2024ལོའི་ཟླ་བ12པའི་ཚེས25ཉིན་ནི་ཁྲོན་བོད་གཞུང་ལམ་བསྐྲུན་ཏེ་རླངས་འཁོར་ཤར་གཏོང་ཐུབ་ནས་ལོ70འཁོར་བའི་ཉིན་མོ་ཡིན། ལམ་དེ་ནི་དམག་དམངས་ཁྲི10ལྷག་གིས་དཀའ་ཚེགས་ཧ་ཅང་ཆེ་བའི་ཆ་རྐྱེན་འོག་བསྐྲུན་པའི་གཞུང་ལམ་རེད། སི་ཁྲོན་ནས་བོད་ལྗོངས་སུ་སྐྱོད་པའི་བགྲོད་ལམ་ཆེན་པོའི་སྒོ་ཕྱེ་ཡོད་ལ། བོད་ལྗོངས་སུ་གཞུང་ལམ་མེད་པའི་ལོ་རྒྱུས་ཀྱང་མཇུག་རྫོགས་པ་རེད། ད་ལོ་ནི་ཁྲོན་བོད་དང་མཚོ་བོད་གཞུང་ལམ་བསྐྲུན་ཏེ་རླངས་འཁོར་ཤར་གཏོང་ཐུབ་ནས་ལོ70འཁོར་བའི་ལོ་ཡིན་ལ། སྤྱི་ཁྱབ་ཧྲུའུ་ཅི་ཞི་ཅིན་ཞིང་གིས་བཏོན་གནང་བའི་དཀའ་ངལ་ལ་མི་སྐྲག་པ་དང་འཆི་རྒྱུ་ལ་མི་སྐྲག་པ། འབད་འཐབ་ལྷོད་མེད། མི་དམངས་ཀྱི་ཞབས་འདེགས་པ། དམག་དམངས་ཁྱིམ་ཚང་གཅིག། མི་རིགས་མཐུན་སྒྲིལ་བཅས་ཀྱི་ལམ་གཉིས་སྙིང་སྟོབས་དར་སྤེལ་བཏང་ནས་ལོ10འཁོར་བ་ཡང་རེད། ལམ་གཉིས་སྙིང་སྟོབས་ནི་ཀྲུང་གོ་གུང་ཁྲན་ཏང་གི་སྙིང་སྟོབས་མ་ལག་གི་གྲུབ་ཆ་ཞིག་ཡིན་ལ། ཏང་ལེགས་སྙིང་སྟོབས་རླབས་པོ་ཆེ་བརྒྱུད་འཛིན་ཞིག་ཀྱང་རེད།
ཁྲེང་ཏུའུ་ནས་ལྷ་ས་བར་གྱི་གཞུང་ལམ་གྱི་བསྡུས་མིང་ལ་ཁྲོན་བོད་གཞུང་ལམ་ཞེས་ཟེར། དེ་ནི་གནའ་བོའི་ཁྲོན་བོད་འགྲོ་ལམ་དེང་རབས་ཀྱི་རིམ་པར་སྤར་བ་ཡིན་ཞིང་། ཤར་ཕྱོགས་སུ་སི་ཁྲོན་ཞིང་ཆེན་གྱི་ཁྲེང་ཏུའུ་གྲོང་ཁྱེར་ནས་འགོ་བརྩམས་ཏེ་ནུབ་ཕྱོགས་སུ་བོད་ལྗོངས་ལྷ་ས་གྲོང་ཁྱེར་ནས་མཇུག་རྫོགས་པ་རེད། ཀྲུང་གོའི་རྒྱལ་ལམ318པ་དང317པ་དང་། 214པ། 109པ། 350པ། 349པ་བཅས་ཀྱི་ལམ་ཐིག་ཁག་གཅིག་ལས་གྲུབ་པ་དང་། ཁྲོན་བོད་གཞུང་ལམ་གྱིས་སི་ཁྲོན་དང་བོད་ལྗོངས་སྦྲེལ་ཅིང་། ལྷོ་ཐིག་དང་བྱང་ཐིག་གཉིས་སུ་ཕྱེ་ཡོད། ཁྲོན་བོད་ལྷོ་རྒྱུད་ནི་ང་ཚོས་རྒྱུན་དུ་བཤད་པའི་རྒྱལ་ལམ318པ་ཡིན་པ་དང་རིང་ཚད་སྤྱི་ལེ2146ཡོད་པ་རེད།
སྤྱི་ཟླ12པའི་ཚེས25ཉིན། ཀྲུང་གོ་གྲངས་ཉུང་མི་རིགས་རིག་གནས་སྒྱུ་རྩལ་སྐུལ་སྤེལ་ལྷན་ཚོགས་དང་མཐོང་ཚོར་ཀྲུང་གོའི500pxདང་། རྒྱལ་ལམ318པའི་འཁོར་གཏོང་འགྲུལ་བཞུད་མནའ་འབྲེལ་བཅས་ཀྱིས་གཙོ་གཉེར་བྱས་པ་དང་། སི་ཁྲོན་ཞིང་ཆེན་མི་རིགས་རིག་གནས་གཟུགས་བརྙན་སྒྱུ་རྩལ་མཐུན་ཚོགས་ཀྱིས་སྒྲུབ་འགན་ཁུར་བའི་ཁྲོན་བོད་ལམ་ཐིག་ཏུ་ཆེས་མཛེས་པའི་ཡུལ་ལྗོངས་མཐོང་བ་ཞེས་པའི་ཁྲོན་བོད་གཞུང་ལམ་དུ་རླངས་འཁོར་ཤར་གཏོང་ཐུབ་ནས་ལོ70འཁོར་བའི་པར་ལེན་འགྲེམས་སྟོན་ཁྲེང་ཏུའུ་རུ་སྤེལ་བ་རེད། ད་ཐེངས་ཀྱི་པར་ལེན་འགྲེམས་སྟོན་དུ་པར་ཆས་ལས་ཁྲོན་བོད་གཞུང་ལམ་དུ་རླངས་འཁོར་ཤར་གཏོང་ཐུབ་རྗེས་ལམ་རྒྱུད་ཁག་གི་འགྱུར་ལྡོག་གསར་པ་མངོན་པ་དང་། ཁྲོན་བོད་གཞུང་ལམ་ལམ་རྒྱུད་ཀྱི་མི་རིགས་ཁག་མཐུན་སྒྲིལ་ཡར་ཐོན་དང་ཡུལ་སྡེ་དར་རྒྱས། སྐྱེ་ཁམས་དཔལ་ཡོན་འཛུགས་སྐྱོང་ཐད་ཐོབ་པའི་གྲུབ་འབྲས་ཕུན་སུམ་ཚོགས་པ་མངོན་ཡོད། ཁྲོན་བོད་གཞུང་ལམ་བཙུགས་ནས་ལོ70རིང་གི་གཟི་བརྗིད་ལྡན་པའི་བརྒྱུད་རིམ་ལ་ཕྱིར་དྲན་ཚད་མེད་དང་གུས་འདུད་བླ་ན་མེད་པ་ཡང་མཚོན་པ་རེད།།
(བདེ་ཆེན་གྱིས་བསྒྱུར།)