（ 《ཁམས་པའི་འཛུམ་མདངས།》སྤྱིའི་འདོན་ཐེངས་བཞི་བརྒྱ་ཞེ་དགུ་པའི་པར་ངོས་གཉིས་པའི་འཕྲོར་མཐུད།）གཞན་དུ་ན་ཕྱེད་རུལ་བའི་བརྒྱུད་རིམ་དུ་དྲོད་ཚད་ཤིན་ཏུ་མཐོ་བ་དང་། ཁོག་གསེང་དུ་མཁའ་དབུགས་རྒྱུ་པ། ཆུས་མི་འདང་བ་སོགས་གྱུར་ན་ཕྱིའི་རྣམ་པ་ལ་ཁ་དོག་དཀར་པོ་དང་། རྣམ་པ་ཕྱེ་མ། ཐུན་མིན་གྱི་ས་དྲི་བྲོ་བའི་སྐྱ་ལུད་དུ་འགྱུར་སྲིད་ལ། དེ་ནི་ལུད་བཟང་པོ་མ་ཡིན་པས་མྱུར་དུ་སྟེང་འོག་བསློགས་ཤིང་ཆུ་རྒྱག་པ་དང་བཙིར་གནོན་བྱས་ནས་ཚགས་བསྡོམས་པ་སོགས་ཀྱིས་དེའི་ཕྱོགས་སུ་མི་འགྱུར་བར་བྱ་དགོས། སྒོ་ཕྱུགས་ཀྱི་གཅིན་བྲུན་དང་ལྷས་རའི་ལུད་བེད་སྤྱོད་གཏོང་སྐབས་ལ། གཅིན་དང་བྲུན་སོ་སོར་ཕྱེ་ནས་ཉར་ཡོད་ན་གཅིན་པ་ཁ་ལུད་དང་བྲུན་འོག་ལུད་བྱས་ན་བཟང་ལ། རྟ་སྦངས་དང་སྙི་བ་རྣམས་དཔྱིད་ཀར་སྔ་འདེབས་བྱེད་པའི་ས་བོན་དྲོས་བྱེད་ལ་བཀོལ་ཆོག། རུལ་ཐག་ཆད་ཡོད་མེད་ནི་གཅིན་བྲུན་དང་ལྷས་རའི་ལུད་བཟང་ངན་གང་དུ་འགྱུར་པའི་རྒྱུ་རྐྱེན་གཙོ་བོ་ཡིན་ཞིང་། རུལ་ཐག་མ་ཆད་པའི་ལུད་རྣམས་སྐྱེ་ཡུན་རིང་བའི་ལོ་ཏོག་གི་འོག་ལུད་ལས་ཁ་ལུད་སོགས་སུ་སྤྱོད་མི་རུང་ལ།རུལ་ཐག་ཆད་པའི་ལུད་ཡིན་ན་ཕལ་ཆེར་ཕན་ཐོགས་མྱུར་དུ་འབྱུང་བ་ཡིན་པས་འོག་ལུད་དང་ཁ་ལུད་སོགས་གང་བྱས་ནའང་ཆོག། ཞིང་སའི་རྒྱུ་སྤུས་དང་བསྟུན་ན། གཅིན་སྐྱག་དང་ལྷས་རའི་ལུད་རྣམས་ལུད་ཤེད་ཆུང་བའི་ཞིང་ལ་བཀྲམ་པ་དང་། ས་ཚི་ཅན་གྱི་ཞིང་དུ་རུལ་ཐག་ཆད་པའི་ལྷས་རའི་ལུད་བཀྲམ་ཞིང་གཏིང་ཟབ་པོ་མི་རྨོ་བ། བྱེ་ཞིང་ལ་ལུད་སིམ་བདེ་བས་ལྷས་རའི་ལུད་ཅུང་རུལ་མ་ཐུབ་པ་བཀྲམ་སྟེ་ས་གདིང་ཅུང་ཟབ་པར་རྨོས་ན་ལེགས། གཞན་ལྷས་རའི་ལུད་བཀྲམ་མ་ཐག་ཏུ་མྱུར་དུ་རྨོས་ནས་ས་འོག་སྦས་འོས་ཤིང་། ཆ་རྐྱེན་ཡོད་ན་ཆུ་བཀྱེ་ན་ཕན་འབྲས་དེ་ལས་ཆེ་བ་ཡིན།སྤུངས་ལུད་ནི་སོག་ཡུ་དང་། གྲ་ཕུབ། ལོ་འདབ། རྩྭ་ལྡུམ་སྔོན་པོ། གད་སྙིགས་སོགས་རྒྱུ་ཆ་གཙོ་བོ་བྱས་ནས་དེའི་ཐོག་ལ་གཅིན་སྐྱག་དང་ས་ལུད་མང་ཉུང་མི་འདྲ་བ་བསྲེས་ནས་དོང་ངམ་ཐང་དུ་ཕུང་པོར་སྤུངས་ཏེ་བསྙལ་བའི་ལུད་དེ། དེ་ནི་གཙོ་བོ་སོག་ཡུ་དང་གྲ་ཕུབ་རྣམས་ལུད་དུ་བསྒྱུར་བའི་ཐབས་ཤིག་ཡིན། ལུད་དེའི་རིགས་ཀྱི་རྒྱུ་ཆ་ལ་རིགས་མི་འདྲ་བ་གསུམ་དུ་དབྱེ་ཆོག་པ་སྟེ། དང་པོ་ནི་སོག་ཡུ་དང་། ལོ་འདབ། རྩྭ་ལྡུམ་ལྟ་བུ་དབྱེ་ཕྲལ་དཀའ་བའི་རྫས་ཆ་རྣམས་ཏེ། ལུད་ཀྱི་རྒྱུ་ཆ་གཙོ་བོ་དང་། གཉིས་པ་ལ་མི་དང་སྒོ་ཕྱུགས་ཀྱི་གཅིན་སྐྱག་དང་། གཞི་རྒྱུ་ཏན། རྡོ་ཞོ། རྩྭ་ཤིང་གི་གོ་ཐལ་ལྟ་བུ་སོགས་དབྱེ་ཕྲལ་ལ་སྐུལ་འདེད་བྱེད་ནུས་པའི་རྫས་ཆ། གསུམ་པ་ལ་ས་ལུད་དང་ས་འདམ་ལྟ་བུ་སོགས་བསྡུ་ལེན་བྱེད་པའི་ནུས་པ་ཆེ་བའི་རྫས་ཆ་བཅས་རེད།