རས་གཟན་དམར་པོ་ཞིག་སེར་གྱིས་ལྡེག་གིན། །
འཁོར་བའི་ཕྱི་ནང་གི་ཐང་ཆེན་འདི་རུ། །
ཉིན་བྲེལ་མཚན་བྲེལ་ངང་ཁོམ་ལོང་མེད་ཀྱང་། །
སོང་འགྲུབ་འདི་ཡིན་གྱི་བྱ་བ་མ་མཐོང་། །
ལུས་འཆོས་ངུར་སྨྲིག་གི་རྒྱལ་མཚན་བསྒྲེངས་ནས། །
ཁ་ཏོན་དགེ་སྦྱོར་གྱི་ཆོས་པའི་ཚུགས་ཀས། །
སྦྱིན་བདག་ཁྱིམ་ཕུག་ཏུ་ཡིན་མདོག་ཁ་པོས། །
ཕྱི་ཉམས་ནང་རུལ་གྱི་ཕྲན་ཆུང་སྐྱོ་བ། །
ཕལ་བའི་དད་ཕྱག་གི་མཆོད་པའི་ཡུལ་དུ། །
ཚིག་སྟོང་རྐྱང་བ་ཞིག་ངག་གིས་འཁྱོགས་ནས། །
ནང་སེམས་མ་རིག་གི་རྟ་རྒོད་བཞོན་ནས། །
ལུས་འདུག་སེམས་ཤོར་གྱི་ངང་ཚུལ་སྡུག་གོ །
སྐྱ་ལོ་ཕོ་མོ་ཡི་གྲལ་མགོ་རེ་རེར། །
དགེ་སྦྱོང་འདུལ་འཛིན་གྱི་ཚུལ་འཆོས་འོག་ནས། །
མིག་ཟུང་ཀེམ་ཀེམ་གྱིས་གསང་བའི་ཁྲོད་དུ། །
ན་ཆུང་ལུས་ཕྲ་མར་སེམས་པ་གཡེང་འདུག །
ཕྱི་རོལ་དམར་སེར་གྱི་མཚན་དཔེ་ཡག་ཀྱང་། །
ནང་སེམས་ཕལ་བ་ཡི་མི་གྲལ་ཞིག་ནས། །
བློ་དཀར་འདང་ཆེན་གྱི་འཛུམ་ཆུང་ཁྱོད་ལ། །
སེམས་ཀྱི་ཁ་སྟབས་དེ་ཆད་མྱོང་མི་འདུག །
དྲིན་ཆེན་ཕ་མ་ཡི་རེ་འདུན་འོག་ནས། །
ཅི་འབྱོར་བཅུད་ཟུངས་ཀྱི་དྲིན་གྱིས་བསྐྱངས་ཀྱང་། །
བཟང་ལན་ངན་འཇལ་གྱི་བུ་ལོན་ཆེ་བའི། །
ཕྲན་ཆུང་ལྟ་བུ་རིགས་ཉེས་སེལ་ཡོད་དམ། །
ཕུགས་མེད་ཁ་ཚིག་གི་འདུན་པ་ཟེར་ནས། །
རི་ཆུང་ལུང་གསུམ་གྱི་ས་མཚམས་བརྒལ་ཏེ། །
རབ་བྱུང་ཁྱུ་ཚོགས་ཀྱི་གྲལ་མཐར་ཞིག་ན། །
ཐོས་བསམ་སྦྱོང་བ་ཡིས་མཐའ་བརྒྱ་མ་ཆོད། །
བློ་དམན་ཕྱི་བཤོལ་གྱིས་གཏན་དུ་འདས་ཤིང་། །
ཆོས་གྲྭ་ཆེ་སོང་གི་མཐའ་མའི་མཐའ་མ། །
རྒྱུད་ཀྱི་འདོད་ཆགས་དེ་ཇེ་ཆེ་ཇེ་ཆེར། །
ཁྲོ་བོའི་ཞེ་སྡང་ཡང་ཇེ་རྒོད་ཇེ་རྒོད། །
ཁ་ལ་ཁ་འཇམ་གྱི་ཚིག་སྟོང་ལག་སྟོང་། །
དོན་གྱི་ཕུ་ཚུགས་སུ་ཤིང་སྡོང་རུལ་བ། །
གྲོང་མཐར་ཕྱིན་ཕྱིན་དུ་སོང་བའི་རྗེས་ལ། །
འདི་ཞེས་བསྟན་རྒྱུ་ཞིག་རྙེད་ཐབས་དཀའོ། །