国内统一刊号:CN51-0018-Z 中共甘孜州委机关报·甘孜日报社出版凝聚正能量·传播好声音

  • 日
    历
  • 上
    一
    期
  • 下
    一
    期

གནམ་ལོ་གསར་པའི་རང་མདངས་ལྷ་ཆབ་གཡས་འཁྱིལ།

ཞོགས་པའི་སྐྱ་མདའ་དགུང་ནས་མ་བཀྱགས་གོང་།།

ཐོ་རེངས་སྐར་མ་སྨེ་བདུན་མ་ཡལ་གོང་།།

རང་རང་ཁྱིམ་གྱི་བདག་མོ་བཞིན་བཟང་མས།།

རྟེན་འབྲེལ་མཆོད་ཆུ་ལེན་པའི་ངལ་བ་འཛིན།།

ཉི་གཞོན་གསར་པས་འཇིག་རྟེན་སྒོ་མོ་ཕྱེ།།

དྲི་བཞོན་བསེར་བུས་མཁའ་དབུགས་སོ་མ་ཁྱེར།།

སྣོད་བཅུད་ཀུན་ཀྱང་སྐྱེད་ཚལ་གསར་པ་བཞིན།།

འདྲེན་བྱེད་དབང་པོའི་ལམ་དུ་མངོན་པར་མཛེས།།

མདང་ནུབ་གཉིད་ཐུན་ཆགས་པའི་བྱིས་པ་དག།

གྱོན་ཆས་གསར་པས་ངོམ་སོ་རྒྱག་སྙམ་དང་།།

ཀ་ར་འོ་མའི་བཅུད་ལ་གཞིབ་སྙམ་གྱིས།།

སེམས་ཆུང་སྙི་མོ་མ་བཅོས་བྲེད་ཤ་ལངས།།

ནམ་ཞར་འདུ་ཤེས་གསུམ་པས་བྲིད་དག་ཀྱང་།།

དེ་རིང་སྔ་ལོང་སྔ་འཕྱི་རྩོད་པ་བཞིན།།

རྒྱུན་དུ་ལེ་ལོའི་གཞན་དབང་གྱུར་དག་ཀྱང་།།

དེ་རིང་ངོ་འཁྲུད་གོས་ཤམ་འབའ་ཞིག་བྲེལ།།

དབུ་སྐྱེས་བལ་དཀར་ལྟ་བུ་ཕ་ལོ་ཡིས།།

ཕྱོགས་ཀྱི་ལྷ་ལ་བསང་མཆོད་གཏོང་བཞིན་དུ།།

བསངས་དུད་དགུང་དུ་མཆེད་པའི་བསུང་ངད་ཀློང་།།

ཀི་བསྭོའི་ལྷ་སྒྲ་སྒྲོག་པའི་སྣང་བརྙན་མཛེས།།

བཞིན་གྱི་ཆུ་སྐྱེས་རྙིད་པའི་མ་ལོ་ཡིས།།

འབྲི་མོའི་ནུ་ཏོག་ཧར་གྱིས་འཇོ་བའི་ཞོར།།

འོ་ཕུད་དཀོན་མཆོག་ལྷ་ལ་འབུལ་བཞིན་དུ།།

ཇ་སྐྱེམས་ཟས་ཀྱི་སྡེར་ཁ་སྒྲིག་ལ་བྲེལ།།

དགོད་འཛུམ་ལྷང་ལྷང་འཚེར་བའི་གཞིས་ཁྱིམ་ཀློང་།།

དཀར་པོའི་འོ་ཇ་རྔམ་འཐུང་བྱེད་ཞོར་དུ།།

ཁ་གཡང་སྨོན་ཚིག་གཙང་མའི་ལེགས་སྐྱེས་ཀྱིས།།

དབང་མེད་ཡིད་ཀྱི་གུར་ཁྱིམ་གཡོ་བར་བྱེད།།

རང་རང་འབྱོར་བའི་ཚོད་ཀྱིས་གཏོང་བ་ཡི།།

ཤ་མར་ཐུད་ཀྱི་སྡེ་ཁ་སྣུམ་པའི་ཁྲོད།།

དེང་རབས་བཏུང་སིལ་སྐོམ་སྐྱེམས་བསྟར་འདི་ཀོ།།

ནེའུ་གསེང་དྲི་ལྡན་ཚོགས་ཀྱི་དཔལ་ལ་འགྲན།།

མི་ལོ་དུ་མ་བྱེས་སུ་གྱར་བ་ཡི།།

ཐག་རིང་སྤུན་སྲིང་དག་ཀྱང་ལྷན་ཅིག་འཛོམས།།

མ་མཇལ་དབང་གིས་བསྐལ་བའི་གཉེན་མཛའ་དག།

འཚམས་འདྲིའི་ཁ་ཡང་སྐུད་མེད་ལམ་ནས་བརྒྱུད།།

ཕན་ཚུན་མགྲོན་གྱི་འབོད་སྲོལ་ཡི་གར་འོང་།།

གནའ་སྲོལ་ཁ་རླངས་མ་ཡལ་དྲོད་ཁོལ་ལྡན།།

གླུ་གར་རྩེད་འཇོ་གཏམ་དང་ཀུ་རེ་མོད།།

ཁ་འཛུམ་ཁོག་དྲོ་སེམས་ཀྱི་ངལ་དུབ་སངས།།

འདས་པའི་ལོ་ཟླ་དགའ་སྐྱོའི་སྐྱེལ་མ་བཞག།།

བགྲང་བྱ་གསར་པའི་རྟེན་འབྲེལ་མཚོན་ཉིན་འདིར།

འབྱུང་འགྱུར་གཞིས་བྱེས་བདེ་འཚམ་ཡོང་བ་དང་།།

ཤིས་པའི་དགེ་མཚན་ཀུན་ནས་བརྟས་གྱུར་ཅིག།

༼ རྒུན་ཆང་། ༽