གངས་རིའི་འདབས་ནས་འཁྲུངས་པའི། །
གངས་ལྷ་དབྱངས་ཀྱི་མེ་ཏོག །
འཛུམ་གྱི་དྭངས་མ་ཁུར་ནས། །
ལྷོ་སྤྲིན་གསེབ་ཏུ་འདྲེས་སོང་། །
ཆུ་ཕྲན་དེ་གའི་འཁྲིས་སུ། །
ལུ་གུའི་མེ་ཏོག་ཚོམས་བུས། །
ལོ་མའི་དུད་པ་བཏེགས་ཏེ། །
གཙང་པོའི་ནང་དུ་ཐིམ་སོང་། །
ནགས་ཚལ་གཡུ་ལོའི་བཀོད་པ། །
རང་བྱུང་དྲི་བསུང་འཐུལ་སའི། །
དཔྱིད་དཔལ་མགྲིན་སྙན་ཅན་པོ། །
ལྷོ་མོན་ཕྱོགས་སུ་འཕུར་སོང་། །
ལོ་དེའི་དབྱར་ཁ་དྲན་ན། །
དགུན་ཁར་མེ་ཏོག་བཞད་ངེས། །
གནས་དེའི་བཀོད་པ་བསམས་ན། །
རང་སེམས་ལྷ་ཡུལ་ཆས་འགྲོ། །
ཕྱིར་དྲན་ཀློང་གི་གཟུགས་བརྙན། །
དྲན་ཚོར་ནང་གི་མཆོག་རེད། །
རང་སེམས་མཚོན་པའི་སྙན་ངག །
ཨུ་དུམ་ཝཱ་རའི་དཀོན་རེད། །
མིག་ཆུའི་དྭངས་མ་ཁྲག་ཡིན། །
སྙིང་གཏམ་སྙིང་བཅུད་དྲོད་ཡིན། །
མཚོན་ཐབས་དབྱངས་འགྲོས་འདི་ཡིན། །
ཉིང་དགོས་སྡུག་རོགས་ཁྱོད་ཡིན། །
སྙན་ཚིག་གསེང་གི་བདུད་རྩི། །
བརྩེ་བས་ཧུབ་གང་བཞེས་དང་། །
དུངས་བས་བསླས་པའི་མཛུབ་དཀྲིས། །
ལག་བཟང་དྲོད་མོས་སྟེར་ཆོག །
རང་སེམས་ཆང་གིས་བཟི་ན། །
མིག་ཆུའི་མཚོ་མོ་འཁྱིལ་ཡོང་། །
ལོ་མའི་ཆུ་ཡི་ཐིགས་པ། །
སྙིང་གི་དཀྱིལ་དུ་སིམ་སོང་། །
ཉ་གང་ཟླ་བའི་དཀྱིལ་འཁོར། །
ལྷ་མོའི་ཞལ་རས་མ་བྲིས། །
འཆི་མེད་ལྷ་བརྒྱའི་དགུ་མདུད། །
མགུལ་དུ་བཏགས་པ་ཕབ་ཡོད། །
སྙིང་གི་འཕར་ལྡིང་རེ་ལ། །
ཚིག་གིས་འབྲུ་བསྣན་བྱས་ཡོད། །
ཨ་ཅག་འཕགས་མའི་གླུ་སྐད། །
ངག་ནས་ཡང་ཡང་བཟླས་ཡོད། །
འདོད་པས་མྱོས་པའི་སེམས་པ། །
ཚོགས་དྲུག་སྣང་བའི་འཇའ་རིས། །
ངལ་བའི་རྔུལ་ཆུ་ཟགས་ཞོར། །
ནམ་མཁའི་དབྱིངས་སུ་ཐིམ་འགྲོ། །
འཁོར་བའི་དབྱངས་རྟ་རེ་རེས། །
མི་ཚེའི་བདེ་སྡུག་གླེང་ཡོད། །
རང་སེམས་འཁོར་བར་ཁེན་ནས། །
ངག་ནས་གླུ་ཆུང་བླངས་ཡོད། །
འཁྲུལ་བའི་སྨུག་སྤྲིན་གསེབ་ཀྱི། །
སྲོད་ཀྱི་རྐང་ལམ་ཕྲ་མོར། །
སྨོན་འདུན་རུམ་གང་བཟུང་ནས། །
རྣམ་ཤེས་དེའི་ཕྱོགས་ཆས་སོང་། །
༼ རྫ་ཤུལ་བློ་བཟང་། ༽