བྱ་ཁྲུང་ཁྲུང་ལ་རིགས་མང་པོ་ཡོད་པ་ལས་བྱ་ཚེ་རིང་མཚོན་བྱེད་ནི་ཁྲུང་ཁྲུང་གཙུག་དམར་ཅན་དེ་ཡིན། བྱ་འདིའི་སྤྱི་གཙུག་དམར་པོ་དང་། སྒྲོ་དཀར་པོ། མཇུག་མ་ནག་པོ། སྐེ་དང་རྐང་པ་རིང་བ། སྐད་འགྱུར་སྙན་པོ་ཅན་ཞིག་ཡིན། བྱ་ཐམས་ཅད་ལས་གཟུགས་མཛེས་ཤོས་ཤིག་ཡིན་པར་ངོས་འཛིན་གྱི་ཡོད། མིང་དུ་ཁྲུང་ཁྲུང་མོ་ཞེས་གསོལ། 《མེ་ལོང་མེ་ཏོག་རྒྱན》 ཞེས་པ་ལས། ཁྲུང་ཁྲུང་ཕོ་མོ་ཁ་སྤྲོད་གར་ལ་རོལ། ཕོ་སྐད་སྟོད་དང་མོ་སྐད་སྨད། སྐད་གཉིས་འཕྲད་དང་སྦྲུམ་པར་གྱུར་སོགས་གསུངས་ཡོད།
བྱ་ཁྲུང་ཁྲུང་ནི་དུས་ཚིགས་ལ་བལྟས་ནས་ལྷོ་བྱང（ཤར）དུ་འཕུར། ཆུ་དང་མཚེའུ་ཡི་འགྲམ་དུ་ཁྱུ་བྱས་ནས་འདུག། ནམ་མཁར་བང་རིམ་བསྒྲིགས་ཏེ་འཕུར་བ་དང་། ཁ་ཟས་སུ་ཆུ་རྩྭ་དང་འབུ་ཡི་རིགས་ཟ་བ། ཁྲུང་ཁྲུང་གི་ཚེ་ཚད་ཕལ་ཆེར་ལོ་ལྔ་བཅུ་ཡིན། དེའི་ནང་ཨ་ཧྥེ་རི་ཀའི་རྒྱལ་ཁབ་ཁག་ཏུ་ཡོད་པའི（ཁྲུང་ཁྲུང་ཅོད་པན་ཅན）གྱི་ཚེ་ཚད་ལོ་ངོ་བརྒྱ་དང་ཉི་ཤུ་ཡིན། འདི་ནི་འདབ་ཆགས་རིགས་ཀྱི་ཚེ་ཚད་རིང་ཤོས་དེའང་ཡིན།
《མེ་ལོང་མེ་ཏོག་རྒྱན》 ལས་ལྷ་བྱ་ཁྲུང་ཁྲུང་གི་ཚེ་ཚད་བཤད་ཡོད་པ་དེ་ཧ་ལས་དགོས་པ་ཞིག་ཏུ་མཐོང་། ཁྲུང་ཁྲུང་ལོ་གསུམ་ཐོག་གཙུག་དམར་པོར་གྱུར། ལོ་བདུན་ལ་སྒྲོག་གཤོག་རྒྱས། ལོ་བཅུ་གཉིས་ཐོག་སྒྲ་གྲག། ལོ་ངོ་སུམ་ཅུའི་ཐོག་སྐད་གདངས་སྙོམས་ཤིང་གར་ལ་རོལ། ཡང་ལོ་ངོ་བདུན་གྱི་ཐོག་སྤུ་བརྗེས（ སྤུ་རྙིང་པ་བྱི་ནས་གསར་པ་སྐྱེ་བ）སྤུ་མདོག་དཀར་སར་ཇེ་དཀར། ནག་སར་ཇེ་ནག། ལོ་ངོ་བརྒྱ་དང་དྲུག་ཅུའི་ཐོག་སྤུ་བརྗེས་མཚམས་འཇོག། ལོ་ངོ་ཆིག་སྟོང་དྲུག་བརྒྱའི་ཐོག་གཞི་ནས་གཟུགས་ཕུང་བརྟན་པོར་ཆགས། ཟས་སུ་བཏུང་བ་ཁོ་ནའོ།། ཞེས་གསུངས། འདི་ནས་ལྷ་བྱ་ཁྲུང་ཁྲུང་གི་ཚེ་ཚད་ལོ་ངོ་ཆིག་སྟོང་དྲུག་བརྒྱ་ལས་བརྒལ་ཐུབ་པ་སྨོས། དེའི་ཕྱིར། རྟག་ཏུ་གྲུབ་ཐོབ་ཆེན་མོ་རྣམས་ཆིབས་པ་རུ་འཇོག་སྲོལ་ཡོད།
（ ལྟག་ཨོ་རྒྱན་ཆོས་འཕེལ་གྱིས་བྲིས། ）