སྤང་ལ་མེ་ཏོག་བཞད་དུས།།
དྲི་བསུང་ཕྱོགས་བཞིར་ཁྱབ་ཡོད།།
ལས་དབང་དམ་དུ་སྦྲེལ་དུས།།
ང་ཚོ་མཉམ་དུ་འཛོམས་ཡོད།།
མཉམ་དུ་འཛོམས་པའི་མི་ལ།།
ཁ་ཞེ་མཐུན་མཐུན་བྱས་པས།།
དུས་བཞིའི་ལོ་ཚིགས་འཁོར་འགྲོས།།
སྐྱིད་ཀྱི་ངང་ནས་འདས་སོང་།།
ལོ་བཞིའི་དགའ་སྐྱོ་ཆགས་སྡང་།།
ཕྱིར་དྲན་སློང་དུ་འཐིམས་སོང་།།
ང་དང་སྙིང་གི་གྲོགས་པོ།།
ཕྱོགས་ནས་ཕྱོགས་སུ་ཐོན་སོང་།།
ཕྱོགས་སུ་ཐོན་པའི་གྲོགས་ལ།།
དབྱར་ལ་མེ་ཏོག་བཞད་འདྲའི།།
བཀྲག་མདངས་ཡིད་དབང་འཕྲོག་པའི།།
མི་ཚེའི་རི་མོ་དགོད་རོགས།།
ད་ཆ་དུས་ཚོད་ཟེར་བའི།།
གླེགས་བམ་དེ་ལ་ལྟ་དུས།།
གློ་དང་རྒྱུ་མའི་མཚམས་ནས།།
གསང་བ་མང་པོ་སྤུངས་ཤག།
གསང་བ་མང་པོའི་གསེབ་ན།།
བརྩེ་བ་མང་པོའི་དཀྱིལ་དུ།།
དུངས་བ་ལྷུག་པོར་གཏམས་པས།།
ལས་ཀྱི་རི་མོ་གསལ་བྱུང་།།
ང་ནི་བྱང་གི་བྱིའུ་ཆུང་།།
ཁྱེད་ནི་ལྷོ་ཡི་ཁུ་བྱུག།
ང་ཚོ་སྐྱེས་ཡུལ་མི་གཅིག།
འཛོམས་ས་གནས་མཆོག་ཉིང་ཁྲི།།
དབྱར་དགུན་སྟོན་དཔྱིད་ལོ་འཁོར།།
མཚམས་མེད་འཁོར་འཁོར་གནང་བས།།
སློབ་ཐོན་གྱེས་བྲལ་གླུ་ཚིག།
མིག་ཆུའི་གསེབ་ནས་བླངས་ཡོད།།
མིག་ཆུ་གཡོ་ཁྲམ་མེད་པས།།
བརྩེ་བའི་གཟུགས་སུ་མཐོང་རོགས།།
སྤུན་གྲོགས་ལ་རྒྱའི་དར་ཤིང་།།
སེམས་ཀྱི་དབུ་རྩེར་བཞེངས་ཡོད།།
བཀྲ་ཤིས་རྟེན་འབྲེལ་རང་འགྲིག།
གྲོགས་པོའི་ཕྱོགས་ལ་ཕེབས་རོགས།།
ལུས་བདེ་སེམས་སྐྱིད་ཡོང་བའི།།
བཀྲ་ཤིས་བསམ་དོན་འགྲུབ་རོགས།།
སླད་ཕྱིན་ལོ་ཟླའི་ནང་དུ།།
བྱ་གཞག་ཡར་ངོའི་ཟླ་ལྟར།།
སྐུ་ཚེ་རི་རྒྱལ་ལྷུན་བཞིན།།
གཏན་ནས་བརྟན་པའི་སྨོན་ལམ།།
༼ ནག་ཤོད་ང་རོའི་འཚེར་སྒྲ། ༽