ཕྱི་དྲོའི་ཆུ་ཚོད4པ་ཙམ་ལ་ལོ50ལྷག་ལ་སོན་པའི་བཀྲ་ཤིས་རྒྱ་མཚོ་འཕྲུལ་རྟ་བཞོན་ནས་ཤེ་ཆུ་འགྲམ་གྱི་བྲག་མགོ་རྫོང་འོ་སེ་ཇ་ཐོན་སྐྱེད་རྟེན་གཞིར་སོང་། འཕྲུལ་རྟ་རྒྱབ་ཏུ་གསོ་སྒྱེ་ཆེན་པོ་ཞིག་བསྡམས་ཡོད་པ་དེའི་ནང་ཁོང་བཟའ་ཟླ་གཉིས་པོས་ཉིན་ཕྱེད་རིང་བཏོགས་པའི་འོ་སེའི་འབྲས་བུ་སྤྱི་རྒྱ40ལྷག་བླུགས་ཡོད་ཅིང་། སྤྱི་རྒྱ་རེར་སྒོར4ཡི་རིན་གོང་ལྟར་བརྩིས་ན་ཡོང་འབབ་སྒོར160ལྷག་རག་ཐུབ་རྒྱུ་རེད། སྒོར་མོ་མང་པོ་ཞིག་མིན་ཡང་ཁོས་བློ་ཡིད་ཚིམས་པོས་དེ་སྔ་ཤིང་འབྲས་དེ་དག་ཡུལ་མིས་ཟ་བའམ་ཡང་ན་སྡོང་པོའི་ཐོག་རུལ་བཅུག་པ་ལས་ཐབས་གཞན་མེད། ད་ཆ་སྒོར་མོ་དང་བརྗེ་ཆོག་པས་ཁྱིམ་གྱི་ཡོང་འབབ་སྤར་བའི་ལམ་བུ་གཞན་ཞིག་རྙེད་བྱུང་ཞེས་བཤད།

བྲག་མགོ་རྫོང་ནི་ཁྲོན་ནུབ་མཐོ་སྒང་དུ་གནས་ཡོད་ཅིང་། དེ་ནའི་ཆ་སྙོམས་མཚོ་འཕགས་སྨི3860ཡིན་ལ་རྒྱུན་སྡོད་མི་ཁྲི3.9ཙམ་ཡོད། འདིར་འོ་སེ་ནི་རྒྱུན་མཐོང་རྩི་ཤིང་ཞིག་ཡིན་པ་དང་། དེའི་ལོ་མ་དང་མྱུ་གུས་ཇ་བཟོ་བ་དང་། འབྲས་བུས་སིལ་ཁུ་དང་སིལ་ཇ་བཟོ་བ། གཏུབས་ནས་སྐམ་རྗེས་རྒྱ་ལུགས་ཀྱི་སྨན་རྫས་བཅས་བཟོ་ཆོག། ཡུལ་མི་ཚོས་འོ་སེའི་དཔལ་འབྱོར་རིན་ཐང་མཐོང་དུས་འོ་སེ་ལ་དམིགས་ནས་དེང་རབས་ཐོན་ལས་བཏོད་པ་དང་། བཀྲ་ཤིས་རྒྱ་མཚོ་ལྟ་བུ་ཡུལ་མི་བརྒྱ་ཕྲག་ཁ་ཤས་ཀྱིས་ཡུན་རིང་ཉོ་སྒྲུབ་ཀྱི་མཉམ་ལས་འབྲེལ་བ་བཙུགས་ཡོད།

འོ་སེ་ཐོན་ལས་འཕེལ་རྒྱས་གཏང་རྒྱུ་ནི་བྲག་མགོ་རྫོང་གི་ཁྱད་ཆོས་ཐོན་ལས་འཕེལ་རྒྱས་བཏང་བའི་བསྡུས་རིས་ཤིག་ཡིན། ཁྱད་ཆོས་ཐོན་ལས་ཀྱིས་དམངས་ཀྱི་ལས་ཞུགས་གོ་སྐབས་མང་དུ་བཏང་བར་མ་ཟད། ཡོང་འབབ་མང་དུ་འགྲོ་རྒྱུར་སྐུལ་མ་ཐེབས་པ་དང་། ས་གནས་དེ་གའི་དེ་སྔའི་ཞིང་ལས་ཐོན་སྐྱེད་བྱེད་སྟངས་རྐྱང་པར་འགྱུར་ལྡོག་ཕྱིན་ནས་ཡུལ་སྡེ་དར་རྒྱས་འགྲོ་བར་འདེགས་སྐྱོར་ནུས་ལྡན་ཐུབ་ཡོད།

འོ་སེ་ཐོན་ལས་འཕེལ་རྒྱས་གཏང་ཆེད། ས་གནས་དེ་གས2008ལོར་བྲག་མགོའི་གངས་ལྗོངས་འོ་སེ་ཚད་ཡོད་འགན་འཁྲི་སྤྱི་གཉེར་ཁང་བཙུགས་ནས་འོ་སེ་ཇ་སོན་འདེབས་དང་། འདེབས་འཛུགས། ཐོན་རྫས་ཞིབ་སྤེལ། ཐོན་སྐྱེད་ཕྱིར་ཚོང་སོགས་བྱེད་ཀྱི་ཡོད། ད་སྔར་སྤྱི་གཉེར་ཁང་དེར་ཐོན་སྐྱེད་སྒྲུབ་རིམ་དྲུག་ཡོད་པ་དེ་དག་གིས་བྲོ་བ་མི་འདྲ་བའི་འོ་སེ་ཇ་དང་དེ་བཞིན་འོ་སེ་ལོ་མའི་རྒྱ་ལུགས་བཏུང་སྨན་དང་། འོ་སེ་འབྲས་ཆང་། འོ་སེའི་བཏུང་ཇ། འོ་སེ་འབྲས་ཁུ་སོགས་ཐོན་རྫས་གསར་སྤེལ་བྱས་ཡོད།

བྲག་མགོ་གངས་ལྗོངས་འོ་སེ་ཚད་ཡོད་འགན་འཁྲི་སྤྱི་གཉེར་ཁང་གིས་མགོ་འཛིན་ལེ་མིན་གྱིས་འོ་སེ་ཐོན་ལས་ཀྱིས་ཞིང་པར་འབབ་འཕར་ལམ་གསར་བཏོད་ཡོད། འོ་སེ་ཐོན་ལས་ཀྱིས་རྫོང་དེའི་ཞིང་འབྲོག་པ2000ལྷག་ལས་ཞུགས་ལ་བསྐུལ་ནས་ལོ་ལྟར་མི་རེར་ཆ་སྙོམས་ཇ་ལོ་དང་ཤིང་ཏོག་འཐུ་བར་འབབ་འཕར་སྒོར3500ཙམ་ཡོང་གི་ཡོད་ཅེས་བཤད། གཞན་ཡང་བཟོ་གྲྭའི་ལས་གནས་ཀྱང་ཉེ་འཁོར་གྲོང་སྡེའི་ཞིང་འབྲོག་མང་ཚོགས་ལ་སྒོ་མོ་ཕྱེ་ཡོད། གཞི་མདའ་གྲོང་སྡེའི་ཡུལ་མི་ཧོ་ཁྲང་ཧྲེང་ནི་བཟོ་གྲྭའི་ལས་མི་རྒན་གྲས་ཤིག་ཡིན། ཁོས་བཟོ་གྲྭར་ལས་ཀ་བྱས་པ་ནས་བཟུང་ཟླ་རེར་ཡོང་འབབ་སྒོར3000ཙམ་རག་བྱུང་ཞེས་བཤད།

ཕྱུར་ར་ནི་བྲག་མགོ་རྫོང་གི་ཁྱད་ཐོན་དངོས་རྫས་གཞན་ཞིག་ཡིན། རང་བྱུང་གི་འཚོ་བཅུད་གཞི་རྒྱུ་ཞིག་ཡིན་པའི་ངོས་ནས་ཕྱུར་ར་ནི་བཟའ་བཅའི་བཏུང་བྱ་དང་། སྐྱེ་དངོས་ལས་བཟོས་པའི་དངོས་པོ། ཞིབ་ཚགས་ཀྱི་རྫས་འགྱུར་བཟོ་ལས། སྨན་བཅོས་འཕྲོད་བསྟེན་སོགས་ཀྱི་ཁྱབ་ཁོངས་སུ་རྒྱ་ཁྱབ་ངང་སྤྱོད་བཞིན་ཡོད། བྲག་མགོ་རྫོང་དུ་ཕྱུར་ར་ནི་འབྲི་གཡག་འོ་མའི་ཐོན་ཁུངས་ཕུན་སུམ་ཚོགས་པའི་ཁྲོད་དུ་གནས་ཡོད། ཕྱི་རྒྱལ་གྱི་ཕྱུར་ར་ཐོན་རྫས་དང་མི་འདྲ་བར་བྲག་མགོ་རྫོང་གི་ཕྱུར་རའི་རྒྱུ་ཆ་ནི་འབྲིའི་འོ་མར་བླངས་རྗེས་ལྷག་པའི་ཕྱུར་བ་ཡིན།

བྲག་མགོ་ཁམས་པའི་ཧྲེང་ཏེ་འབྲི་གཡག་ཐོན་ལས་ཚད་ཡོད་སྤྱི་གཉེར་ཁང་གི་འགན་འཁུར་བ་ཀྲེན་ལེང་གིས་ངོ་སྤྲོད་བྱས་པར་གཞིགས་ན། བྲག་མགོའི་འབྲོག་པས་འབྲི་འོའི་ཁྲོད་ནས་མར་བཏོན་ཚར་རྗེས་ཕྱུར་བ་བཟོས་པ་རེད། དེ་སྔ་ཕྱུར་རའི་དཔལ་འབྱོར་རིན་ཐང་མཐོན་པོ་མེད་པའི་དབང་གིས་མང་ཆེ་བ་འབྲོག་པས་ཞོར་ཟས་ལ་བརྩིས་ནས་བཟོས་པ་དང་། བཟས་མ་ཚར་ན་དབྱུགས་ཀྱི་ཡོད། 2011ལོར་ཁྲེང་ཏུའུ་གྲོང་ཁྱེར་ཅིན་ཅང་ཆུས་རོགས་སྐྱོར་ལས་དོན་རུ་ཁག་དང་བྲག་མགོ་རྫོང་གིས་ཕྱུར་རའི་ཚོང་ལས་གོ་སྐབས་ཤེས་རྟོགས་བྱུང་ནས་ལས་གཞི་ལག་ལེན་བསྟར་འགོ་ཚུགས་པ་དང་ཁམས་པའི་ཧྲེང་ཏེ་འབྲི་གཡག་ཐོན་ལས་ཚད་ཡོད་སྤྱི་གཉེར་ཁང་བཙུགས་ཏེ་བྲག་མགོ་རྫོང་གི་ཕྱུར་ར་ཐོན་ལས་འཕེལ་རྒྱས་ཀྱི་ལམ་བུ་བཏོད་ཡོད།

ལོ་བཅུ་ལྷག་ཙམ་འཚོལ་ཞིབ་བྱས་པར་བརྒྱུད་ད་ཆ་བྲག་མགོ་རྫོང་ནས་ཐོན་པའི་ཕྱུར་ར་དེ་ཧྲན་ཏུང་དང་། ཧོ་ནན། ཕུའུ་ཅན། ཀོང་ཏུང་། ཅང་སུའུ། ཀན་སུའུ། ཀྲེ་ཅང་སོགས་ཞིང་ཆེན་མང་པོར་ཕྱིར་ཚོང་བྱས་པ་དང2023ལོར་ཕྱུར་རའི་ལོའི་ཐོན་རྫས་རིན་ཐང་སྒོར་ཁྲི3000ལས་བརྒལ་ཡོད། ཕྱུར་རའི་ཐོན་ཁུངས་རིན་ཐང་དེ་དཔལ་འབྱོར་རིན་ཐང་དུ་བསྒྱུར་ནས་ཞིང་འབྲོག་པར་ཕྱུག་ལམ་དུ་བཀོད་ཡོད། སྤྱི་གཉེར་ཁང་ལ་ཕྱུར་ར་བཙོངས་པར་བརྒྱུད་ས་གནས་དེ་གའི་ཞིང་འབྲོག་པར་ཡོང་འབབ་མི་ཉུང་བ་ཞིག་བྱུང་ཡོད། བྲག་མགོ་རྫོང་ཁོ་ནར་སྤྱི་གཉེར་ཁང་དེས་ལོ་ལྟར་ཕྱུར་ར་ཏུན360ལྷག་ཉོས་ནས་ཞིང་འབྲོག་པར་ཡོང་འབབ་སྒོར་ཁྲི1490ཙམ་ཡོང་བར་སྐུལ་ཁྲིད་བྱས་ཡོད། ཀྲེང་ལེང་གིས་ད་སྔར་སྤྱི་གཉེར་ཁང་དེས་ཕྱུར་ར་ཐོན་ནུས་ཆེ་རུ་བཏང་ནས་ཞིང་འབྲོག་པ་དེ་བས་མང་བར་ཕན་བཞིན་ཡོད་ཅེས་བཤད།

ས་གནས་དེ་གའི་ཐོན་ཁུངས་ཡག་པོ་སྤྱད་པ་ཕུད་བྲག་མགོ་རྫོང་གིས་ད་དུང་གཞན་རྒྱུ་ནང་འདྲེན་ཧུར་ཐག་བྱེད་བཞིན་ཡོད། ལྡུམ་སྒོང་ནི་ས་གནས་དེ་གར་ས་སྐྱེས་རྡོ་སྐྱེས་ཐུབ་པའི་ས་བོན་ཞིག་མིན་མོད། འོན་ཀྱང་བྲག་མགོ་རྫོང་ཤེ་ཆུའི་ཞིང་ལས་གསར་སྤེལ་ཚད་ཡོད་སྤྱི་གཉེར་ཁང་གི་འདེབས་འཛུགས་རྟེན་གཞིའི་དྲོད་ཁང་ཆེ་མོ301གི་ནང་ལྡུམ་སྒོང་ཆུང་བ་འཚར་ལོངས་འབྱུང་བཞིན་ཡོད། སྤྱི་གཉེར་ཁང་དེའི་ཞིང་ལས་ཅིང་ལི་ཧྲེན་ཤོན་གྱིས་མཐོ་སྒང་གི་ལྡུམ་སྒོང་འདེབས་འཛུགས་རྟེན་གཞི་དེས་ལོ་ཧྲིལ་པོར་མཁོ་འདོན་བྱེད་ཐུབ་པ་དང་ལོའི་ཐོན་ཚད་སྤྱི་རྒྱ་ཁྲི300ཙམ་ལ་ཟིན་གྱི་ཡོད་ཅེས་བཤད།

ཧྲེང་ཤོན་གྱིས་ང་ཚོས་ནང་འདྲེན་བྱས་པའི་ལྡུམ་སྒོང་སོན་བཟང་ནི་ཧྲན་ཏུང་ཧྲོའུ་ཀོང་ནས་ཡིན། བྲག་མགོ་རྫོང་དུ་མུའུ་རེའི་ཐོན་ཚད་དེ་ཐོག་མའི་ཐོན་ཡུལ་ལས་ཅུང་ཆག་ཡོད་མོད། འོན་ཀྱང་སྤུས་ཚད་མི་ཞན་པར་མ་ཟད། ལ་ལ་དེ་བས་མངར་མོ་ཡིན། མཐོ་སྒང་ས་ཆར་ཉི་འོད་འདང་ངེས་དང་ཆུ་ཁུངས་ཡག་པོ་ཡོད་པར་བརྟེན་ལྡུམ་སྒོང་སྐྱེ་འཚར་ལ་དགེ་མཚན་ལྡན་པ་དང་། དེ་མིན་གྲང་འགོག་ལ་སོགས་པའི་དཀའ་ངལ་སེལ་ཆེད། རྟེན་གཞིས་ཐབས་ལམ་མང་པོ་སྤྱད་ཡོད། དཔེར་ན། ཉིན་མཚན་གྱི་དྲོད་ཚད་ཧེ་བག་མི་ཆེ་བ་བྱ་ཆེད། དྲོད་ཁང་ཚང་མར་རང་འགུལ་ཉལ་ཆས་འགེབས་པའི་སྒྲིག་ཆས་བཟོས་ཡོད་ཅེས་བཤད།

ཧྲེང་ཤོན་གྱིས་མཐོ་སྒང་གི་ལྡུམ་སྒོང་ཞིམ་མིན་ནི་མཐར་གཏུགས་ནས་བཤད་ན་ཞིང་ནང་དོ་དམ་གྱི་ཆེད་ལས་རང་བཞིན་ལ་རག་ལས་ཡོད། བཟོ་པ་བྱང་ཆུབ་པ་ཞིག་གསོ་སྐྱོང་བྱེད་པར་ཉུང་མཐར་ཡང་ལོ་གཉིས་གསུམ་ཙམ་འགོར་གྱི་ཡོད། སྤྱི་གཉེར་ཁང་དེ་བཙུགས་པ་ནས་བཟུང་ཞིང་འབྲོག་པ་བཅུ་ཕྲག་ཁ་ཤས་ཚད་ལོན་བཟོ་པར་གསོ་སྐྱོང་བྱས་པ་དང་ལག་རྩལ་པས་ཕན་ཚུན་བསླབ་རེས་བྱས་པར་བརྟེན་བོད་རིགས་སྤུན་ཟླ་ཚོས་ཇི་ལྟར་བྱས་ནས་མྱུ་གུ་གསོ་བ་དང་། ས་བོན་འདེབས་པ། ལུད་རྒྱག་པ། རྩ་སྤོས་རྒྱག་པ་བཅས་བྱེད་སྟངས་ཤེས་པར་མ་ཟད། ཞིང་འབྲོག་པ་ཁག་གཅིག་ད་དུང་ལྡུམ་སྒོང་འདེབས་མཁན་རིགས་གཅིག་མཁས་པར་ཡང་གྱུར་ཡོད་ཅེས་བཤད།

ཤེས་རྟོགས་བྱུང་བར་གཞིགས་ན། ལས་གཞི་དེས་ལོ་ལྟར་ཉེ་འཁོར་གྱི་གྲོང་སྡེར་ཁེ་སྤོགས་སྒོར་ཁྲི770ལྷག་བགོ་གི་ཡོད་པ་དང་། ད་སྔའི་བར་ཁེ་སྤོགས་སྒོར་ཁྲི3000ལྷག་བགོས་ཡོད། དེའི་ཐོག་ས་ཞིང་བརྒྱུད་བཤུག་དང་། ཡུན་རིང་ལས་གླ། དུས་ཐུང་ལས་མི་བཅས་ཀྱི་འབྲེལ་ཡོད་འགྲོ་གྲོན་བསྣན་ན་ལྡུམ་སྒོང་ལས་གཞིས་ལོ་ལྟར་བྲག་མགོ་རྫོང་ལ་ཡོང་འབབ་སྒོར་ཁྲི1200ལྷག་ཡོང་ཐུབ་ཀྱིན་ཡོད་པ་རེད།།

（ ཀུན་དགའ་བསམ་གཏན་གྱིས་བསྒྱུར།）