ལྗང་མདོག་རྩྭ་ཐང་སྟེང་དུ། །
དཀར་དམར་ཚོན་མདངས་བྱུགས་འདུག །
འཛུམ་དང་འཛུམ་གྱི་བར་ན། །
སྣང་བ་སྐྱིད་སྐྱིད་འདྲ་ལེ། །
སྤང་ལྗོངས་སྔོན་མོའི་ཁུགས་ཀྱི། །
པདྨར་འཁྲེང་བའི་རྣམ་ཤེས། །
དབྱར་གཞུང་སྐྱིད་པོའི་ཁྲོད་ནས། །
མཛེས་རིས་མཚོ་བཞིན་འཁྱིལ་སོང་། །
རང་བྱུང་མཛེས་སྡུག་རེ་ལ། །
ཡིད་ཀྱི་འཁྲེང་སེམས་རེ་རེ། །
དུས་ཀྱི་འགྱུར་ལྡོག་རེ་ལ། །
དྲན་པའི་སྨྲེང་བ་རེ་རེ། །
དྲན་པའི་མཚོ་ཁར་བཞད་པའི་། །
མཛེས་འཛུམ་མེ་ཏོག་སེར་ཆེན། །
དྲི་བསུང་ཕྱོགས་བཞིར་མཆེད་པ། །
ཡིད་ཀྱི་འཐིལ་ལ་བབས་སོང་། །
སྙིང་ལ་ཟིམ་པའི་མེ་ཏོག །
མིག་ལ་མཛེས་པའི་རི་མོ། །
སྣང་བའི་ངོས་ལ་བབས་པས། །
བརྩེ་བའི་གཏིང་ལ་ཟུག་སོང་། །
དགའ་སྐྱོའི་སེམས་ཚོར་མང་པོ།
སེམས་དང་སེམས་ཀྱི་མྱང་བྱ། །
ལང་ཚོ་དབྱར་གྱི་མཛེས་པ། །
མིག་དང་མིག་གི་དགའ་སྟོན། །
བསིལ་འཇམ་རླུང་བུའི་རེག་བྱ། །
བར་མེད་ལུས་ལ་རེག་དུས། །
ཚོར་ཤེས་རྐྱེན་པོའི་བར་ནས། །
ཚིག་གི་ཆར་བ་བབས་བྱུང་། །
རང་སྣང་གྱ་གྱུ་ཕྲ་མོ། །
བརྗོད་པ་ཚིག་གིས་མི་མཚོན། །
རྣམ་ཤེས་ཕལ་བ་ཞིག་གིས། །
ངལ་གསོ་ཐེངས་གཅིག་བྱེད་འདོད། །
དྲན་པ་སྟོང་པའི་དབྱིངས་སུ། །
ཚོར་བའི་རླུང་ཡན་ལྡང་དུས། །
ཚོར་སྣང་དབྱིངས་ལ་ཟུག་ནས། །
ཚངས་མགུར་ཐེངས་ཤིག་གྱེར་འདོད། །
༼ མེ་ཆར། ༽