ད་ལྟ་སྟོན་ཁ་སླེབས་ནས།

རི་ལུང་གང་སར་གསེར་གྱི་ཁུ་བས་བྲན་པ་བཞིན་སེར་ཁྱུག་གེར་གྱུར་འདུག

ལྗང་མདོག་ལྡན་པའི་དབྱར་ཀ་བཞུད་པ་ཅི་འདྲའི་མགྱོགས་པ་ལ།

ད་ནི་སྟོན་ཁའང་དེ་འདྲའི་མི་རིང་བར་ང་དང་ཁ་བྲལ་རན་འདུག།

དུས་ཚིགས་རེ་རེས་ང་རང་བསྐྱུར་ནས་འདི་ལྟར་བཞུད་འགྲོ་དུས།

དངོས་གནས་ང་རང་དེ་ཙམ་བག་ཕེབས་ལྷིང་འཇགས་ཤིག་མ་རེད།

ད་ལྟ་ང་རང་ས་མཐར་ཡོད་པ་དང་།

ས་མཐའ་ནས་ས་མཐར་སྙེག་དགོས་པ་འདིའང་།

ལས་ཅི་ཞིག་གི་འཕྲོ་མཐུད་དགོས་པ་ཡིན་ན།

སྐབས་ལ་ལར་རང་ཉིད་ཀྱི་མེ་ལོང་ནི།

མདུན་ཐད་དུ་ཀྲོང་ངེར་འགྲེང་བའི་རི་བོ་དེ་དང་འདྲ་བར།

ཕྱོགས་གཅིག་ནས་ཕ་ཡུལ་དྲན་བཞིན་འདུག་ལ།

ཕྱོགས་གཞན་ནས་ཁེར་རྐྱང་ངང་གསལ་ལ་མི་གསལ་བའི་སྨུག་པས་གོས་འདུག།

ཁེར་རྐྱང་གི་དུས་ཚོད་རེ་རེའི་ནང་།

སེམས་ཀྱི་མེ་ཁ་གསོ་བྱེད་ནི་གཞས་དང་སྙན་ངག་རེད་འདུག།

སྔ་ས་ནས་ཆ་རྒྱུས་ཡོད་པའི་གཞས་ཀྱི་གདངས་དབྱངས་རེ་རེས།

ང་རང་ཞེ་གཏིང་ནས་སྒུལ་གྱིན་འདུག།

ཆ་རྒྱུས་ལྡན་པའི་མི་ཞིག་དང་ཁ་བརྡ་གློད་པ་བཞིན།

བརྒྱུད་མྱོང་བའི་ས་ཆ་འགའ་ཞིག་གི་རྣམ་པ་ཡིད་ལ་འཁོར་དུ་བཅུག།

སྟོན་ཁ་ནི་འབྲེལ་འདྲིས་གཏིང་ཟབ་ཏུ་གྱུར་པའི་མི་ཞིག་ཡིན་ལ།

སྟོན་ཁ་ནི་ཆ་རྒྱུས་གཏན་ནས་མེད་པའི་ས་མཐའ་ཞིག་ཀྱང་ཡིན།

གནས་འདི་ནས་སྟོན་རླུང་བསིལ་བསིལ་དུ་ལྡང་བས།

སེར་ཐིག་ལྷུང་བའི་སྡོང་མགོའི་ལོ་མ་དག་གིས།

ང་རང་ལ་ཕྱོགས་གཅིག་ནས་ཕ་ཡུལ་དྲན་དུ་བཅུག་ལ།

ཕྱོགས་གཞན་ནས་ཁེར་རྐྱང་གི་དུས་ཚོད་ལ་ཁ་བ་གྲ་སྒྲིག་བྱེད་ཀྱིན་འདུག།

༼ དུ་སྤྲིན། ༽