སྟོན་གྱི་ནམ་ཟླ་སྐད་ཅིག་ཚེས་དུས་འདིར།།
ལོ་མ་སེར་ཆེན་སྐྱ་བོར་འགྱུར་བཞིན་དུ།།
མདུན་གྱི་ལམ་ལ་གཅིག་རྗེས་གཉིས་མཐུད་ལྷུང་།།
རླུང་གིས་ཡར་མར་རི་ལུང་གང་སར་འདེད།།
ཁྲུང་ཁྲུང་གཤོག་སྒྲོ་སྦྲེལ་ནས་ལྷོ་རུ་འཕུར།།
ཆད་མེད་སྨྲེང་བ་འདོན་བཞིན་རྒྱང་དུ་བརྩོན།།
བདག་འགྲམ་སྟོང་པར་སྣང་བའི་སྟོན་མཇུག་འདིར།།
སྨྲེང་བའི་ངག་ནས་ཚོར་བའི་དབྱངས་ཤིག་འཐེན།།
བྱད་གཟུགས་མཛེས་པའི་ལོ་མ་སེར་པོ་ཁྱོད།།
མི་སྡོད་གང་སར་སྤུར་བའི་འཁྱམ་པོ་ཞིག།
རང་མདོག་གྱུར་ཏེ་གས་ཆག་ཤོར་བའི་ཚེ།།
ཡུལ་ལུང་སྨྲེང་བའི་འཁུན་སྒྲ་ལན་གཅིག་ཤོར།།
མ་བོས་མགྲོན་དུ་བསླེབས་པའི་དུས་སྟོན་འདིར།།
ལོ་མ་སེར་པོ་ཡལ་བའི་དུས་ཚིགས་མངོན།།
ལན་གཅིག་རྒྱང་ལ་ཡལ་དུ་སོང་ན་ཡང་།།
ལོ་རྗེས་བསྐྱར་དུ་སྐྱེ་བར་སྨོན་པས་ཁེངས།།
ནམ་ཟླ་མི་སྡོད་སྐད་ཅིག་འགྱུར་བ་ཡིས།།
སྟོན་དུས་རྩྭ་དང་ལོ་མ་ཁ་དོག་བརྗེ།།
སྐད་ཅིག་མཛེས་ཀྱང་མི་རྟག་ཆོས་ཉིད་ལས།།
ལོ་མ་སེར་ཆེན་ལས་དབང་རབ་ཏུ་དམན།།
མྱུར་བ་མྱུར་བར་ཐོན་པའི་དུས་ཚིགས་དག།
འཚོ་བའི་ངོ་གདོང་ངོགས་སུ་དགའ་སྡུག་རེས།།
ཡང་དང་ཡང་ནས་མྱོས་པའི་ཚོར་བས་སྦྲིད།།
མི་ཚེ་ལས་དབང་འདི་ཉིད་སྒྱུ་མའི་འཕྲུལ།།
སྟོན་མཇུག་ལོ་མ་སེར་པོ་རླུང་གིས་གཡོ།།
མི་དབང་ཁྱོན་ཡངས་ཐང་དུ་ལན་རེར་ཟགས།།
མགྲོན་གྱི་རྡོག་པས་ས་ལ་བརྫིས་པའི་ཚེ།།
ལོ་མ་སེར་ཆེན་རང་མདོག་ངང་གིས་ཤོར།།
སྟོན་མཇུག་ཚོར་བའི་སྣང་བ་མང་དུ་བྱུང་།།
འཆར་ཡན་སྒོ་ཁྱི་བརྡུངས་པའི་ལམ་ཁ་ནས།།
ལག་གཉིས་སྒུལ་བའི་སྨྱུག་རྩེ་རྣོན་པོ་ཡིས།།
མི་གཅིག་ཚོར་བའི་སྣང་བརྙན་གཟུགས་སུ་བྲིས།།
༼ སྙན་རྐང་གླིང་། ༽