འཛུམ་མེ་ཏོག་སེར་པོའི་དབུ་ཞྭ་བསླ་དུས། །
སྙིང་བརྩེ་བའི་བདག་མོ་མཉམ་འགྲོགས་གནང་དང་། །
ཞལ་མཛེས་མོ་ལྷ་ཡི་སྐྱེ་གཟུགས་འདྲ་འདྲ། །
སེམས་དམར་པོའི་དབུས་ནས་ཡལ་རྒྱུ་མི་འདུག །
འོད་རིང་ནས་འཛུམ་དུས་སེམས་པ་སྐྱིད་སོང་། །
དབྱར་མེ་ཏོག་ནང་ལ་སྣང་བ་འཁོར་ཡོད། །
སྙིང་བུམ་པའི་མགོ་བོ་ཡར་ཡར་བཀྱག་པའི། །
མ་ན་ཆུང་སྒེག་མོའི་འཛུམ་དམུལ་དྲན་གི། །
དབྱངས་འགྱུར་ཁུག་གསོན་པོའི་དྲན་མགུར་ཐར་ཐོར། །
ཚིག་མི་གཤིག་རྡོ་རྗེས་རིང་ནས་བསྲུང་ན། །
མ་དབྱངས་ཅན་ལྷ་མོའི་ཞལ་རས་མཛེས་མོ། །
ང་ཅོལ་ཆུང་བུ་ཡི་བསྐོས་ཐང་ཡིན་འདྲ། །
ས་དོག་མོ་བྱེ་ཐང་སྐྱ་མོའི་དབུས་ནས། །
གནམ་འཁོར་ལོ་སྤྲིན་གྱི་མཁར་རྫོང་དེ་ནས། །
ནང་ཏིང་འཛིན་མཉམ་བཞག་སེམས་ཀྱིས་མ་ཐུལ། །
ང་སྣང་ཡན་སྒྱུ་མའི་རི་ནས་ལྷག་འདུག །
མ་དབྱངས་ཅན་ལྷ་མོའི་ཞལ་རས་ཡག་པ། །
སྤྲིན་ཆུ་འཛིན་དཀར་པོའི་དབུས་སུ་ཤར་ན། །
ངས་འཇིག་རྟེན་འཁོར་བའི་ཐང་ཆེན་ཞིག་ནས། །
སེམས་དད་པ་འགྱུར་མེད་ནམ་ཡང་སྒུག་ཡོད། །
གཟུགས་མཛེས་པོ་ལྷ་ཡི་བྱིན་རླབས་ཡིན་འདུག །
ནང་མེ་ཏོག་ནང་གི་སྐར་ཆེན་ཡིན་འདུག །
སྨན་བུ་མོའི་ནང་ནས་ཁྱད་དུ་འཕགས་པ། །
ངའི་བརྩེ་བའི་བདག་མོ་དབྱངས་ཅན་ཁྱེད་རང་། །
འབྲོག་སྦྲ་ནག་སྨུག་པོའི་རི་མཚེར་དེ་ནས། །
ངག་སྙན་འཇེབས་བདེ་མོ་གླུ་དབྱངས་བཀུག་པའི། །
གཟུགས་སྐྱེ་ལོ་ལྷག་པའི་ན་ཆུང་བུ་མོ། །
ངའི་མི་ཚེ་ནང་གི་གཏན་གྲོགས་ཡིན་ནོ། །
ནང་མེ་ཏོག་དཀར་དམར་མིག་ལ་མཛེས་སོང་། །
དགུང་ཉི་ཟླའི་འོད་ཟེར་རི་འགོར་མཛེས་སོང་། །
ངག་སྒྱུ་འཕྲུལ་དབྱངས་ཀྱི་རྒྱང་གླུ་འདི་ཡང་། །
སྡེ་ཆེན་པོའི་དབུས་ནས་སུ་ལ་བླང་འདོད། །
༼ ཁམས་ཟླ་སྲས། ༽