གདུང་སེམས་སྙིང་གི་འཕར་ལྡིང་།

རིགས་ཀྱི་མུ་ཏིག་ཕྲེང་བ་རྡོག་པོ་གཅིག།

ལྷོ་ཕྱོགས་དིང་རིའི་བརྩེ་བའི་རིགས་མཐུན་ཚོགས།།

འབྱུང་བཞིའི་གདུག་རྩུབ་བཙན་པོའི་རྔམ་ཟིལ་ཕོག།

ཀྱེ་ཧུད་སྙིང་རྗེའི་དབང་ཕྱུག་དམ་པས་མཁྱེན།།

རང་བྱུང་ལས་ཀྱི་འགྱུར་བ་མཐའ་ཡས་པ།།

སུས་ཀྱང་མི་ཁོག་ལྡོག་ཏུ་མི་ནུས་མོད།།

ཤ་རུས་ཁྲག་གི་འབྲེལ་བའི་སྤུན་ཟླའི་ཚོགས།།

ནུས་མེད་བརྩེ་བའི་ཀློང་ན་རྟག་ཏུ་བཀྲ།།

གཞིས་ཁྱིམ་གྲངས་མེད་ས་རྡོའི་གསེབ་ལ་འཐོར།།

རྣམ་ཤེས་གྲངས་མེད་གཤིན་ཡུལ་གྲོང་ལ་འཁྱར།།

ནང་མི་ཁ་བྲལ་རིགས་མཐུན་གདུང་བས་ལྷགས།།

གོད་ཆགས་ཡ་ང་མཐོང་ཚེ་སྙིང་རྩ་འདར།།

ལས་འབྲས་ཐོད་པའི་མིག་འབྲས་ལྟར་སྲུང་ཞིང་།།

བྱམས་བརྩེ་ཁོག་གི་སྙིང་ཆུང་ལྟར་གཅེས་པའི།།

འཚེ་མེད་ཞིང་ཁམས་སྲིད་འབྱོར་གྱིས་སྟོང་སར།།

རང་བྱུང་རྒྱལ་མོས་གོད་ཆགས་གནང་དོན་ཅི།།

འོན་ཀྱང་དོན་དམ་སྐྱིད་སྡུག་ངེས་བཟུང་བྲལ།།

སྤྱི་སྒེར་སུ་ཡང་སྐྱེ་འཆིའི་འཕྲང་རིང་ལ།།

མ་བགྲོད་ཐབས་མེད་ལས་འདི་སྔ་གཞུག་ཙམ།།

སྤྱི་མཐུན་ལས་ཀྱི་བཀོད་སྒྲིག་སུ་ཡིས་ལྡོག།

སྐྱེས་པའི་ལན་དུ་འཆི་བའི་གོ་རིམ་དང་།།

སྐྱིད་སྡུག་གང་བྱུང་རྒྱུ་ཚོགས་ལས་འབྱུང་བའི།།

ཚུལ་འདི་རང་རེའི་ལུགས་གཉིས་སྙིང་པོ་ཡིན།།

སྐྱིད་སྡུག་གདོང་ལེན་གྱིས་ཤིག་དིང་རི་བ།།

བྱམས་བརྩེའི་མེ་ཏོག་འཛུམ་པའི་གངས་ལྗོངས་འདིར།།

ལྷན་གཅིག་ཤ་ཁྲག་འབྲེལ་བའི་ལས་སྨོན་གྱིས།།

སྐྱེ་འཆིའི་གོད་ཆགས་མཐོང་ཚེ་སེམས་རྩ་འཁྱག།

རིགས་གཅིག་སེམས་ལ་ལྷུང་འགྲོ་དིང་རི་བ།།

དེ་རུ་འགྲོ་སྙམ་རྒྱང་ཐག་ཡུལ་གྱིས་བསྐལ།།

ནོར་དང་རྒྱུ་རྫས་གཏོང་སྙམ་དཔལ་གྱིས་ཕོངས།།

དམར་ཆུང་སེམས་པའི་བརྩེ་བའི་འཕར་ལྡིང་ལས།།

ཅི་ཡང་མི་ནུས་རིགས་མཐུན་དིང་རི་བ།།

གདུག་རྩུབ་དྲག་པོས་གཤིན་ཡུལ་འགྲིམ་པ་དང་།།

དཀའ་སྡུག་ཀློང་ནས་ཤུལ་ལྷག་སྤུན་ཟླའི་ཚོགས།།

འདི་ཕྱི་ཀུན་ཏུ་སྐྱབས་འཇུག་བསྔོ་སྨོན་བྱས།།

ཇི་བཞིན་འགྲུབ་པར་སྐྱབས་གསུམ་ལྷ་ཡིས་སྲུངས།།

དགུན་ལ་གྲང་བའི་ཟུག་རྔུས་ཤ་རུས་གཟིར།།

རིགས་མཐུན་སྐྱོ་སྡུག་ཐེབས་པས་ཡིད་སེམས་གདུང་།།

སྙིགས་དུས་སྟོན་མཆོག་འཕགས་མཆོག་སྤྱན་གཟིགས་ཀྱིས།།

འདི་ཕྱི་ཀུན་ལ་ཐུགས་བརྩེ་མ་ལྷོད་ཅིག།

༼ སྣང་བ་རང་གྲོལ། ༽