གཡང་དཀར་ལུག་ཁྱུ་འཛོམས་སའི་སྤང་གི་ལྷས་ན། །
འབའ་སྒྲའི་སྙན་ངག་ལྷངས་སེར་རྣ་བར་འཇེབས་བྱུང་། །
མེ་ཏོག་ཁྲ་ཚོམ་མགོ་ལྕོག་རླུང་གིས་ལྡེག་དུས། །
སེམས་པ་རང་དབང་མ་བྱུང་སྐྱིད་ཀྱིས་འཁོར་དོན། །
ཚེ་སྔོན་ལས་ཀྱིས་བྲིས་པའི་རབ་མཛེས་སྐྱེད་ཚལ། །
རོགས་དང་འུ་གཉིས་འཛོམས་སའི་ལྡུམ་ར་སྐྱིད་བྱུང་། །
དགའ་སྐྱོ་ཁྲ་མཛེས་མེ་ཏོག་ལྷན་དུ་བཏུས་པས། །
ཚེ་སྐལ་རྟེན་འབྲེལ་འགྲིག་པའི་བསུ་མ་ཡག་སོང་། །
རབ་མཛེས་ཡིད་ཀྱི་དག་ཞིང་དབྱར་གྱི་སྤང་ཐང་། །
ན་ཆུང་མེ་ཏོག་དཀར་དམར་ཁྲ་མེར་བཞད་བྱུང་། །
མིག་ཟུང་བུང་བ་མི་འདུག་ཟེའུ་འབྲུར་གཡེང་དུས། །
ཚེ་རབས་སྟོང་ལ་འཚོལ་བའི་ཆུང་འདྲིས་མཛེས་སོང་། །
སྙིང་གཏམ་ཡིད་ཀྱི་མངར་བསྐྱུར་སེམས་ཀྱིས་མྱོང་ཡོད། །
དྲན་པའི་མེ་ཏོག་རེ་རེ་འདང་བརྩེས་བཏུས་ནས། །
ལག་གཉིས་དམ་དུ་སྦྲེལ་ནས་ཁ་ཆད་བྲིས་ཏེ། །
མི་འབྲལ་ཚེ་ཡི་མདུད་པ་འུ་གཉིས་རྒྱག་འགྲོ། །
ཉིན་མཚན་སྒོ་མོ་རེ་རེ་ཁྱོད་ཀྱིས་ཕྱེས་ཡོད། །
དེ་རིང་ནམ་ཟླའི་དགའ་བྲོད་ཁྱོད་ཀྱིས་སྟེར་བྱུང་། །
སེམས་པ་སེམས་ཀྱི་རི་མོ་ཡིད་མཐུན་དགའ་མ། །
བདག་ལ་སྐྱིད་ཀྱི་བགོ་སྐལ་ཚེ་འདིར་མ་བཅད། །
ཚེ་སྨད་ལུས་ཀྱི་འཁྱུད་རྒྱ་སོ་སོར་ཆད་དུས། །
གདུང་བའི་མིག་ཆུ་ཟ་ཟི་ས་ལ་ལྷུང་དུས། །
སེམས་བོར་ཡིད་ཐང་ཆད་པའི་མྱ་ངན་མ་ཞུ། །
སེམས་གཉིས་དམ་ཚིག་མདུད་པ་ད་དུང་མི་ཆད། །
མི་ཁའི་གནམ་ལྕགས་ཐོག་གིས་རི་རབ་གཏོར་ཡང་། །
ལུས་སེམས་ངལ་བ་མ་གནང་རྩེ་གཅིག་བཞུགས་དང་། །
ཁ་སེམས་བསམ་པའི་རུས་ཀྱི་སྙིང་གཏམ་དྲོད་མོས། །
ནམ་ཟླའི་དུས་ཚིགས་རེ་རེ་བདག་གིས་བསྐྱང་ཡོང་། །
སེམས་སོང་ཡིད་ཀྱི་མེ་ལོང་བརྩེ་བའི་འཛུམ་ཆུང་། །
ཡིད་ཁམས་དགའ་མས་འཚོས་པའི་ནང་གི་སྙིང་ཉེ། །
འབྲལ་མེད་དུས་བཞིའི་བདག་མོ་ཡིད་ཀྱི་དྲན་པ། །
ལྷ་མོ་དངོས་སུ་འཕོས་འདྲའི་མཛའ་མོ་ཁྱོད་དང་། །
མངར་གསུམ་ཟས་ཕུད་རོལ་བཞིན་སྤང་ལ་འགྲོགས་དུས། །
ཞེ་ཚིག་དབྱངས་སུ་སྦྱར་བའི་ཚིག་གི་འབྲུ་མ། །
མ་འོངས་རྡོ་རིང་བརྩེགས་པའི་ལོ་རྒྱུས་ཤིག་དང་། །
འདས་དོན་རྗེས་སུ་སློང་བའི་དོད་དུ་ཕུལ་ཡོད། །
༼ རང་མདངས། ༽