ས་རྡོ་སྲུབ་ཀར་མི་རོའི་རེམ་གོག་མཐོང་།།

རི་ཀླུང་ཡོད་ཚད་ངུ་འབོད་ཆོ་ངེས་བཀང་།།

འདུ་འབྲལ་སྡུག་གིས་ཁོང་ནས་གཟིར་བ་ཡི།།

ལ་སྟོད་དིང་རི་མི་ཚོགས་སྙིང་རེ་རྗེ།།

གསོན་བྲལ་སྡུག་གི་མཆི་མ་ཁོང་ནས་འཁྲུགས།།

ཡུལ་གཞིས་སྡོད་ཁང་མིང་གི་ལྷག་མར་གྱུར།།

དྭ་ཕྲུག་ཡུགས་མོའི་ས་སྟེང་གང་བ་ཡི།།

གོད་ཆག་སེམས་ལ་གཟན་ནོ་དིང་རི་བ།།

ལྷག་པ་ཤུར་ཤུར་ལྡང་བའི་རི་སུལ་ན།།

བུ་ཚ་མགོན་མེད་ངུ་བཞིན་གཅེར་བུར་རྒྱུ།།

མ་ཤི་དམྱལ་བའི་ལོ་རྒྱུས་ཐུང་ངུ་དེས།།

སྤུན་ཟླའི་སེམས་ལ་རྨ་ཁ་བཟོད་མེད་གཏོད།།

ནོར་འཛིན་འདར་ཁྱོམ་ཞིག་གི་གྲུ་ཁ་ནས།།

ཚེ་སྲོག་མར་མེ་རླུང་གིས་བདས་པ་ཡི།།

ལས་ཀྱི་གོད་ཆག་ལྕི་བའི་དིང་རི་བ།།

ཕྱག་ན་ཤེལ་དཀར་འཆང་བའི་ལྷ་དེས་སྐྱོབས།།

བེམ་གོག་རྡོ་ཁང་འོག་ཏུ་མནན་ན་ཡང་།།

བར་དོའི་རྣམ་ཤེས་ཐོགས་རེག་བྲལ་བའི་སྐབས།།

མྱུར་སྐྱོབ་ལས་ལ་བྲེལ་བའི་དངངས་ཚབ་དེས།།

ནང་སེམས་ལྷག་ཏུ་སྐྱོ་འམ་དིང་རི་བ།།

ཚེ་གཅིག་ལས་ཀྱིས་བསྡུས་པའི་ཉེ་དུ་དག།

མིག་ཆུས་ངོ་གདོང་ཡོངས་སུ་བརླན་པའི་སྐབས།།

འཇིགས་རུང་དུར་སའི་བྲག་ལ་མགོ་སྔས་ཏེ།།

མིག་ཆུའི་རླབས་ཕྲེང་འཕྱུར་རམ་དིང་རི་བ།།

མི་ཡི་མི་ཚེ་ཆུ་ཡི་ལྦུ་བ་འདྲ།།

རྒྱུ་འབྱོར་ལོངས་སྤྱོད་བྱེ་མའི་མཆིང་བུ་འདྲ།།

ཞེན་ཆགས་ཡིད་ལུས་ཕངས་སེམས་མི་ཆེ་བར།།

བདེ་བར་བཞུད་ཅིག་ང་ཡི་སྤུན་སྲིང་ཁྱུ།།

དགུན་རླུང་ཐོལ་གྱིས་ལྡང་བའི་ས་སྲོད་དེར།།

བཀྲེན་པ་མུ་གེའི་སྟེང་གི་ཟླ་ལྷག་དེའི།།

སེམས་ངལ་ཅ་ཅོ་འདོན་པའི་བན་ཧྲུལ་ངས།།

ཁྱེད་ལ་གདུང་སེམས་དབྱངས་ཀྱི་སྐྱེལ་མ་ཞུ།།

གནག་སྣུམ་སྐྲ་ཡི་གཟར་བུ་བཅད་ནས་བཟུང་།།

འཚེ་མེད་ལྟ་སྤྱོད་སྐྱོང་བའི་དགེ་རྩ་དང་།།

དུས་གསུམ་བསགས་པའི་དགེ་ཚོགས་ཅི་མཆིས་པ།།

ཁ་སེམས་བསམ་པའི་གཏིང་ནས་ཁྱེད་ལ་བསྔོ།།

འདི་ཡི་ཕན་འདོགས་ཟབ་ཁྱད་ཅི་ཡང་རུང་།།

བསམ་དཀར་ཡུག་གཅིག་མཚོན་པའི་དན་རྟགས་ཏེ།།

ཟང་ཟིང་འབྱོར་བའི་དཔལ་གྱི་ལང་ཚོ་ནི།།

མི་རྐྱང་དབུལ་པོ་བདག་ལ་ཅི་ཡང་མེད།།

འོན་ཀྱང་ཏང་སྲིད་བཟང་པོའི་བཀའ་དྲིན་དང་།།

གཏོང་ཕོད་ཅན་གྱི་དྲྭ་གྲགས་སྐར་ཆེན་ཚོར།།

ཡི་རང་སེམས་ཀྱི་སྨོན་པ་འཁྲུངས་བཞིན་དུ།།

རྣམ་རྟོག་འགྱུ་ཆ་སྟོང་གི་བར་གླགས་ནས།།

གདུང་སེམས་མཉམ་བསྐྱེད་ཞུ་མཆིད་འདི་རེ་ཐལ།།

༼ འབྲུག་ལྗང་ལོ། ༽