ཁྱེད་ཀྱིས་བརྩེ་བའི་འོ་ཇ་དཀར་པོ་སྣུམ། །
ང་ཡིས་སྙིང་གཏམ་དྲོན་མོའི་དམ་བཅའ་བརྟན། །
འུ་གཉིས་འཇིག་རྟེན་འཚོ་གཞིས་ལྷན་དུ་བསྐྱལ། །
ལོ་ཟླའི་གཡེར་བག་ཁྲོད་ཀྱི་ཕྱིར་མིག་ཡིན། །
ཁྱེད་ཀྱིས་གསེར་དངུལ་བྱུ་རིའི་ཕྲ་རྒྱན་ཐོགས། །
ང་ཡིས་སྙན་ཚིག་ངག་གི་གའུ་འདོགས། །
འུ་གཉིས་མ་འོངས་འཁོར་བའི་གཞི་མ་ཡིན། །
བདེ་ཆེན་དགའ་བ་ཆེན་པོའི་ཕྱག་བརྒྱ་རོལ། །
ཁྱེད་ཀྱིས་མི་འགྱུར་ཚིག་གི་མནའ་ཚིག་ཞོགས། །
ང་ཡིས་དུང་ཞེན་བརྩེ་བའི་རི་མོ་འགྲེམ། །
འུ་གཉིས་འཇིག་རྟེན་འཁོར་བའི་ཉིན་སྲིབ་ནས། །
ལུས་དང་གྲིབ་མ་བཞིན་དུ་ནམ་ཡང་འགྲོགས། །
ཁྱེད་ཀྱིས་སྨོན་པའི་ཁ་གཡང་རྒྱང་འབོད་བྱོས། །
ང་ཡིས་རེ་བའི་དར་ཆ་མཁའ་ལ་བསྒྲེངས། །
འུ་གཉིས་སྐྱིད་སྡུག་མཉམ་མྱོང་ཡིན་པ་ལ། །
མ་འོངས་བརྩེ་བའི་གཞིས་ཁྱིམ་ནང་ནས་འཛོམས།
ཁྱེད་ཀྱིས་རྒྱང་རིང་ལམ་ནས་ང་རང་བསྒུགས། །
ང་ཡིས་དབྱངས་ཀྱི་ཞིང་ནས་ཁྱེད་རང་སྒུག །
འུ་གཉིས་ཚེ་གཅིག་གཏན་གྲོགས་ཡིན་པ་ལ། །
བརྩེ་བའི་མངར་དྲི་རྨི་ལམ་ཞིང་ནས་མཆེད། །
ཁྱེད་ཀྱིས་དགའ་བདེའི་གསང་བ་ང་ལ་བཤད། །
ང་ཡིས་བརྩེ་བའི་སྙིང་གཏམ་ཁྱེད་ལ་གླེང་། །
འུ་གཉིས་མཉམ་གྲོགས་བྱུང་བའི་ཉིན་དེ་ནས། །
ང་ཡི་སེམས་ཀྱི་མཐའ་ན་ཁྱོད་ལས་མེད། །
ཁྱེད་ཀྱིས་མི་འགྱུར་བརྩེ་བའི་དམ་བཅའ་བཞག །
ང་ཡིས་དུང་བའི་གླུ་ཆུང་ཁྱེད་ལ་ལེན། །
འུ་གཉིས་བརྩེ་བའི་འོ་ཇ་དཀར་པོ་བཏུང་། །
ནམ་ཡང་རེ་སྒུག་གསེང་ན་ཁྱོད་རང་ཡོད། །
འུ་གཉིས་མི་འགྱུར་ཚིག་གིས་དམ་བཅའ་ཡོད། །
འུ་གཉིས་འཚོ་བའི་གཞིས་ཁྱིམ་ལྷན་དུ་བསྐྱལ། །
འུ་གཉིས་རེ་བའི་དར་ཆ་མཁའ་ན་ཡོད། །
འུ་གཉིས་འཛོམས་པ་སྔོན་གྱི་ལས་དབང་ཡིན། །
༼ ཁམས་ཟླ་སྲས། ༽