ད་སྔར་ནི་ར་མོ་ཤ་ཆེན་རྐོ་བའི་དུས་ཚོད་ཆེས་འཚམས་པོ་དེ་ཡིན། དར་མདོ་གྲོང་ཁྱེར་གུར་དྲག་གྲོང་རྡལ་རི་སྐེད་གྲོང་ཚོའི་ར་མོ་ཤ་ཆེན་འདེབས་འཛུགས་རྟེན་གཞིར་ཡུལ་མི་ཚོས་རྩི་ཤིང་གསེབ་ནས་ར་མོ་ཤ་ཆེན་བརྐོས་ཏེ་མི་ཁོམ་མི་ལྕོགས་བྱེད་བཞིན་ཡོད།

འདེབས་འཛུགས་རྟེན་གཞིའི་ནང་ཡུལ་མི་དབྱང་པང་ཆིན་གྱིས་ར་མོ་ཤ་ཆེན་འཐུ་རྒྱུ་ནི་ལག་རྩལ་ཅན་གྱི་ལས་ཀ་ཞིག་ཡིན། དེའི་རྩ་བ་ནས་བརྐོ་དགོས་པ་དང་། ས་འདམ་ཁྲོད་ནས་དལ་མོར་བླང་དགོས། དེ་ལྟར་བྱས་ན་ཤུན་ལྤགས་རལ་དཀའ་ཞིང་ཕྱིར་ཚུལ་མཛེས་ལ་ཉར་ཡུན་ཡང་དེ་ལས་རིང་བ་ཡིན་ཞེས་གསར་འགོད་པར་དེ་ལྟར་ངོ་སྤྲོད་བྱེད་པ་རེད།

ར་མོ་ཤག་ཆེན་ནི་སྨན་རྩྭ་གལ་ཆེ་ཞིག་ཡིན་པས་འཚོ་བཅུད་རིན་ཐང་དང་སྨན་སྤྱོད་རིན་ཐང་ཆེན་པོ་ལྡན་པ་དང་ཁྲོམ་རར་བྲིན་ཚད་ཡང་ཆེ། རི་སྐེད་གྲོང་ཚོར་མཚོ་འཕགས་སྨི1600ལྡན་པ་དང་ས་བབ་ལེགས་པ། སྔོ་ཁེབས་སྟུག་པ། གནམ་གཤིས་བཞའ་ཚན་ཆེ་བ་བཅས་ཁྱད་ཆོས་ཡོད་པས་ར་མོ་ཤག་ཆེན་སྐྱེ་བར་ཐུན་མོང་མ་ཡིན་པའི་ཆ་རྐྱེན་འཛོམས་ཤིང་སྤུས་ཚད་ཀྱང་ལེགས་པོ་ཡོད་པ་རེད།

དར་མདོའི་འཇའ་ཚོན་སྣ་ལྔའི་ཞིང་སྡེའི་ཞིང་ལས་ཚན་རྩལ་ཚད་ཡོད་སྤྱི་གཉེར་ཁང་གི་འགན་འཁུར་བ་ཧོ་ཀྲི་ཆང་གིས་ང་ཚོས་ད་སྔར་སྤྱི་གཉེར་ཁང་དང་། མཉམ་ལས་ཁང་། ཞིང་དུད་བཅས་ཟུང་དུ་སྦྲེལ་བའི་བྱེད་སྟངས་སྤྱད་ཡོད། ར་མོ་ཤག་ཆེན་གྱི་འདེབས་འཛུགས་གཞི་ཁྱོན་ཁྲི8ཙམ་ལ་ཟིན་པ་དང་། ལོའི་ཐོན་ཚད་སྤྱི་རྒྱ་ཁྲི7.5ནས10བར་ཟིན་ཡོད། ང་ཚོའི་ཚོང་ལམ་གཙོ་བོ་ནི་དྲྭ་གྲགས་ལ་བརྟེན་ནས་ཉོ་ཚོང་བྱེད་པ་དང་། དྲྭ་འོག་ནས་སྨན་རྫས་བཟོ་གྲྭ་དང་སྐམ་སིལ་ཉོ་སྒྲུབ་ཚོང་པ་དང་མཉམ་ལས་བྱེད་ཀྱི་ཡོད་ཅེས་བཤད།

ཤེས་རྟོགས་བྱུང་བར་གཞིགས་ན། ད་ལོར་རི་སྐེད་གྲོང་ཚོའི་ར་མོ་ཤག་ཆེན་སྐྱེ་ཚུལ་བཟང་ལ་འབྲས་བུ་ཆེ་ཤོས་རེ་ལ་ལྗིད་ཚད་སྲང6ནས7བར་ལ་ཟིན། ཉེ་འཁོར་གྱི་མང་ཚོགས་ཚོས་ར་མོ་ཤག་ཆེན་འདེབས་འཛུགས་དང་། བསྡུ་ལེན། དབོར་འདྲེན་སོགས་སུ་ཞུགས་ནས་ཉིན་རེར་གླ་རིན་སྒོར150ནས200བར་རག་ཐུབ་པ་རེད།

ཉེ་བའི་ལོ་ཤས་རིང་། དར་མདོ་གྲོང་ཁྱེར་གྱིས་ཐོན་ཁུངས་ལེགས་ཆ་གང་ལེགས་སྤྱད་དེ་ཞིང་ལས་ཐོན་ལས་ཀྱི་གྲུབ་ཆ་ལེགས་སུ་བསྒྲིགས་པ་དང་། ཞིང་ལས་ཐོན་ལས་ཀྱི་སྲོལ་རྒྱུན་གྱི་བྱེད་སྟངས་བསྒྱུར་ཏེ་ཡུལ་བབ་དང་བསྟུན་ནས་སྨན་རྩྭ་ཐོན་ལས་འཕེལ་རྒྱས་བཏང་ཡོད། ད་ལོ་གྲོང་ཁྱེར་ཡོངས་ཀྱིས་ར་མོ་ཤག་ཆེན་མུའུ580ལྷག་བཏབ་པ་དང་། སྔོན་དཔག་བྱས་ན་ཐོན་རྫས་རིན་ཐང་སྒོར་ཁྲི170ལྷག་ཟིན་རྒྱུ་རེད། ཕྱིན་ཆད། དར་མདོ་གྲོང་ཁྱེར་གྱིས་ཐོན་ལས་དར་རྒྱས་དེ་ཡུལ་སྡེ་དར་རྒྱས་ཀྱི་གཙོ་གནད་དུ་བརྩི་རྒྱུར་མུ་མཐུད་དེ་མཐའ་འཁྱོངས་ཏེ་སྨན་རྩྭའི་ཐོན་ལས་འཕེལ་རྒྱས་ཤུགས་ཆེན་གཏོང་བ་དང་། ར་མོ་ཤག་ཆེན་འདེབས་འཛུགས་གཞི་ཁྱོན་ཆེ་རུ་བཏང་ནས་ཁྱད་ལྡན་ཞིང་ལས་ཐོན་ལས་དབྱར་མཚོ་རྒྱས་པ་ལྟར་འཕེལ་རྒྱས་འགྲོ་རྒྱུར་སྐུལ་འདེད་གཏང་རྒྱུ་རེད།།

（སྐལ་བཟང་རྒྱ་མཚོས་བསྒྱུར།）