དོ་ནུབ་ཟླ་བ་ལྷ་མོས་ཕྱག་ཟུང་བརྐྱངས།།
སྨག་ནག་ལུང་པའི་ཞོལ་གྱི་ཁུ་སིམ་ལ།།
གཡོ་བའི་ཟོར་གྱིས་འོད་ཅིག་བྲུག་པ་དང་།།
བདུན་པའི་ལོ་འདབས་དེ་ཡང་མཛེས་པོར་མཐོང་།།
མཚན་མོར་ཁུ་སིམ་རོལ་བར་གོམས་པ་ཡི།།
ཡོལ་བའི་གམ་གྱི་བདག་གི་སྔས་མགོ་རུ།།
དེ་བཞིན་བསིལ་བའི་འོད་ཅིག་བཀྱེད་པ་དང་།།
དྲན་འཆར་ངོས་སུ་རི་མོ་སྣ་ཚོགས་འཐོར།།
མེ་ཏོག་གང་མང་འཐོར་བའི་སྒེའུ་ཡོལ་ངོས།།
དགའ་སྐྱོ་གོར་བོ་ཁུར་བའི་ཕྱེ་ལེབ་བབ།།
དེ་ཡང་ཡིད་འོང་ཞིག་གི་སྣ་ཁྲིད་དེ།།
ཟླ་འོད་བདག་གིས་བཟུང་ཏེ་ཤུག་ཤུག་བྱེད།།
དོ་ནུབ་ཟླ་བ་ལྷ་མོས་སྤྱན་གཉིས་འབྱེད།།
ནམ་གུང་རླུང་ཡན་དང་བཅས་མཛེས་སྡུག་གོན།།
ང་རང་གཉིད་ཀྱི་ལུང་བར་ཞུགས་རན་ཁར།།
ཡང་བསྐྱར་ལྷ་ལམ་ངོས་སུ་ཕྱི་མིག་འཆོར།།