དང་པོ་ན་ཆུང་གི་ལང་ཚོས། །

ནང་སེམས་དུམ་བུ་རུ་བཏུབ་སྟེ། །

ཚོར་ཡིད་ངམ་ངམ་གྱིས་འཁྱེར་གྱིན། །

དགའ་བའི་སྣང་ཡན་གྱིས་བསྒྱུར་ཐལ། །

གཞིས་ཆུང་སྤང་ཐང་གི་ལྷས་ན། །

འབྲི་མཛོའི་འབའ་སྒྲ་ཡི་ཁྲོད་དུ། །

ན་ཆུང་སེམས་སོང་གི་མེ་ཏོག །

དབང་མེད་ཡིད་མཁའ་རུ་བཞད་བྱུང་། །

ལོ་ཟླའི་འཆར་སྒྲོས་ཀྱི་རྗེས་སུ། །

ཟུར་མིག་ཁྲ་ཁྲ་ཡིས་དེད་དེ། །

ཁྱོད་ཤུལ་རེ་རེ་ནས་སྙེག་གིན། །

ལྷ་ཆུང་དགའ་ཚལ་དུ་འཛོམས་བྱུང་། །

ཁྱོད་ལུས་དཔག་བསམ་གྱི་ལྗོན་པ། །

ཞལ་རས་འཛུམ་འཛུམ་གྱི་ལྷ་ངོ་། །

སྙན་དབྱངས་དུང་དཀར་གྱི་རང་སྒྲ། །

མ་འབད་རང་སེམས་སུ་ལུས་སོང་། །

ཤེལ་ལེབ་གྲུ་བཞི་ནས་རྒྱུད་ཀྱིན། །

འཚོ་བའི་དཀའ་སྡུག་གི་འགྱུ་བག །

མ་བཅོས་སྙིང་གཏམ་གྱི་ཚིག་གསུམ། །

བཤད་བཤད་ནང་སེམས་སུ་འཐིམ་སོང་། །

དགའ་བ་རྒྱ་མཚོ་ལ་འཐིམ་ཡོད། །

བརྩེ་བ་དྭངས་གསལ་གྱིས་བཞད་ཡོད། །

དུང་སེམས་རྦ་རླབས་ཀྱིས་འཁྱིལ་ཡོད། །

འུ་གཉིས་བརྩེ་དུང་གིས་བསྲུངས་ཡོད། །

ལས་དབང་གནམ་རྒྱལ་གྱི་བཀོད་པས། །

ལས་འདྲིས་བྱམས་པ་ཞིག་གྱུར་བྱུང་། །

ལས་མཐུན་སྙིང་ཉེ་མ་ཁྱོད་རང་། །

ལས་འགྲིག་ཁོ་བོ་དང་འཚོ་འགྲོ། །

འུ་གཉིས་བརྩེ་དུང་གི་གཏན་ཚིགས། །

མི་འདོད་ཁ་ལོ་རེ་བསྒྱུར་ཀྱང་། །

འགྱུར་མེད་ཁ་དན་གྱི་ཚིག་གིས།

མི་འབྲལ་ཚེ་ལུས་འདི་བརྟན་འགྲོ། །

ཞེ་འདང་འོ་ཆུ་ཡི་མཚོ་མོ། །

ངེད་གཉིས་ཡིད་མཁའ་ལ་འདྲེས་ཤིང་། །

ནམ་ཟླ་ཆ་མེད་ནས་བརྩམས་ཏེ། །

བརྩེ་མདུད་དམ་ཚིག་གིས་དཀྲིས་ཡོད། །

སྙིང་སྡུག་ཚིག་གསུམ་གྱི་ཡིག་འབྲུ། །

ལས་ཀྱི་ཁ་ཡིག་ཏུ་བྲིས་ཤིང་། །

ཚེ་སྐལ་ལས་དབང་གི་མེ་ཏོག །

འདི་སྣང་འཆར་ཡན་ལ་རོལ་འགྲོ། །