དུས་ཚོད་དང་སྐར་ཆའི་སྒེའུ་ཁུང་བརྒྱུད་ནས།།

ཤེས་རིག་གི་འོ་ཇ་རྔམ་འཐུང་བྱེད་པའི།།

སྣོད་ལྡན་གྱི་བུ་སློབ་རིག་པའི་གཞོན་ནུ།།

རྣམ་དཔྱོད་ཀྱི་རྟ་ཕོའི་བང་ཁ་མ་ལྷོད།།

རྨི་ལམ་གྱི་གཤོག་ཟུང་གནམ་སའི་མཐའ་ཡིན།།

རེ་སྨོན་གྱི་ཕུགས་བསམ་རྒྱལ་ཁམས་ཆེན་པོ།།

ཡིད་ཆེས་ཀྱི་བློ་མིག་ནང་དུ་བཀུག་སྟེ།།

འབྱུང་འགྱུར་གྱི་འོད་སྣང་སེམས་ཀྱིས་ཕྲིས་ཤིག།

གྲུ་འཛིན་གྱི་རི་བོའི་ཡང་སྟེང་དེ་རུ།།

ཐོ་རེངས་ཀྱི་སྐར་ཆེན་འཛུམ་འཛུམ་དམུལ་བྱུང་།།

མི་ཡུལ་གྱི་སྐྱིད་གྲོང་ཡངས་པོ་འདི་རུ།།

ངང་སྒུག་གི་སྒོ་དར་ལྷེམ་ལྷེམ་བསྐྱོད་བྱུང་།།

ས་ཆེན་གྱི་མངལ་དུ་གཟིམ་ཆུང་བསྟར་ཡོད།།

ཤེས་བྱ་ཡི་བདུད་རྩི་དེ་རུ་སིམ་ཆོག།

ཡིད་ཆེས་ཀྱི་མགོ་བོ་མཐོ་རུ་བསྒྲེངས་ཏེ།།

མཐོ་རྒྱུགས་ཀྱི་གཡུལ་སར་སྤོབས་པས་འགྲིམས་ཤིག།

མ་འོངས་དང་ད་ལྟའི་ལམ་མདོ་དེ་རུ།།

འུ་ཅག་གིས་རེ་བའི་དབུ་ཁྱུད་འབྲི་ཆོག།

སྟོང་བསམ་གྱི་འདུན་མ་རྒྱབ་ཏུ་དོར་ཏེ།།

བདེན་གྲུབ་ཀྱི་སྦྱངས་འབྲས་ཁུར་དུ་ལེན་རོགས།།

ཤེས་རབ་ཀྱི་ལྷ་མོར་སྨོན་ལམ་མ་ཆད།།

སྨྱུག་རྩེ་རུ་དག་པའི་ཡིག་འབྲུ་ཤམ་ཤམ།།

ལོ་ཟླ་དང་དུས་ཀྱི་འཁོར་མོའི་ཀློང་ནས།།

དཔྱོད་ལྡན་གྱི་མཐོ་སློབ་བསམ་དོན་འགྲུབ་ཡོང་།།

དྭངས་གཙང་གི་ཤེས་བྱའི་བཅུད་ཀྱིས་གསོས་པའི།།

མཐོ་རྒྱུགས་ཀྱི་སྟེགས་བུར་གོམ་ཆུང་སྤོ་བའི།།

བློ་གསལ་གྱི་གཞོན་ཆུང་སྣང་བའི་འོད་ཆུང་།།

སྤོབས་སེམས་ཀྱི་ལང་ཚོར་གཤོག་པ་སྩོལ་ཅིག།

མཐོ་རྒྱུགས་ཀྱི་རྒྱུགས་རར་མ་འབྱོར་ཚུན་དུ།།

གང་དྲན་དུ་འབྲས་བུར་སྔོན་དཔག་མ་བྱེད།།

ཡིད་ཆད་དང་ང་རྒྱལ་ཕམ་ཁའི་རྒྱུ་ཡིན།།

ངང་བཟང་དང་བག་ལྷོད་རིང་དུ་སྐྱོངས་ཤིག།

རྒྱུགས་འབྲས་ཀྱིས་མི་ཚེའི་དར་རྒུད་མི་མཚོན།།

ཕུགས་བསམ་གྱི་རེ་བའི་སྐ་རགས་སྡོམས་ཤིག།

མཐོན་མཐིང་གི་རྒོད་པོའི་འཕུར་ལམ་ཞོད་དུ།།

སློབ་གྲོགས་ཚོའི་གཏན་གྱི་འདུན་མ་ཡོད་རེད།།

ཤེས་རིག་གི་པད་ཚལ་ཡངས་པོ་དེ་རུ།།

ན་ཚོད་ཀྱི་བདའ་འདེད་ཤིན་ཏུ་རྒོད་པས།།

ད་ཆ་ཡི་མཐོ་རྒྱུགས་ཐེམ་སྐས་འདི་ཡང་།།

བསམ་བསམས་ན་ཅིས་ཀྱང་འགྲིམ་དགོས་འདུག་གོ།

སྤྱོད་གཙང་གི་སྣོད་ལྡན་སློབ་བུའི་རུ་དཔུང་།།

རྒྱུགས་འབྲས་ཀྱི་རྒྱལ་ཕམ་སྐད་ཅིག་ཙམ་ཡིན།།

ཤེས་བྱ་ཡི་བདུད་རྩི་སྐལ་བའི་ནོམ་ཡིན།།

འོད་སྟོང་གི་ལམ་ཆེན་ཁྱོད་ཚོར་བསྟམས་ཡོད།།

ལེགས་ཚོགས་ཀྱི་གསུང་རབ་གྲངས་མེད་དྲུང་དུ།།

བཀྲ་ཤིས་པའི་སྨོན་ལམ་ཁྱོད་ཚོར་བཏབ་ཡོད།།

དབྱར་དྲུག་པའི་ཁུ་བྱུག་གསུང་སྐད་སྙན་མོས།།

དོན་འགྲུབ་པའི་ཤེས་རབ་ལྷ་མོ་བསུས་ཡོད།།

༼ མགར་ཐང་དཀར། ༽