མྱ་ངན་མེད་པའི་འཆམ་རའི་སྟེང་དུ།།
གངས་ཕྲུག་གངས་རིས་འཆམ་སྟབས་བྱས་ཐལ།།
ནོར་འཛིན་དབུས་སུ་ཆོས་ཀྱི་བྲོ་གར།།
ལྡེམ་ལྡེམ་ལུས་ཀྱི་མཆོད་ཡོན་བྱས་ཐལ།།
རྩི་ཤིང་མེ་ཏོག་བཞད་པའི་ཐུན་མཚམས།།
སྦྲང་བ་གཞོན་ནུས་དབྱངས་རྟ་འཐེན་ཐལ།།
རྐང་འཐུང་ནགས་ཀྱི་ལྡུམ་རའི་ཚལ་དུ།།
ཁུ་བྱུག་མགྲིན་པས་གསུང་སྙན་བསྒྲགས་ཐལ།།
སྤྲེལ་ཟླའི་ཚེས་བཅུ་མཇལ་བའི་དུས་སུ།།
འཛུམ་དཀར་ལྷ་མོའི་ཞལ་རས་མཐོང་ཐལ།།
འུར་འུར་ཆེ་བའི་འཕྲིན་ཕྲན་སྦྲེལ་ནས།།
ཁྱོད་དང་ང་གཉིས་ལས་ཀྱིས་འཕྲད་ཐལ།།
འགྲུལ་བཞུད་ཆེ་བའི་ལམ་ཆེན་འགྲམ་ནས།།
བརྩེ་གཏམ་དང་བཅས་མ་འོངས་གླེང་ཐལ།།
སློབ་དཔོན་དུས་ཆེན་རྟེན་འབྲེལ་བསམས་ནས།།
མི་འབྲལ་འགྲོག་པའི་དམ་བཅའ་བཞག་ཐལ།།
བན་གཟུགས་བཅོས་མའི་ཚུགས་ཀ་འདི་ཡང།།
མགོ་མཇུག་ཞེ་ཆེན་གྲོང་ནས་རྫོགས་ཐལ།།
རྟ་དམར་ཅན་དེས་ལུས་སེམས་གདུང་ནས།།
ཤཱཀྱའི་བསྟན་པ་འཛིན་འདོད་བོར་ཐལ།།
སྒོམ་སྒོམ་ཐུབ་པའི་ཞལ་རས་མ་མཇལ།།
ཞེ་ཆེན་གྲོང་གི་མཛེས་མ་མཐོང་ཐལ།།
དག་པ་ལྷ་ཡི་ཡིད་འོང་མ་ཡང་།།
སེམས་གྲོགས་ཁྱེད་ཀྱི་ཟླ་བོར་བསམ་ཡོད།།
མཛེས་སྡུག་ཡིད་འོང་པདྨའི་ཚལ་ནས།།
འདི་འདྲ་འཕྲད་པ་སླ་མོ་མིན་ཐལ།།
འཁོར་བའི་ཁྲོད་ཀྱི་འགྲིམ་སྟངས་ཤིག་གིས།།
ང་རང་ཁྱོད་དང་མཉམ་དུ་ཆས་ཐལ།།
༼ དབྱངས་ཞི་བ། ༽