ང་ཡི་ཨ་ཕ། ང་ཡི་དྲིན་ཆེན།
ཁྱོད་མེད་པའི་འཚོ་བའི་འཚོ་བ་འདི་
ཇི་ལྟར་རོལ།
ཁྱོད་མེད་པའི་མུན་པའི་མུན་པ་འདི་ཇི་
ལྟར་བརྒལ།
ཁྱོད་མེད་པའི་ལོ་ཟླའི་ལོ་ཟླ་འདི་
ཇི་ལྟར་བསྐྱལ།
ངའི་སེམས་ཁོང་གི་ཉི་མ་སེར་པོ།
ང་ཡི་ཨ་ཕ། ང་ཡི་དྲིན་ཆེན།
ཁྱོད་བསམ་དབང་དྲན་དབང་མེད་པར།
ངའི་ནམ་མཁའ་ནས་འཇའ་ཚོན་
བཞིན་ཤར་ཅིང་ཡལ་བ་ནི།
རྨི་ལམ་བཞིན་མཛེས་ཤིང་རྨི་ལམ་
བཞིན་འཇིགས།
དེ་བས། ཧ་ཅང་གཏིང་ཟབ་པའི་ན་
ཟུག་གི་ཚོར་བ་དེ།
བཟོད་ཐབས་བྲལ་ལ་བརྗེད་མེད།
ངའི་ལམ་བུ་ལ་འོད་སྣང་སྦྱིན་མཁན།
ང་ཡི་ཨ་ཕ། ང་ཡི་དྲིན་ཆེན།
ནམ་ཡང་འཇིག་རྟེན་འཁོར་བའི་
ནང་ཉུལ་བའི་ཁྱོད།
ནམ་ཡང་ཁྱིམ་ཚང་གི་དོན་ལ་འབད་
པའི་ཁྱོད།
ནམ་ཡང་གནམ་སྔོན་པོ་ཀ་བ་
བཞིན་འདེགས་པའི་ཁྱོད།
ནམ་ཡང་ས་དོག་མོ་རྡོ་བ་བཞིན་གནོན་
པའི་ཁྱོད།
ངའི་བློ་བརྟན་གྱི་རྒྱབ་རི་མཐོན་པོ།
གང་ལྟར་ཀྱང་།
ང་ཡི་ཨ་ཕ། ང་ཡི་དྲིན་ཆེན་ལགས།
ཁྱོད་ནི་དུས་གསུམ་གང་རུང་ནས།
ལུས་དང་གྲིབ་མ་བཞིན་དུ།
ང་ཡི་ཉེ་སར་བཅར་རོགས།