གཟུགས་མེད་ཀྱི་རལ་གྲིས།
འུ་གཉིས་ལུང་ཀྱོག་འདིའི་གདགས་
སྲིབ་གཉིས་སུ་བཀར།
ཡང་ན། གཅིག་ནི་ཉིན་མོར་གནས་ཤིང་།
གཅིག་ཤོས་མཚན་མོར་འཚོ་དགོས་པར་བྱས།
ང་ཡི་ས་གཞིར་ཉི་འོད་ཚ་དྲགས་པས།
སྤྱི་གཙུག་གི་ནགས་ཚལ་ནས་ཆུ་མིག་རྡོལ།
རྩྭ་ལྗང་གི་བཀྲག་མདངས་ཉམས་ཏེ་རྙིད་ཚུལ།
དུས་ཚོད་བཅུ་གཉིས་ཀྱིས་གྲུབ་པའི་
ཉིན་གཅིག་ཁོ་ན་མ་ཡིན།
རྟེན་འབྲེལ་བཅུ་གཉིས་ཀྱིས་བསྐོར་བའི་
མི་ཚེ་ཧྲིལ་པོའོ།།
མི་ཚེ་ནི་ཁྱོད་ཀྱིས་བཤད་པ་ནང་བཞིན།
ནར་སོན་གྱིན་སོན་གྱིན་བདེ་སྐྱིད་རྒ་བཞིན་འདུག
སའི་གོ་ལའི་ཚ་དྲོད་ཇེ་མཐོར་ཕྱིན་པ་དང་བསྟུན་ནས།
དྭངས་གཙང་གི་ཆུ་མིག་དག་སྐེམ་བཞིན་འདུག།
བྱིས་དུས་སུ། བདེ་སྐྱིད་དུ་བརླམས་པའི་ས་
མིག་དེར་འབྱོར་དུས།
དེ་རུ་བག་ཕེབས་སུ་སྡོད་ཆོག་པའི་
སྟེགས་བུ་ཞིག་གཏན་ནས་མི་འདུག
སྔོན་ཆད།
སྣ་གཉེར་ཏེ་མཆིལ་ཞགས་འཕེན་
མྱོང་བ་དག་གིས།
ད་ནི། རྨི་ལམ་ནང་ནས་ཀྱང་ཚུར་ཞལ་
འཛུམ་གནང་གིན་འདུག།
གལ་ཏེ།
དུས་ཚོད་ཅེས་པ་དེ་ལག་པར་དཀྲིས་
པའི་ཆུ་ཚོད་ཇི་བཞིན།
གང་དགར་དབང་སྒྱུར་བྱེད་ཆོག་པ་ཞིག་ཡིན་ཚེ།
ལས་དབང་ཞེས་པ་སྲབ་མཐུར་གྱིས་
སྐྱོག་བཏུབ་པ་ཞིག་ཡིན་ཚེ།
ང་ལ་ཐེ་ཚོམ་སྤུ་ཙམ་ཡང་མེད་པར།
རྟ་ཕོ་བཞོན་ཏེ་ཁྱོད་ཀྱི་པང་དུ་ལོག་ངེས།
ཉི་འོད་ཚ་ལམ་ལམ་གསེང་ནས་ཁྱོད་ཀྱི་
གྲིབ་བསིལ་གྱི་རེག་བྱ་ལ་སླར་ཡང་རེག་ངེས།
༼ གཞི་ཚང་ཟླ་བ་གྲགས་པ། ༽