་ཚུགས་ནས་བྱས་རྗེས་ཧུར་ཐག་འཇོག་པ་དང་། འཐབ་ཇུས་སྟོབས་ཤུགས་སྤྱོད་སྟངས་དང་སྒྲིག་འཛུགས་བྱེད་སྟངས་འཚོལ་ཞིབ་གསར་གཏོད་བྱས་ཏེ། ལག་ནང་གི་གོ་མཚོན་གྱི་འཐབ་ཇུས་ནུས་པ་གང་ལེགས་འདོན་དགོས།།
（ མི་དམངས་ཉིན་རེའི་ཚགས་པར་ནས་དྲངས།）