དགོང་མོ་དེར།

བྱམས་བརྩེ་ལྡན་པའི་ཕ་མ་མང་པོས་དགའ་བའི་དགོད་

སྒྲ་ལྷང་ངེར་སང་ཉིན་གྱི་འཚོ་བ་གླེང་ངེས།

ཞོགས་པ་དེར།

ས་ཆེན་པོའི་གཡོ་འགུལ་ཞིག་གིས་བྱམས་བརྩེ་ཡི་

དགོད་སྒྲ་དེ་སྡུག་བསྔལ་གྱི་ངུ་སྒྲ་རུ་འགྱུར་འགྲོ་བ་

ག་ལ་རྟོགས་སྲིད་ཨང་།

དགོང་མོ་དེར།

བརྩེ་འདང་ཟབ་པའི་མཛའ་གཅུགས་མང་པོས་དུང་

བའི་འཛུམ་མདངས་འཁྱིལ་ལེར་མ་འོངས་

ཀྱི་འཆར་གཞི་བརྗོད་ངེས།

ཞོགས་པ་དེར།

གེགས་ཆེན་པོའི་བར་ཆད་ཅིག་གིས་བརྩེ་འདང་གི་འཛུམ་

མདངས་དེ་ན་ཟུག་གི་དྲན་གདུང་དུ་འགྱུར་

འགྲོ་བ་ག་ལ་ཚོར་སྲིད་ཨང་།

དགོང་མོ་དེར།

ལྷིང་འཇགས་ཡིན་པའི་ཁྱིམ་ཚང་མང་པོས་སྐྱིད་

པའི་སྔུར་སྒྲ་གསལ་ལེར་རྨི་ལམ་གྱི་ཞིང་ལ་མྱུལ་ངེས།

ཞོགས་པ་དེར།

བཟོད་དཀའ་བའི་གནོད་འཚེ་ཞིག་གིས་ལྷིང་འཇགས་ཀྱི་རི་

གྲོང་དེ་གྱེས་བྲལ་གྱི་མིག་ཆུ་རུ་འགྱུར་

འགྲོ་བ་ག་ལ་ཤེས་སྲིད་ཨང་།

རྐྱེན་ངན་གྱི་རླུང་རྒོད་ནག་པོ་ཞིག།

གྱེས་བྲལ་གྱི་འཇིགས་པ་ཆེན་པོ་ཞིག།

ངུ་འབོད་ཀྱི་འཐབ་རྩོད་དྲག་པོ་ཞིག།

དིང་རི་ཡི་མི་དམངས་མགོ་ལ་ལྷུང་།

གངས་ཅན་ཡུལ་ནས་ཤ་ཁྲག་གཅིག་ལས་མཆེད་པའི་

ང་ཡི་སྤུན་ཟླ་དིང་རི་བ།

རི་བོ་ཇོ་མོ་གླང་མའི་འདབས་རོལ་དུ་འཚོ་བའི་ང་ཡི་

སྤུན་ཟླ་དིང་རི་བ།

ཁྱེད་ཚོའི་མགོ་ཐོག་ཏུ་ཐེག་དཀའ་བའི་གོད་ཆགས་

ཆེན་པོ་ཞིག་བྱུང་སོང་།

ཁྱེད་ཚོའི་སེམས་ཐོག་ཏུ་གསོས་དཀའ་བའི་རྨ་ཁ་

ཆེན་པོ་ཞིག་བཟོས་སོང་།

ཁྱེད་ཚོའི་ལུས་སེམས་སུ་བཟོད་དཀའ་བའི་

སྡུག་བསྔལ་ལྕི་མོ་ཞིག་ལྷུང་སོང་།

འོན་ཀྱང་།

སྐྱོ་སྐྱོ་མ་གནང་།

དིང་རིའི་མི་དམངས།

འབྱུང་བ་ལ་སྙིང་རྗེ་མེད་ཀྱང་།

མི་ཡུལ་ལ་བརྩེ་བས་ཁེངས་ཡོད།

ཁྱེད་ཚོ་ལ་ད་དུང་ང་ཚོ་ཡོད།

ང་ཡི་སྤུན་ཟླ་དིང་རི་བ་ལགས།

ཁྱེད་ཚོའི་སྟེང་འོག་རྒྱབ་མདུན་ཀུན་ཏུ།

རླབས་ཆེན་གྱི་མེས་རྒྱལ་དང་སྤུན་ཟླའི་མི་རིགས་ཁག།

ད་དུང་རང་རིགས་ཀྱི་སྤུན་ཟླ་འགྲེང་ཡོད།

ང་ཚོ་སྐྱིད་ལ་ཁའི་རྩྭ་ལ་མཉམ་ཟ་དང་།

སྡུག་སྔོན་མོའི་ཆུ་ལ་མཉམ་འཐུང་ཡིན།

ང་ཡི་སྤུན་ཟླ་དིང་རི་བ་ལགས།

སྡུག་གི་མུན་པ་ཇི་ལྟར་མཐུག་ཀྱང་།

ནམ་ཞིག་སྐྱིད་ཀྱི་ཉི་མ་འཆར་བར་རེ་བ་བྱེད་རོགས།

༼ བྱང་སྐྱ་རེངས། ༽