སྤྱི་ཟླ་དང་པོའི་ཚེས4ཉིན་གྱི་སྔ་དྲོར། དཀར་མཛེས་བོད་རིགས་རང་སྐྱོང་ཁུལ་སྐབས་བཅུ་གསུམ་པའི་མི་དམངས་འཐུས་མི་ཚོགས་ཆེན་གྱི་གྲོས་ཚོགས་ཐེངས་བཞི་པ་ལྕགས་ཟམ་རྫོང་དུ་འཚོག་འགོ་འཛུགས་པ་རེད། དཀར་མཛེས་ཁུལ་མི་དམངས་ས་ཡ་གཅིག་དང་འབུམ་གཉིས་ལྷག་གི་མངགས་བཅོལ་ཟབ་མོ་ཕྲག་ཏུ་ཁུར་བའི་ཁུལ་ཡོངས་ཀྱི་འཐབ་ཕྱོགས་ཁག་ནས་ཡོང་བའི་ཁུལ་མི་དམངས་འཐུས་ཚོགས་ཀྱི་འཐུས་མི་ཚོ་མཉམ་དུ་འཛོམས་ནས། ཆབ་སྲིད་ཀྱི་དགའ་ཞེན་ཆེན་པོས་འགན་ནུས་ཁྲིམས་ལྟར་ལག་ལེན་བསྟར་ཏེ། ཀྲུང་གོའི་ལུགས་ཀྱི་དེང་རབས་ཅན་གྱི་དཀར་མཛེས་ཁུལ་གྱི་ལེའུ་གསར་པ་བྲི་བར་བློ་རིག་དང་སྟོབས་ཤུགས་འབུལ་བ་རེད།

ཚོགས་ཆེན་དུ་འབྱོར་དགོས་པའི་འཐུས་མི277ཡིན་ཞིང་། འཐུས་མི253དངོས་སུ་འབྱོར་ཡོད་པས་ཁྲིམས་འབེབས་མི་གྲངས་དང་མཐུན་པ་རེད།

ཧྲུའུ་ཏ་ཁྲུན་གྱིས་འགོ་འཛུགས་ཚོགས་ཆེན་གཙོ་སྐྱོང་གནང་། ཚོགས་ཆེན་གྱི་ལག་བསྟར་ཀྲུའུ་ཞི་ཧྲེན་དབྱང་དང་། ཧྲུའུ་ཏ་ཁྲུན། ཀའོ་ཀྲན།

ཡིའུ་ཞང་ཧྥེ། ཡོན་མིང་ཀོང་། ཧོ་ཞན་ཅིང་། ཧོང་ཅིང་། ཚེ་དབང་འཇིགས་མེད། ཀྲེན་ཞན་ཧྥུང་། ལིན་ཏུང་ཧྲེང་། བཀྲ་རྡོར། བློ་བཟང་ལྷ་སྒྲོན། སྐལ་བཟང་འགྱུར་མེད་བཅས་ཀྲུའུ་ཞི་སྟེགས་བུའི་མདུན་གྲལ་དུ་བཞུགས་ཡོད།

ཁུལ་དཔོན་ཧྥུང་ཧྥ་ཀུའེ་ཡིས་ཁུལ་མི་དམངས་སྲིད་གཞུང་གི་ཚབ་མཛད་དེ་སྲིད་གཞུང་ལས་དོན་སྙན་སེང་ཞུས་པ་རེད། ཀྲང་ཐུང་རུང་ཚོགས་ཆེན་དུ་ཕེབས་ཤིང་ཀྲུའུ་ཞི་སྟེགས་བུར་བཞུགས་ཡོད།

སྔ་དྲོའི་ཆུ་ཚོད10པར། ཧྲུའུ་ཏ་ཁྲུན་གྱིས་ཁུལ་སྐབས་བཅུ་གསུམ་པའི་མི་དམངས་འཐུས་མི་ཚོགས་ཆེན་གྱི་གྲོས་ཚོགས་ཐེངས་བཞི་པ་འགོ་འཛུགས་པའི་ཁྱབ་བསྒྲགས་གནང་ཞིང་། ཚང་མ་ཡར་ལངས་ནས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་གླུ་ལེན་པ་རེད།

སྤྲོ་སེམས་འཕེལ་བའི་ཐལ་སྒྲ་ཁྲོད་དུ་ཧྥུང་ཧྥ་ཀུའེ་ཡིས་སྲིད་གཞུང་ལས་དོན་སྙན་སེང་ཞུས་པ་དང་། སྙན་སེང་ཁག་གསུམ་དུ་བགོས་ཡོད་པ་སྟེ། གཅིག། 2024ལོའི་ལས་དོན་ལ་ཕྱི་མིག་བལྟས་པ། གཉིས། 2025ལོའི་དམིགས་འབེན་དང་ལས་འགན་གཙོ་བོ། གསུམ། 2025ལོའི་གཙོ་གནད་ལས་དོན་བཅས་སོ།།

ཧྥུང་ཧྥ་ཀུའེ་ཡིས་ཤུགས་ཡོད་རྒུས་དཔལ་འབྱོར་འགྲན་གཉེར་བྱས་ཏེ། ཐོན་ལས་འཕེལ་ཤུགས་སྔར་བས་ཆེ་རུ་སོང་ཡོད་པ་དང་གཅིག། ཐོག་མཐའ་བར་གསུམ་དུ་བདེ་འཇགས་ལ་འགན་ལེན་བྱས་ཏེ། སྤྱི་ཚོགས་ཀྱི་སྤྱི་ཡོངས་སྔར་བས་འཆམ་མཐུན་ཡོང་བར་བྱས་ཡོད་པ་གཉིས། རྒྱུད་རིམ་ལྡན་པའི་སྒོ་ནས་སྐྱེ་ཁམས་ལེགས་པོ་བཅོས་སྐྱོང་བྱས་པ་དང་། ལྗང་མདོག་སྲུང་ཡོལ་སྔར་བས་སྲ་བརྟན་དུ་བཏང་ཡོད་པ་གསུམ། བློ་གཅིག་སེམས་གཅིག་དང་བརྩེ་སེམས་ཆེན་པོས་དམངས་འཚོ་ལ་ཕན་པ་བསྐྲུན་ཏེ་མི་དམངས་ཀྱི་འཚོ་བ་སྔར་ལས་སྐྱིད་དུ་བཏང་ཡོད་པ་དང་བཞི། རྒྱུན་འཁྱོངས་ལྷོད་མེད་ངང་ཏང་ལེགས་སྐྱོང་དམ་དུ་བཟུང་ནས་བཅོས་སྐྱོང་ཕན་ནུས་སྔར་བས་མངོན་གསལ་དོད་དུ་ཕྱིན་ཡོད་པ་དང་ལྔ་ཡི་ལས་དོན་གཙོ་བོར་དམིགས་ནས2024ལོའི་ལས་དོན་ལ་ཕྱིར་མིག་བལྟས་པ་རེད། （པར་ངོས་བཞི་པར་གཟིགས།）