（ པར་ངོས་དང་པོར་མཐུད།）

རྩོམ་ཡིག་ནང་བསྟན་དོན། རང་ངོས་གསར་བརྗེ་བྱེད་ཕོད་པ་ནི་རང་རེའི་ཏང་གི་མངོན་གསལ་དོད་ཤོས་ཀྱི་གཤིས་རྒྱུད་དང་ལེགས་ཆ་ཆེ་ཤོས་རེད། ཏང་གི་ངོ་བོ་དང་། དམིགས་ཡུལ། ཐོག་མའི་བསམ་འདུན། འགན་འཁྲི་བཅས་ལས་རང་རེའི་ཏང་གིས་ཐོག་མཐའ་བར་གསུམ་དུ་ཆེས་རྒྱ་ཆེ་བའི་མི་དམངས་ཀྱི་རྩ་བའི་ཁེ་ཕན་མཚོན་པ་གཏན་ལ་ཕབ་ཡོད། སྒེར་ཕན་མ་གཉེར་ཚེ་རང་ངོས་གསར་བརྗེ་མཐར་ཕྱིན་བྱེད་པའི་སྙིང་སྟོབས་ལྡན་ཏེ། རྩ་བ་ནས་འགྱུར་ལྡོག་གཏོང་ཐུབ་པ་དང་ཁེ་ཕན་ཆེན་པོ་གཉེར་ཐུབ་ལ། བདེན་དོན་རྒྱུན་འཁྱོངས་དང་ནོར་འཁྲུལ་ཡོ་བསྲང་ཡང་ཐུབ་ནས། རང་ཉིད་ལ་ཞིབ་ལྟ་བྱེད་ཕོད་པ་དང་རང་སྐྱོན་རྟག་ཏུ་ཡིད་ལ་དྲན་ཐུབ། རང་སྐྱོན་མི་སྦེད་པ་དང་ཡོ་བསྲང་བྱ་རྒྱུར་མི་འཛེམས་པ་དང་རང་སྐྱོན་བཀབ་ནས་མི་སྡོད་པར་རང་ཉིད་ཀྱི་གནད་དོན་དུས་ཐོག་ཏུ་ཤེས་རྟོགས་དང་ཐག་གཅོད་བྱེད་ཚེ། ཁེ་ཕན་ཚོགས་པ་དང་། དབང་ཤུགས་ཚོགས་པ།

དམིགས་བསལ་དབང་ཆའི་རིམ་གྲས་བཅས་ཀྱི་རུལ་བསླད་ལ་རྒོལ་ལན་ནུས་ལྡན་སློག་ཐུབ་ཀྱི་རེད། དེ་ནི་རང་རེའི་ཏང་གིས་ཐོག་མཐའ་བར་གསུམ་དུ་སྔོན་ཐོན་རང་བཞིན་དང་དྭངས་གཙང་རང་བཞིན་རྒྱུན་འཁྱོངས་པ འི་གསང་བ་གནས་ས་ཞིག་རེད་ལ། རང་རེའི་ཏང་གིས་རང་ངོས་གསར་བརྗེར་སྐུལ་འདེད་གཏོང་ཐུབ་པའི་གཏིང་ཤུགས་གནས་སའང་རེད།

རྩོམ་ཡིག་ནང་ནན་བཤད་བྱས་དོན། ཏང་གི་རང་ངོས་གསར་བརྗེར་སྐུལ་འདེད་མཐར་ཕྱིན་ཏོང་བར་ལག་ལེན་ཁྲོད་གཤམ་གསལ་གྱི་གནད་དོན་ཁག་ཁོང་དུ་ཡག་པོ་ཆུད་པར་བྱེད་དགོས་པ་སྟེ། གཅིག ཏང་ཀྲུང་དབྱང་གི་གཅིག་སྡུད་གཅིག་གྱུར་གྱི་འགོ་ཁྲིད་མཐའ་འཁྱོངས་པ་དེ་རྩ་བའི་འགན་ལེན་དུ་བྱེད་དགོས་པ་དང་། གཉིས། རླབས་ཆེན་གྱི་སྤྱི་ཚོགས་གསར་བརྗེར་སྣེ་ཁྲིད་བྱ་རྒྱུ་དེ་རྩ་བའི་དམིགས་ཡུལ་དུ་འཛིན་དགོས་པ། གསུམ། དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་དེ་རྩ་བའི་གཞི་འཛིན་སར་བྱེད་དགོས་པ། བཞི། ལོ་རྒྱུས་ཀྱི་དུས་འཁོར་ལས་སྒྲོལ་བར་བྱ་རྒྱུ་དེ་འཐབ་ཇུས་ཀྱི་དམིགས་ཚད་དུ་འཛིན་དགོས་པ། ལྔ། ཏང་ཆེན་པོ་ཁོ་ནར་ལྡན་པའི་དཀའ་ངལ་བསལ་རྒྱུ་དེ་གཙོ་རྒོལ་ཁ་ཕྱོགས་སུ་འཛིན་དགོས་པ། དྲུག ཕྱོགས་ཡོངས་ནས་ཏང་ནན་པོས་སྐྱོང་བའི་མ་ལག་འཐུས་སྒོ་ཚང་དུ་གཏོང་བ་དེ་ཐབས་ལམ་ནུས་ལྡན་དུ་བརྩི་དགོས་པ། བདུན། སྲ་ཞིང་བརྟན་པའི་རྩ་འཛུགས་གཏོད་པ་དང་ཉམས་སད་ཐེག་པའི་དཔུང་ཁག་འཛུགས་སྐྱོང་བྱ་རྒྱུ་དེ་ཤུགས་རྒྱག་ས་གལ་ཆེན་དུ་འཛིན་དགོས་པ། བརྒྱད། སྤྱོད་བཟང་སྒྲིག་ནན་དང་རུལ་སུངས་ལ་ངོ་རྒོལ་བྱ་རྒྱུ་དེ་དམ་འཛིན་བྱེད་ས་གལ་ཆེན་དུ་འཛིན་དགོས་པ། དགུ། རང་གིས་རང་ལ་ལྟ་སྐུལ་དང་མི་དམངས་ཀྱི་ལྟ་སྐུལ་ཟུང་དུ་སྦྲེལ་བའི་སྒུལ་ཤུགས་ཆེན་པོ་ཆགས་པར་བྱེད་དགོས་པ་བཅས་རེད།

རྩོམ་ཡིག་ནང་བསྟན་དོན། ལག་ལེན་འཕེལ་རྒྱས་ལ་ནམ་ཡང་རྫོགས་མཐའ་མེད་ལ་རིགས་པའི་གཞུང་ལུགས་གསར་གཏོད་ལའང་རྫོགས་མཐའ་མེད། དེས་ན་བསམ་བློ་བཅིངས་འགྲོལ་དང་། དངོས་ཐོག་བདེན་འཚོལ། དུས་བསྟུན་མདུན་སྐྱོད། གཞུང་འཁྱོངས་གསར་འབྱེད་བཅས་བྱ་རྒྱུ་མཐའ་འཁྱོངས་ཏེ། ལག་ལེན་འཚོལ་ཞིབ་དང་རིགས་པའི་གཞུང་ལུགས་གསར་གཏོད་ཟམ་མི་ཆད་པར་བྱེད་པ་དང་ཏང་གི་རང་ངོས་གསར་བརྗེའི་ཆོས་ཉིད་རང་བཞིན་ལ་ངོས་འཛིན་བྱེད་ཚད་ཟམ་མི་ཆད་པར་གཏིང་ཟབ་ཏུ་བཏང་ནས། ཏང་གི་རང་ངོས་གསར་བརྗེའི་བསམ་ཕྱོགས་དང་བྱ་ཐབས་སྔར་བས་ཚགས་ཚུད་པོ་ཡོང་བ་དང་འཐབ་ཕྱོགས་དང་ལྷུ་ཚིགས་ཁག་གི་རང་ངོས་གསར་བརྗེར་དམ་འཛིན་ཞིབ་ཕྲ་དང་གཏིང་ཟབ་བྱེད་དགོས།།

( མི་དམངས་ཉིན་རེའི་ཚགས་པར་ནས་དྲངས།)