སྟོན་ཟླ་འགོ་མ།
སྡོང་ལོ་དང་རྩྭ་ལྗང་གི་པང་ན།
དུང་དཀར་གྱི་ཕྱེ་མ་འཐོར་བ་ལྟར།
དཀར་སངས་སངས་ཀྱིས་ཆགས་པ་ནི།
སྟོན་གྱི་བ་མོ་རེད།
ཆེས་ཐོག་མའི་ཉི་མའི་དབུ་རྒྱན་ཞིག་བསྣམས་ནས།
ཡུལ་ལུང་འདིར།
ལྟ་མི་བཟོད་པའི་མཛེས་སྡུག་གི་འོད་སྣང་འཕྲོས་བྱུང་།
སྟོན་ཁ།
ཁ་བ་མ་འབབ་པའི་སྔོན་དུ།
གསེར་མདོག་གི་ལོ་མ་ཕོན་པོ་ཞིག།
བསིལ་རླུང་གི་མདུན་དུ་བརྒྱུགས་ནས།
དུངས་སེམས་ཀྱིས་ཁྱོད་ལ་ཡང་ཡང་འཐམས་ཏེ།
སྤྲོ་སྣང་གི་ལྡིང་སྐོར་བྱེད་པ་འདི།
སྟོན་གྱི་ལོ་མ་རེད།
སྟོན་ཁའི་ལྷིང་འཇགས།
ལ་ལུང་ཀུན་སྨུག་པས་ཟིན་དུས།
ཆུ་ཕྲན་གྱི་བཞུར་སྒྲ་ལས་ཅི་ཡང་མི་ཐོས།
སྟོན་ཁ།
མེ་ཏོག་གི་འདབ་མ་ཕྱོགས་སུ་ཐོར་རྗེས།
རྩྭ་སྐྱ་ཡི་སྨྲེང་གླུ་རིང་མོ།
རི་སྒང་གི་ཡང་རྩེ་ནས་གྱེར་བྱུང་།
སྟོན་ཁ།
ཉི་མའི་འོད་སྣང་འཁྱག་སིབ་སིབ།
རླུང་བུའི་རེག་བྱ་གྲང་ལྷང་ལྷང་ཁྲོད།
མི་ཚོགས་ཀྱི་རྦ་རླབས་ཀྱང་དལ་གྱིས་འཇགས་སོང་།
དལ་གྱིས་ཡལ་བའི་སྟོན་ཁ།
གྲང་ངད་ཀྱི་རྣ་དབལ་ཐོགས་པའི་རླུང་བུ་དེས།
སྡོང་པོ་ཞིག་ལ་སེན་འབྲད་བྱས་ཏེ།
ཉག་ཕྲ་བའི་ལོ་མ་དག་སྨིན་རྒྱུན་བཅད་སོང་།
དུས་ཚོད་ཀྱི་སྐར་ཆ་རེ་རེ་ལ།
ལོ་མ་འདི་དག་དལ་གྱིས་མར་ལྷུང་གིན་འདུག།
བྱ་ཁྱུས་གཤོག་པ་བརྐྱངས་ཏེ་ནམ་འཕང་གཅོད་དུས།
ཉི་འོད་ཀྱི་སྐྱོ་འཛུམ་ནུབ་རི་ལ་ཡིབ་དུས།
སྟ་གོན་ཅི་ཡང་མེད་པའི་ལོ་འདབ་མང་པོ་ཞིག།
ཧ་ཅང་བསིལ་བའི་རླུང་བུ་དེས།
རྒྱང་རིང་རྒྱང་རིང་ཞིག་ལ་ཁྱེར་སོང་།
གཞུག་ཏུ།
ཁ་བའི་འདབ་མ་ཡང་དལ་གྱིས་བཞད་བྱུང་།
༼ གློག་འོད། ༽