སྤྲིན་ནག་དག་ཕར་ལ་དེད་ཀྱིན།
སྔོ་ཐིང་ཐིང་གི་ནམ་མཁའ་ལ་རེ་བ་བྱས།
མཐོན་མཐིང་གི་ནམ་མཁའ་ལ།
གལ་སྲིད། མཚོན་མདོག་གིས་ཉི་གུར་ཕུབ་ཚེ།
དེ་ནི་ཅི་འདྲའི་ཡིད་དུ་འོང་བ་ལ་ཨང་།
ཉི་མ་ཤར་བྱུང་། ཉི་ཟེར་ཕོག་བྱུང་།
དྲོད་ཁོལ་ལྡན་པའི་ཨ་མའི་པང་ཁུད་དུ་
མགོ་བོ་འཇོག་ཙམ་གྱིས།
སྐྱེ་བ་བརྒྱ་ཕྲག་གི་རྨི་ལམ་སད་བྱུང་།
གློ་བུར་བའི་སྤྲིན་ནག་རེ་ཟུང་གིས།
ཆར་ཆུ་རྡོལ་ཞིང་སྨུག་པས་གང་ན་ཡང་།
ཆར་རྗེས་ཀྱི་ཉི་འོད་ཀྱིས།
ང་རང་ཡོད་སའི་འབྲོག་ཕྱོགས་འདིར།
སྤང་དག་ལ་སྣུམ་ཤ་རྒྱས་ཏེ།
ཧ་ཅང་མཛེས་སྡུག་གིས་བཀང་འགྲོ།