གངས་རི་སྲིད་པའི་གངས་རྒན།།
དབུ་ལ་རྨོག་དཀར་མཛེས་པ།།
གནམ་སའི་རྩིབས་མར་བསྐོས་པའི།།
གཡུ་ཁྲོམ་གངས་ཀྱིས་བརྒྱན་ཡོད།།
བཻཌཱུརྱ་ཞུན་མའི་རང་མདངས།།
དྲི་བྲལ་དངུལ་གྱི་མེ་ལོང་།།
ཟེགས་མའི་རླབས་ཀྱིས་མཛེས་པ།།
གཡུ་མཚོ་གནས་སའི་ག་འུ།།
གཡུ་ཐང་ཨ་ལོང་ནང་ན།།
སྦྲ་ནག་སྟོང་གིས་བཀང་ཡོད།།
སྦྲ་ཆོན་ཐ་གུའི་སྣེ་མོ།།
མེ་ཏོག་མཚོ་ནས་འཁྲུངས་པ།།
གཡུ་ལུང་གཡུ་ཡི་ཁོག་པར།།
རི་ལ་སྤང་རི་ནགས་རི།།
བྱ་གླག་གཤོག་པ་ངལ་བའི།།
འཕྲུལ་གྱི་སྦལ་ཡུལ་གཡུ་ལུང་།།
གཡུ་དཀར་པགས་པས་ཡག་ས།།
གཡུ་ཡི་རྩིག་པར་བབས་པའི།།
གཡུ་གནས་སྦས་པའི་ཡུལ་འདི།།
མཚར་སྡུག་སྟོང་གི་གཡུ་མཁར།།
༼ ཧུན • དུར་རོ། ༽