༡

ཉི་གཞོན་བུ་མོས་སྨག་གི་ཡོལ་བ་ཕྱེ།།

ཡོལ་བའི་ངོས་ན་དུག་སྡོམ་འཁྱམ་པོ་ཞིག །

གར་ཡོང་དྲིས་པས་མཛུབ་མོས་ནམ་མཁར་སྟོན།།

གར་འགྲོ་ཞུས་པས་སླར་ཡང་ནམ་མཁར་སྟོན།།

ནམ་མཁའི་མཐའ་ལ་མཐའ་ཞིག་མེད་དོ་སྐད།།

མཐའ་མེད་དེ་ཡི་སྟེང་ཕྱོགས་གོང་མ་ན།།

གོང་མ་ལྷ་ཡི་ལྡིང་ཁང་རང་བྱོན་ཡོད།།

དེ་ནས་འོངས་སམ་སྙམ་ནས་ཡང་བསྐྱར་དྲིས།།

དེ་སྐད་ཐོས་པས་སྡོམ་ནག་འཁྱམ་པོ་དེ།།

མིག་ཟུང་རིག་རིག་ཕྱག་ཟུང་གཡུགས་གཡུགས་དང་།།

སྨྲ་བ་འཆལ་འཆོལ་སེམས་པ་ལྷོད་ལྷོད་ངང་།།

སྲིད་པའི་རྨུ་ཐག་ལ་འཇུས་མཁའ་རུ་གཤེགས།།

༢

དགུང་གི་ཉི་མས་གཙང་པོའི་རླབས་རྒྱུན་གཡོས།།

རླབས་རྒྱུན་ཁྲོད་ན་ཉ་མོ་གཟའ་རོ་ཞིག །

གར་ཡོང་དྲིས་པས་འཁྱུག་བསྐོར་ལན་གསུམ་བརྒྱབ།།

གར་འགྲོ་ཞུས་པས་སླར་ཡང་འཁྱུག་བསྐོར་བྱས།།

མཚོ་མོའི་གཏིང་ལ་གཏིང་མཐའ་མེད་ན་ཡང་།།

གཏིང་གི་གཏིང་ན་ཀླུ་ཡི་ཕོ་བྲང་བཞུགས།།

རིན་བྲལ་ནོར་བུས་བཀང་ཞིང་གཏམས་པ་ཡོད།།

དེ་ནས་འོངས་སམ་སྙམ་ནས་ཡང་བསྐྱར་དྲིས།།

དེ་སྐད་ཐོས་པས་ཉ་མོ་འཛུམ་དང་བཅས།།

གར་གྱི་སྟངས་སྟབས་རླབས་ཀྱི་རྒྱུན་དང་བསྡེབས།།

གླུ་ཡི་འགྱུར་ཁུགས་སླར་ཡང་གར་དང་བསྡེབས།།

ལེན་བཞིན་འཁྲབ་བཞིན་གཙང་པོའི་འཇིངས་སུ་འཐིམ།།

༣

སྲོད་ཀྱི་བྱམས་པས་ཉིན་གྱི་ལྕི་བ་བཏུས།།

ལྕི་བའི་ངོས་ན་འབུ་ནག་གླེན་པ་ཞིག །

གར་ཡོང་དྲིས་པས་མིག་གིས་ས་ལ་ལྟ།།

གར་འགྲོ་དྲིས་པས་སླར་ཡང་ས་ལ་ལྟ།།

ས་གཞིའི་སྦུབ་ན་གནས་ཤིག་ཡོད་དགོས་ན།།

ལྷ་སྒྲུང་ནང་གི་དམྱལ་ཁམས་མ་གཏོགས་པའི།།

སེམས་ཅན་གནས་ས་གཞན་ཞིག་མ་མཐོང་བས།།

དེ་ནས་འོངས་སམ་སྙམ་ནས་ཡང་བསྐྱར་དྲིས།།

འབུ་ནག་རྭ་ཅོ་ཅན་དེས་དེ་ཐོས་འཕྲལ།།

མགོ་བོ་ཕུར་ཕུར་ལུས་པོ་གསེག་གསེག་དང་།།

སེམས་པ་སྤྲོ་སྤྲོ་གོམ་པ་འཁྱར་འཁྱོར་ངང་།།

བདེན་པའི་ཁུང་བུ་བརྒྱུད་ནས་ས་རུ་འཛུལ།།

༤

མཚན་གྱི་གོས་ཆེན་ས་གཞིའི་རྒྱན་དུ་བྱས།།

ས་གཞིའི་སྒང་ན་རྒོད་པོ་མཐུར་མེད་ཅིག །

གར་ཡོང་དྲིས་པས་རྨིག་པས་རྡེབ་རྡེབ་བྱེད།།

གར་འགྲོ་ཞུས་པས་སླར་ཡང་རྡེབ་རྡེབ་བྱེད།།

ས་གཞིའི་སྒང་ན་མི་ཡུལ་མ་གཏོགས་པའི།།

ཁྱད་མཚར་གནས་ཀྱི་བཀོད་པ་མ་མཐོང་ཞིང་།།

རང་བྱུང་ལྷུན་གྱི་མཛེས་སྡུག་མ་ཡོད་པས།།

དེ་ནས་འོངས་སམ་སྙམ་ནས་ཡང་བསྐྱར་དྲིས།།

དེ་སྐད་ཐོས་པས་ཅང་ཤེས་རྟ་ཕོ་འཛུམ།།

རྟ་ཕོའི་རྒྱབ་ཀྱི་འགྲོ་བ་མི་ཡང་སྤྲོ།།

མིའི་རིགས་འཚོ་བར་གོམས་པའི་གནས་འདི་ནི།།

བདག་གི་སེམས་ཀྱི་སྦས་ཡུལ་མ་ཡིན་ནམ།།

༼ ཉག་ཕྲན། ༽