དབེན་པའི་རི་ཁྲོད་ཉི་འོད་ཡོངས་སུ་ཁྱབ། །
དྭངས་པའི་ཆུ་བོ་དལ་གྱིས་བསིལ་བྱུང་བཞུར། །
མཛེས་པའི་རྩྭ་ཐང་འདབ་ལྡན་སྣ་ཚོགས་བཀྲ། །
དུང་བའི་ལྷ་མོ་སྙིང་མཆིན་གསེབ་ནས་འཚུབ། །
བརྩེ་བའི་དར་སྐུད་སྐད་འཕྲིན་བར་ནས་གཡོ། །
འཛུམ་པའི་སྐྱེས་གཟུགས་ཁ་པར་ལམ་ནས་མཇལ། །
ནམ་ཟླ་འགྱུར་ཡང་སྐད་ཆ་འགྱུར་མེད་ལབ། །
དུས་རབ་གསར་པའི་དབྱར་གྱི་དུས་ཤིག་ལ། །
མེ་ཏོག་སྣ་བརྒྱ་བཞད་པའི་སྤང་ལྗོངས་ནས། །
འཛོམས་པའི་ལས་དབང་བཅོས་མའི་ཁྱོད་ཉིད་སྒུག །
བསིལ་བའི་རླུང་བུ་དལ་གྱིས་ལུས་ལ་འཚུབ། །
ངག་གི་སྨྲ་ལྕེ་བདེ་བའི་ཉམས་འགྱུར་བཀོད། །
སྐར་མ་སྨིན་དྲུག་སྒང་གི་མཁའ་ལ་ཤར། །
བསིལ་ཟེར་དཀར་པོ་ཁོ་བོའི་གམ་དུ་ཟིན། །
འདོད་པའི་རི་མོ་ཁྱོད་ཀྱི་གཟུགས་ལ་ཕོག །
དུང་བའི་སྙིང་གཏམ་མལ་ཁྲི་སྟེང་ནས་སྤེལ། །
གྱེས་བྲལ་འཚོ་བ་རླུང་གི་དལ་གྱིས་གཏོར། །
བརྩེ་བའི་འདབ་མ་ཉི་མའི་གསེབ་ནས་སྨིན། །
རིང་དུ་མཆིས་པའི་སེམས་ཀྱི་མཛའ་ན་མོས། །
ཚོར་སྣང་བསིལ་བའི་མིག་ཆུའི་ངོ་གདོང་བཀྲུས། །
དབེན་པའི་ཚོར་བ་དགའ་སྐྱོ་འདྲེས་མ་འདི། །
དཔེ་ཀློག་ཟིན་བྲིས་ཁྲོད་ནས་དྲོད་ཅིག་མཆེད། །
གསང་བ་རོལ་བའི་བཅོས་མའི་དབང་པོ་ལ། །
དྲོད་ཀྱིས་གསོས་པ་ལྷ་མོ་ཁྱོད་ལས་སུ། །
བརྩེ་བའི་མཛེས་སྡུག་བཞད་པའི་ལང་ཚོ་ཡིས། །
བསིལ་ཟེར་ཐིམས་པའི་མཁའ་ཡི་ལྷ་མོ་ཁྱེད། །
དུས་ཀྱི་འབྲོག་གི་ལྷས་རའི་ཨ་ཅེ་མར། །
བརྩེ་དུང་རྡོ་རྗེའི་མདུད་པ་སླར་ཡང་བཏབ། །
མཛེས་ཉམས་ལང་ཚོ་ཇི་ལྟར་མོད་གྱུར་ཀྱང་། །
སེམས་ཀྱི་ཟབ་ས་བརྩེ་བའི་ཞིང་ཁམས་སུ། །
རྨིས་པའི་རི་གྲོང་བར་གྱི་རེ་འདོད་དུ། །
འཁོར་བའི་བདག་མོ་ཨེ་མ་ཁྱེད་ལས་སུ། །
༼ དབྱངས་ཞི་བ། ༽