ཡར་འབྲོག་གཡུ་མཚོ་ནི་བོད་ལྗོངས་ལྷོ་ཁ་གྲོང་ཁྱེར་སྣ་དཀར་རྩེ་རྫོང་གི་མངའ་ཁོངས་སུ་ཡོད་ཅིང་། ལྷ་ས་གྲོང་ཁྱེར་དང་སྤྱི་ལེ100ཙམ་རྒྱང་བའི་མཚོ་འཕགས་སྨི4400ལྷག་གི་སར་ཡོད་པ་རེད། ཡར་འབྲོག་གཡུ་མཚོ་དང་གནམ་མཚོ། མ་ཕམ་གཡུ་མཚོ་བཅས་ལ་བོད་ལྗོངས་ཀྱི་ལྷ་མཚོ་ཆེན་པོ་གསུམ་དུ་འབོད་སྲོལ་ཡོད་ཅིང་། ཡར་འབྲོག་གཡུ་མཚོའི་རང་བྱུང་མཛེས་ལྗོངས་ལྟ་ན་སྡུག་ཅིང་ཡིད་སེམས་དབང་མེད་དུ་འཕྲོག་པས། ལོ་རེར་རྒྱལ་ཁབ་ཕྱི་ནང་གི་གནས་སྐོར་བ་མང་པོ་ཞིག་གནས་དེར་ཕེབས་ནས་གཡུ་མཚོའི་མཛེས་ལྗོངས་ལ་ལྟ་སྐོར་བྱས་དང་བྱེད་བཞིན་ཡོད་པ་རེད།
ཡར་འབྲོག་གཡུ་མཚོ་ནི་རི་བོ་ཧི་མ་ལ་ཡའི་བྱང་ངོས་ཀྱི་སྐམ་སའི་དབུས་ཁུལ་གྱི་མཚེའུ་ཆེ་ཤོས་ཡིན་ཞིང་། ཧ་ལམ་ལོ་ངོ་དུང་ཕྱུར་དུ་མའི་ཡར་སྔོན་དུ་འཁྱགས་རོམ་གྱི་འདམ་རྡོའི་ཆུ་རུད་ཀྱིས་ཆུ་ལམ་བཀག་ནས་གྲུབ་པས་རྣམ་པ་ངེས་གཏན་མིན་པ་དང་། ཁ་དབྲག་མང་ལ། མཚོ་ངོགས་ཀྱག་ཀྱོག་ཆེ་བ། མཚེའུ་དེ་འོད་ཐིག་གི་འགྱུར་ལྡོག་དང་བསྟུན་ཁ་དོག་སྔོན་པོར་གྱུར་པས་མཐོ་ས་ནས་མར་བལྟས་ན་མཐོ་སྒང་དུ་ཐར་ཐོར་དུ་ལྷུང་བའི་གཡང་ཊི་སྔོན་པོ་ཞིག་དང་ཀུན་ནས་མཚུངས།
ཡར་འབྲོག་གཡུ་མཚོ་ནི་དཀྱུས་རིང་ནར་མོའི་དབྱིབས་སུ་གྲུབ་ཅིང་བྱང་ངོས་ཁ་རྒྱ་ཆུང་ལ་ལྷོ་ངོས་ཆུ་ཞེང་ཆེ་བ། མཚོ་མོའི་འཁོར་རྒྱ་ནི་ལེ་དབར་སྟོང་ལ་ཉེ་ཞིང་གཏིང་ཟབ་ཤོས་ལ་སྨི་ལྔ་བཅུ་ང་དགུ་ཡོད་ཅེས་གྲགས་ལ་མཚོ་དཀྱིལ་དུ་གླིང་ཕྲན་གྱིས་ལུང་གཞུང་འགག་སྟབས་འདི་ནང་འབབ་མཚོར་གྱུར་པ་རེད།།
( རྩོམ་སྒྲིག་པས་བསྡུས། )