ཆུ་འཛིན་སྤྲིན་དཀར་གྱི་ཕང་ཕུང་འཛུམ་དུས། །
འཇའ་ཟེར་མེ་ཏོག་གི་རོལ་སྒེག་ལྡན་མཁན། །
མཉམ་མེད་བདེ་ཆེན་གྱི་ཡེ་ཤེས་མཁའ་འགྲོ། །
ལྷ་མོ་དབྱངས་ཅན་མས་སྙན་དབང་སྩོལད་རོགས། །
མི་ཕྱེད་དད་འདུན་གྱི་ཤིས་གླུ་རིང་མོ། །
རྒྱང་རིང་ཡུལ་གྲུ་ནས་ངག་གིས་གྱེར་དུས། །
སྙན་འཇེབས་ཚེ་སྲོག་གི་དབྱངས་རྟ་རེ་རེས། །
བུ་ལ་དགའ་སྐྱིད་ཀྱི་ཚོར་བ་བསླངས་སོང་། །
རྣམ་དཀར་ཐར་ལམ་གྱི་དགའ་ཚལ་སྙེག་དུས། །
བག་ཆགས་དང་བྲལ་གྱི་ལྷ་མོ་ཁྱེད་ཀྱིས། །
བརྩེ་བའི་འོད་དཀར་གྱི་སྣང་བ་མཐའ་དག །
ས་སྟེང་བར་གསུམ་དུ་གྲགས་པ་འབར་འདུག །
མ་བཅོས་འཛུམ་ཆུང་གི་སོ་སྒོ་ཡག་པའི། །
སྒེག་ལྡན་ན་ཆུང་གི་ཡང་རྩེར་སོན་པའི། །
ཟླ་བའི་སྲིང་མོ་ལ་རེ་བ་ཞུས་ཏེ། །
རེ་བའི་འདུན་མ་ལ་དེང་ནས་འཇུས་ཡོད། །
ཞི་བདེ་རྒྱ་མཚོ་དེའི་ཁ་རུ་ཕྱིན་ཏེ། །
གཉེན་བྱམས་དགྲ་སྡང་གི་དབྱེ་བ་མེད་པར། །
ཚོགས་དྲུག་མེ་ཏོག་གི་མཐུན་སྦྲེལ་གནང་བས། །
ངག་རིག་ཁྲི་དཀར་གྱི་འདབ་མ་འཐོར་ཡོང་། །
ཚངས་སྲས་མཆོད་ཡོན་ལ་ཡོད་ཚད་འབུལ་ཆོག །
ཚངས་སྲས་ཐུགས་དགོངས་ལྟར་ཐམས་ཅད་བྱེད་ཆོག །
ཚངས་སྲས་དགྱེས་བརྩེ་འོག་དོར་བ་མེད་ན། །
ཚངས་སྲས་ལྷ་ཆེད་དུ་ཡོད་ཚད་བསྐྱུར་ཆོག །
དཀར་གསལ་དུང་ཟླ་ཡི་གཟི་བྱིན་རྒྱས་འདུག །
རྟ་བདུན་ཁྲི་ཅན་གྱི་ལང་ཚོ་འཕྱོར་བས། །
ས་གནམ་ཁྱོན་མཐའ་ནས་ཁྱེད་ཉིད་འདྲ་བའི། །
ན་ཆུང་བུ་མོ་ཞིག་ཟུར་ཙམ་མ་མཐོང་། །
ངག་རིག་མེ་ཏོག་གི་ལང་ཚོ་འཕྱོར་མོ། །
ཁྱེད་ཀྱི་སྐུ་དྲུང་གི་མདུན་ཕྱོགས་འཁོར་ན། །
ཁྱེད་གསུང་མི་ཤིགས་ཀྱི་སྒྲ་དབྱངས་གསོན་པོ། །
བུ་ངའི་རྣ་ལམ་དུ་ཡང་གཅིག་གྲག་དང་། །
༼ ཁམས་ཟླ་སྲས། ༽