སྤྱི་ཟླ་དང་པོའི་ཚེས5ཉིན་གྱི་སྔ་དྲོར་ཁུལ་སྐབས་བཅུ་གསུམ་པའི་མི་དམངས་འཐུས་ཚོགས་ཀྱི་ཚོགས་འདུ་ཐེངས་བཞི་པས་ཚང་འཛོམས་ཚོགས་འདུ་ཐེངས་གཉིས་པ་འཚོགས་ཤིང་། ཚོགས་ཆེན་དུ་འབྱོར་དགོས་པའི་འཐུས་མི277ཡིན་ཞིང་། འཐུས་མི243དངོས་སུ་འབྱོར་ཡོད་པས་ཁྲིམས་འབེབས་མི་གྲངས་དང་མཐུན་པ་རེད།

ཚོགས་ཆེན་གྱི་ཀྲུའུ་ཞི་ཚོགས་པའི་རྒྱུན་ལས་ཀྲུའུ་ཞི་ཧྲེན་དབྱང་དང་། ཚོགས་ཆེན་གྱི་ཀྲུའུ་ཞི་ཚོགས་པའི་ལག་བསྟར་ཀྲུའུ་ཞི་ཁྲེན་པོ་ཐའོ། ཕུའུ་ཡུང་ཧྥུང་། ཝང་ཆང་། ཞའོ་ཀྲི་ཧུང་། དགེ་ལེགས་རྡོ་རྗེ། སུང་ཞའོ་ཅུན། ཐེན་ལུང་། ལིའུ་ཡན། ལུའོ་ཞིའུ་ཀྲེན། ཀའོ་ཀྲེང་ཧུའེ། གཉའ་རྒྱལ་མཚན། ལིའོ་ཧུང་དབྱིན་བཅས་ཀྲུའུ་ཞིའི་སྟེགས་བུའི་ཐོག་བསྡད་ཡོད། ཚོགས་འདུ་ནི་ཚོགས་ཆེན་ཀྲུའུ་ཞི་ཚོགས་པའི་རྒྱུན་ལས་ཀྲུའུ་ཞི་ལག་བསྟར་ཀྲུའུ་ཞི་ཕུའུ་ཡུང་ཧྥུང་གིས་གཙོ་སྐྱོང་གནང་བ་རེད།

ཁུལ་སྲིད་གྲོས་ཏང་ཚན་ཁག་གི་ཧྲུའུ་ཅི་དང་། ཀྲུའུ་ཞི（མིང་འདོན）ཀྲང་ཐུང་རུང་གདན་ཞུས་ལྟར་གྲོས་ཚོགས་སུ་ཞུགས།

ཁུལ་སྐབས་བཅུ་གསུམ་པའི་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་མངགས་བཅོལ་ལྟར། ཁུལ་སྐབས་བཅུ་གསུམ་པའི་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་ཧྲུའུ་ཏ་ཁྲུན་གྱིས་ཁུལ་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ལས་དོན་སྙན་སེང་ཞུས་པ་རེད།

ཁུལ་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ལས་དོན་སྙན་སེང་ནང་ཕྱོགས་དྲུག་གི་ཐད་ནས2024ལོའི་ལས་དོན་ལ་ཕྱོགས་བསྡོམས་བྱས་ཤིང་ཁུལ་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི2025ལོའི་ལས་དོན་བཀོད་སྒྲིག་བྱས་ཡོད།

སྙན་སེང་ནང་བསྟན་དོན། 2024ལོ་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་བཙུགས་ནས་ལོ75འཁོར་བའི་ལོ་དང་རྒྱལ་ཡོངས་མི་དམངས་འཐུས་མི་ཚོགས་ཆེན་བཙུགས་ནས་ལོ70འཁོར་བའི་ལོ་ཞིག་ཡིན་ལ། མི་རིགས་ས་ཁོངས་རང་སྐྱོང་བཅའ་ཁྲིམས་ལག་ལེན་བསྟར་ནས་ལོ40འཁོར་བའི་ལོ་ཞིག་ཀྱང་ཡིན། （ པར་ངོས་བཞི་པར་གཟིགས།）