དིང་རི་བ།

རྨི་ལམ་དེའི་གཞུག་ནས།

ཞོགས་པ་དེའི་རྗེས་ནས།

གསོན་ངོགས་ཀྱི་གྲིབ་གཟུགས་བོར་སོང་།

ཉེ་རྩིས་ཀྱི་དྲན་གདུང་བཅད་སོང་།

དུམ་སེ་ཆད་པའི་འདི་ཕྱི།

གྲང་འཁྱགས་ཀྱིས་གཙེས་པ།

རིགས་རུས་ཀྱི་རྨ་ཁ་ཡིན།

མཐུན་སྒྲིལ་གྱི་རུ་དཔུང་ཡིན།

དིང་རི་བ།

ཇོ་མོ་གླང་མའི་མདུན་ཞོར།

ལྷོད་བག་གིས་ཆགས་པའི་རི་སུལ་དེ།

ཙག་རླུང་གི་ཁྲོད་ནས་འདར་སིག་གི་འཁུན་སྒྲ་སུ་ཡིས་བཟོད།

དིང་རི་བ།

ཟློག་མེད་ཀྱི་ས་ཡོམ་དེའི།

ཡ་ལན་བསློག་ས་མ་རྙེད།

ཁུངས་སྣེ་གཏུག་ས་མི་འདུག།

རྟེན་འབྲེལ་གྱི་དགེ་སྡིག་གང་ཞིག་ཉེས་སམ།

དགུན་གཞུང་འདི་རུ།

ང་ཡི་མིག་ཆུ་འཁེངས་རུང་།

གྲང་གཟུགས་ཀྱི་སྤར་འབྲད་རྒྱག་དགོས་བྱུང་།

གྲང་རླུང་གི་ཁུད་ན་ལྷུང་བའི་དིང་རི་བ།

འཆི་བའི་བརྡ་རྟགས་ཇེ་མང་རེད།

ད་ལྟ་ཕ་དམ་པ་སངས་རྒྱས་བཞུགས་མི་འདུག།

ངས་དིང་རི་བརྒྱ་རྩ་མ་ལས།

ཁྱོད་རང་ཤ་རུས་གླན་ཚུལ་གཞན་ཞིག་མ་རྙེད།

ངས་བོད་ལྗོངས་མཛའ་གཞས་ཀྱི་སྲུབས་ཀ་ཞིག་ལས།

ཁྱོད་ཀྱི་གྲིབ་མ་འཚོལ་མ་ཐུབ།

དིང་རི་བ།

ད་ལྟ།

གྲོགས་སྐོར་འདི་ནས།

སྤྱི་སྟེགས་འདི་ནས།

གཞུང་སྒེར་གྱི་དྲྭ་ཚུགས་ངོས་སུ།

ཁྱོད་ཀྱི་མིག་ཆུ་དང་མྱ་ངན་མཐོང་།

ཁྱོད་ཀྱི་གྲང་རེག་དང་སྐོམ་གདུང་མངོན་དུས།

ངའི་ཡིད་སེམས་ཀྱི་གཏིང་རིམ་ན་སྡུག་ཡུས་ཀྱི་མུན་པ་འཐིབས།

རིགས་རུས་ཀྱི་རུ་དཔུང་བརྟན་དགོས།

ཞལ་འདེབས་དག་ལག་སོན་འབྱུང་དགོས།

འདི་ཕྱི་གཉིས་མདུན་ལམ་གསལ་དགོས།

སེམས་ཀྱི་མཆོད་པའི་སྙན་ངག་འདི།

ཞེ་ནས་སྤར་ན། ཡུལ་ལྗོངས་དེར་གསལ་ན་བསམས།

༼ གུ་དཔལ་ཤིས། ༽